ໃນວັນທີ 16 ພະຈິກ 2016, ທີ່ ຫ້ອງວ່າການປະທານປະເທດ, ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ບັນດາລັດຖະມົນຕີກະຊວງປ້ອງກັນປະເທດອາຊຽນ ແລະ ຮອງເລຂາທິການໃຫຍ່ອາຊຽນ ໃນໂອກາດທີ່ບັນດາລັດຖະມົນຕີກະຊວງປ້ອງກັນປະເທດອາຊຽນ ເດີນທາງມາເຂົ້າຮ່ວມກອງປະຊຸມ ລັດຖະມົນຕີປ້ອງກັນປະເທດອາຊຽນວົງແຄບ ທີ່ ສປປ ລາວ ໄດ້ຮັບກຽດເປັນເຈົ້າພາບ.
ໂອກາດດັ່ງກ່າວ, ທ່ານປະທານປະເທດ ໄດ້ສະແດງຄວາມຍິນດີຕ້ອນຮັບ ແລະ ມີຄວາມພາກພູມໃຈ ທີ່ໄດ້ພົບປະບັນດາທ່ານລັດຖະມົນຕີປ້ອງກັນປະເທດອາຊຽນ ແລະ ທ່ານຮອງເລຂາທິການໃຫຍ່ອາຊຽນ. ຊຶ່ງທ່ານໄດ້ກ່າວວ່າ: ການທີ່ພວກທ່ານເດີນທາງມາເຂົ້າຮ່ວມກອງປະຊຸມ ລັດຖະມົນຕີປ້ອງກັນປະເທດອາຊຽນວົງແຄບ ຄັ້ງນີ້ ສະແດງໃຫ້ເຫັນເຖິງຄວາມມຸ່ງໝັ້ນ ແລະ ຄວາມພະຍາຍາມຢ່າງຕັ້ງໜ້າຂອງພວກທ່ານ ໃນການເສີມສ້າງການພົວພັນຮ່ວມມືທາງດ້ານວຽກງານປ້ອງກັນຊາດ ລະຫວ່າງ ກອງທັບຂອງບັນດາປະເທດສະມາຊິກອາຊຽນດ້ວຍກັນ, ຊຶ່ງກົນໄກການຮ່ວມມືດັ່ງກ່າວນີ້ ແມ່ນມີບົດບາດອັນສຳຄັນພື້ນຖານໃຫ້ແກ່ການຈັດຕັ້ງຜັນຂະຫຍາຍວິໄສທັດອາຊຽນ 2025 ໃຫ້ປະກົດຜົນເປັນຈິງ. ໂດຍການສ້າງຕັ້ງປະຊາຄົມອາຊຽນໃຫ້ໜັກແໜ້ນເຂັ້ມແຂງ ຊຶ່ງຮຽກຮ້ອງໃຫ້ບັນດາປະເທດສະມາຊິກອາຊຽນທັງໝົດ ຈະຕ້ອງມີຄວາມເປັນເອກະພາບ, ມີຄວາມຈິງໃຈຊ່ວຍເຫຼືອຊຶ່ງກັນ ແລະ ກັນ, ຮ່ວມມືກັນຢ່າງໃກ້ຊິດໃນການພັດທະນາຂີດຄວາມສາມາດ, ມີການປະສານງານຢ່າງເປັນລະບົບ ແລະ ປົກກະຕິ ເພື່ອເຮັດໃຫ້ພວກເຮົາສາມາດຮັບມືກັບໄພຂົ່ມຂູ່ ແລະ ສິ່ງທ້າທາຍຕ່າງໆ ທີ່ພວກເຮົາກຳລັງປະເຊີນຢູ່ໃນປັດຈຸບັນ ໄດ້ຢ່າງມີປະສິດທິພາບ ແລະ ທັນເວລາ. ທັງໝົດນີ້ ແມ່ນເພື່ອຮັບປະກັນເຮັດໃຫ້ພາກພື້ນຂອງພວກເຮົາ ກາຍເປັນພາກພື້ນທີ່ມີສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ການພັດທະນາຢ່າງ ຕໍ່ເນື່ອງ.
ໃນນາມປະທານປະເທດ ແຫ່ງ ສປປ ລາວ ຂໍສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມລັດຖະມົນຕີປ້ອງກັນປະເທດອາຊຽນວົງແຄບ ຄັ້ງນີ້ ແລະ ຂໍຖືໂອກາດນີ້ ຂໍສະແດງຄວາມຂອບໃຈຕໍ່ກັບການສະໜັບສະໜູນ ແລະ ຊ່ວຍເຫຼືອການເປັນປະທານອາຊຽນຂອງ ສປປ ລາວ ໂດຍສະເພາະແມ່ນກອງປະຊຸມລັດຖະມົນຕີປ້ອງກັນປະເທດອາຊຽນ ຄັ້ງທີ 10 ແລະ ກອງປະຊຸມປິ່ນອ້ອມອື່ນໆ ທີ່ ກະຊວງປ້ອງກັນປະເທດ ແຫ່ງ ສປປ ລາວ ເປັນປະທານຕະຫຼອດປີ 2016 ນີ້. ໂອກາດນີ້ ຂໍອວຍພອນໃຫ້ບັນດາທ່ານ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ອັນມີກຽດສະຫງ່າຂອງທ່ານ ແລະ ຂໍອວຍພອນໃຫ້ທ່ານເດີນທາງກັບຄືນປະເທດ ດ້ວຍຄວາມສະຫວັດດີພາບ.