ໃນຕອນເຊົ້າຂອງວັນທີ 19 ຕຸລາ 2016, ທີ່ ກະຊວງການຕ່າງປະເທດ ໄດ້ຈັດຊຸດຝຶກອົບຮົມວຽກງານພັກ-ພະນັກງານ ໃຫ້ແກ່ບັນດາສະຫາຍຄະນະໜ່ວຍພັກ ພາຍໃນອົງຄະນະພັກກະຊວງການຕ່າງປະເທດຂຶ້ນ, ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ, ມີນັກວິທະຍາກອນມາຈາກກົມກໍ່ສ້າງພັກ ແລະ ກົມປ້ອງກັນພັກ-ພະນັກງານ, ຄະນະຈັດຕັ້ງສູນກາງພັກ, ມີບັນດາສະຫາຍຄະນະພັກ, ຄະນະນຳກະຊວງ ແລະ ບັນດາສະຫາຍຄະນະໜ່ວຍພັກ, ກຳມະການພັກ ພາຍໃນອົງຄະນະພັກກະຊວງ ເຂົ້າຮ່ວມທັງໝົດ.
ຈຸດປະສົງຂອງການຈັດຊຸດຝຶກອົບຮົມໃນຄັ້ງນີ້ ແມ່ນການເພີ່ມທະວີການກໍ່ສ້າງ ແລະ ປັບປຸງການຈັດຕັ້ງຮາກຖານພັກຢູ່ໃນອົງຄະນະພັກກະຊວງການຕ່າງປະເທດ ໃຫ້ມີຄວາມໜັກແໜ້ນເຂັ້ມແຂງທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນຳພາ, ເຮັດໃຫ້ສະມາຊິກພັກ-ພະນັກງານຫຼັກແຫຼ່ງນຳພາຄຸ້ມຄອງ ເຫັນໄດ້ໜ້າທີ່ຄວາມຮັບຜິດຊອບໃນການຊີ້ນຳ-ນຳພາ ວຽກງານພັກ-ພະນັກງານ ແລະ ເປັນການຍົກສູງຄຸນທາດການເມືອງ, ຄຸນສົມບັດ, ຄວາມຮູ້ຄວາມສາມາດການນຳພາສູງກວ່າເກົ່າ, ພ້ອມກັນນັ້ນກໍ່ເປັນການຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງການຕ່າງປະເທດ ໃຫ້ປະກົດຜົນເປັນຈິງ. ຊຸດຝຶກອົບຮົມໃນຄັ້ງນີ້ ຈະດຳເນີນໄປເປັນເວລາ 03 ວັນ, ເລີ່ມແຕ່ວັນທີ 19-21 ຕຸລາ 2016, ຜູ້ເຂົ້າຮ່ວມຈະໄດ້ຮັບຟັງ ແລະ ພ້ອມກັນຄົນຄວ້າເຊື່ອມຊຶມ ບັນດາເນື້ອໃນເອກະສານວຽກງານສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ, ວຽກງານກໍ່ສ້າງ ແລະ ຂະຫຍາຍພັກ, ວຽກງານການຕີລາຄາການຈັດແບ່ງປະເພດການຈັດຕັ້ງຮາກຖານພັກ ແລະ ສະມາຊິກພັກ, ການອອກບັດ-ມອບສະມາຊິກພັກ ແລະ ພື້ນຖານກ່ຽວກັບວຽກງານປ້ອງກັນພັກ-ພະນັກ ງານ, ເຊິ່ງພິທີເປີດ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ ໄດ້ເນັ້ນໜັກໃຫ້ຜູ້ເຂົ້າຮ່ວມຝຶກອົບຮົມ ຈົ່ງຕັ້ງໜ້າຄົ້ນຄວ້າ, ເຊື່ອມຊຶມ, ຍາດເອົາບັນດາບົດຮຽນ ແລະ ປະສົບການໃນການເຮັດວຽກພັກ-ພະນັກງານ ຈາກນັກວິທະຍາກອນຜູ້ທີ່ມີຄວາມຮູ້ຄວາມສາມາດ, ແລກປ່ຽນທອດຖອນບົດຮຽນ, ພ້ອມກັນຄົ້ນຄວ້າໃຫ້ເລິກເຊິ່ງເຖິງຖອງ ຕໍ່ບັນຫາຕ່າງໆ ທີ່ເຫັນວ່າຍັງບໍ່ທັນຈະແຈ້ງ ເພື່ອພ້ອມກັນແກ້ໄຂ ແລະ ບຸກທະລຸຕາມມະຕິກອງປະຊຸມໃຫຍ່ຂອງອົງຄະນະພັກ ກໍຄືກອງປະຊຸມ ໃຫຍ່ຄັ້ງທີ III ຂອງອົງຄະນະພັກກະຊວງການຕ່າງປະເທດວາງໄວ້, ພ້ອມກັນຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ກຳແໜ້ນທິດສະດີມາກເລນິນ ແລະ ແນວຄິດໄກສອນພົມວິຫານ ອັນເປັນພື້ນຖານທິດສະດີໃນການວາງແນວທາງການເຄື່ອນໄຫວຈັດຕັ້ງປະຕິບັດວຽກງານຕ່າງໆ ໃຫ້ປະກົດຜົນເປັນຈິງເທື່ອລະກ້າວ ແລະ ຕ້ອງກຳແໜ້ນ ແລະ ຮູ້ນຳພາດ້ານການເມືອງແນວຄິດ, ສຶກສາອົບຮົມບັນດາສະຫາຍສະມາຊິກພັກໃຫ້ມີຄວາມໜັກແໜ້ນ, ເຂັ້ມແຂງດ້ານການເມືອງແນວຄິດ, ນຳພາບັນດາອົງການຈັດຕັ້ງມະຫາຊົນເຄື່ອນໄຫວຕາມພາລະບົດບາດ, ເປັນແບບຢ່າງນຳໜ້າໃນທຸກວຽກງານ, ເປັນເຈົ້າການໃນການເຕົ້າໂຮມຄວາມສາມັກຄີພາຍໃນ.