ໂດຍຕອບສະໜອງຕາມຄຳເຊີນຂອງ ທ່ານ ຫລີ ເຄີ ສຽງ, ນາຍົກລັດຖະມົນຕີ ແຫ່ງ ສປ ຈີນ. ທ່ານ ທອງລຸນ ສີີສຸລິດ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ໄດ້ເດີນທາງຢ້ຽມຢາມ ສາທາລະນະລັດ ປະຊາຊົນຈີນ ຢ່າງເປັນທາງການ ນັບແຕ່ວັນທີ 28 ພະຈິກ ຫາວັນ ທີ 01 ທັນວາ 2016.

ພິທີຕ້ອນຮັບທາງການໄດ້ຈັດຂຶ້ນຢູ່ຫໍສະພາປະຊາຊົນຈີນ ໂດຍການຕ້ອນຮັບຂອງ ທ່ານ ຫລີ ເຄີ ສຽງ, ນາຍົກລັດຖະມົນຕີ ແຫ່ງ ສປ ຈີນ ເລີ່ມຕົ້ນດ້ວຍການເຄົາລົບທຸງຊາດດ້ວຍການບັນເລງຊາດລາວ ແລະ ເພງຊາດຈີນຕາມລຳດັບ. ພາຍຫລັງສຳເລັດພິທີຕ້ອນຮັບທາງການ, ທ່ານ ທອງລຸນ ສີສຸລິດ, ນາຍົກລັດຖະມົນຕີພ້ອມດ້ວຍຄະນະ ໄດ້ເຂົ້າຮ່ວມພົບປະສອງຝ່າຍກັບ ທ່ານ ຫລີ ເຄີ ສຽງ, ນາຍົກລັດຖະມົນຕີ ແຫ່ງ ສປ ຈີນ ໃນຕອນແລງຂອງວັນທີ 28 ພະຈິກ 2016 ທີ່ຫໍສະພາປະຊາຊົນຈີນ ນະຄອນຫລວງປັກກິ່ງ.ໃນໂອກາດພົບປະ, ທ່ານ ຫລີ ເຄີ ສຽງ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ທີ່ໄດ້ຢ້ຽມຢາມ ສປ ຈີນ ຢ່າງເປັນທາງການຕາມຄຳເຊີນ ແລະ ໄດ້ແຈ້ງສະພາບການພັດທະນາເສດຖະກິດ-ສົງຄົມຂອງຈີນໃຫ້ຝ່າຍລາວຮັບຊາບ.ໃນໂອກາດນີ້ ທ່ານ ທອງລຸນ ສີສຸລິດ ກໍໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ສະໜິດສະໜົມຂອງທ່ານນາຍົກລັດຖະມົນຕີ ຫລີ ເຄີ ສຽງ. ໃນການພົບປະຄັ້ງນີ້ ເຕັມດ້ວຍບັນຍາກາດມິດໄມຕີຈິດອັນສະໜິດສະໜົມ ຖານເພື່ອນມິດຍຸດທະສາດອັນຍາວນານ, ປະເທດບ້ານໃກ້ເຮືອນຄຽງທີ່ດີ, ທັງສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບການຂອງ ແຕ່ລະປະເທດ ແລະ ໄດ້ແລກປ່ຽນຄຳຄິດ ຄຳເຫັນຢ່າງເລິກເຊິ່ງ ແລະ ມີຄວາມເປັນເອກະພາບກັນຢ່າງກວ້າງຂວາງ ກ່ຽວກັບການເສີມຂະຫຍາຍສາຍພົວພັນແບບຄູ່ຮ່ວມຍຸດທະສາດຮອບດ້ານ ລະຫວ່າງ ສປປ ລາວ ແລະ ສປ ຈີນ ໃຫ້ມີຄວາມຫລັກຫລາຍ ແລະ ອຸດົມສົມບູນຍິ່ງຂຶ້ນ, ພ້ອມນັ້ນ ກໍໄດ້ແລກປ່ຽນທັດສະນະຕໍ່ບາງບັນຫາພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນ. ຕໍ່ການຮ່ວມມືສອງຝ່າຍລາວ-ຈີນ, ຜູ້ນໍາສອງປະເທດ ໄດ້ເປັນເອກະພາບກັນວ່າ: ນັບແຕ່ສອງປະເທດໄດ້ສ້າງສາຍພົວພັນແບບຄູ່ຮ່ວມຍຸດສາດໃນປີ 2009 ເປັນຕົ້ນມາ, ຄວາມເຊື່ອໝັ້ນ ເຊິ່ງກັນ ແລະກັນ ທາງດ້ານການເມືອງຂອງສອງຝ່າຍ ນັບມື້ນັບເລິກເຊິ່ງ, ການຮ່ວມມືແບບຕ່າງຝ່າຍຕ່າງມີຜົນປະໂຫຍດໃນແຕ່ລະຂົງເຂດໄດ້ຮັບໝາກຜົນ ເປັນໜ້າເພິ່ງພໍໃຈຕາມທິດນຳທີ່ວ່າ: ໝັ້ນຄົງຍາວນານ, ເພື່ອນບ້ານທີ່ເປັນມິດ,ໄວ້ເນື້ອເຊື່ອໃຈກັນ, ຮ່ວມມືຮອບດ້ານ ແລະ ບົນຈິດໃຈ 4 ດີຄື: ບ້ານໃກ້ຮືອນຄຽງທີ່ດີ,ເພື່ອນທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ. ພ້ອມກັນນີ້, ສອງຝ່າຍໄດ້ເຫັນດີເພີ່ມທະວີການສະໜັບສະໜູນ ແລະ ຮ່ວມມື ປະສານສົມທົບກັນໃຫ້ສະໜິດແໜ້ນໃນຂອບການຮ່ວມມືໃນພາກພື້ນ ແລະ ສາກົນ, ເພື່ອຜົນປະໂຫຍດຂອງສອງຝ່າຍ ກໍຄືພາລະກິດ ສັນຕິພາບ ແລະ ມິດຕະພາບ ແລະ ການຮ່ວມມືພັດທະນາຂອງພາກພື້ນ ແລະ ໃນໂລກ.

ພາຍຫລັງສຳເລັດການພົບປະສອງຝ່າຍທ່ານນາຍົກທັງສອງປະເທດໄດ້ເຂົ້າຮ່ວມເປັນສັກຂີພິຍານໃນພິທີລົງນາມເອກະສານການຮ່ວມມືສອງຝ່າຍ ກ່ອນເຂົ້າຮ່ວມງານລ້ຽງຮັບຮອງໃຫ້ກຽດແດ່ ທ່ານ ທອງລຸນ ສີສຸລິດ,ນາຍົກລັດຖະມົນຕີ ແຫ່ງ ສປປ ລາວ ແລະ ຄະນະຈັດໂດຍ ທ່ານ ຫລີ ເຄີ ສຽງ, ນາຍົກລັດຖະມົນຕີ ແຫ່ງ ສປ ຈີນ.