ວັນ​ທີ 13 ມັງກອນ 2017, ທ່ານ ສະເຫຼີມໄຊ ກົມມະສິດ, ລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ, ໄດ້​ຕ້ອນ​ຮັບ​ການ​ເຂົ້າ​ຢ້ຽມຂ່ຳ​ນັບຂອງ ທ່ານ ຫງວຽນ ບາ ຮຸ່ງ, ໃນ​ໂອ​ກາດ​ໄດ້ຮັບ​​ແຕ່ງ​ຕັ້ງ​ເປັນ​ ເອກອັກຄະລັດຖະທູດວິ​ສາ​ມັນ ຜູ້ມີອຳນາດເຕັມ ​ແຫ່ງ ສ​ສ. ຫວຽດ​ນາມ ປະ​ຈຳ​ ສປປ ລາວ ຜູ້ໃໝ່.

ໃນ​ໂອກາດນີ້, ທ່ານລັດ​ຖະ​ມົນ​ຕີ ກະ​ຊວງ​ການ​ຕ່າງ​ປະ​ເທດໄດ້​ສະ​ແດ​ງ​ຄວາມຍິ​ນ​ດີ​ຕ້ອນ​ຮັບ ແລະ ​ຊົມ​ເຊີຍຕໍ່​ ທ່ານ ຫງວຽນ ບາ ຮຸ່ງ ທີ່​ໄດ້​ຮັບ​​ແຕ່ງ​ຕັ້ງ​ໃຫ້​ມາ​ດຳ​ລົງ​ຕຳ​ແໜ່ງ​ເປັນ ເອກອັກຄະລັດຖະທູດ ແຫ່ງ ສສ. ຫວຽດ​ນາມ ປະ​ຈຳ​ ສປປ ລາວ, ພ້ອມ​ທັງ​ສະ​ແດງ​ຄວາມ​ເຊື່ອ​ໝັ້ນ​ວ່າພາຍ​ໃນ​ໄລ​ຍະເວ​ລາ ​ທີ່​ທ່ານ​ປະ​ຕິ​ບັດ​​ໜ້າ​ທີ່ວຽກ​ງານ​ການ​ທູດ​ ຂອງຕົນ ຢູ່ ສ​ປ​ປ ລາວ ນີ້, ທ່ານຈະສືບ​ຕໍ່ເສີມ​ຂະ​ຫຍາຍ​ສາຍ​ພົວ​ພັນ​ມິດ​ຕະ​ພາບ, ​​ຄວາມສາ​ມັກ​ຄີແບບ​ພິ​ເສດ ແລະ ການ​ຮ່ວມ​ມື​ຮອບ​ດ້ານ ລະ​ຫວ່າງ​ສອງ​ປະ​ເທດ ລາວ-ຫວຽດ​ນາມ ​ໃຫ້ແໜ້ນແຟ້ນມີ​ປະ​ສິດ​ທິ​ຜົນ ແລະ ຈະເລີນງອກ​ງາມ​ຍິ່ງໆ​ຂຶ້ນ, ໂດຍສະເພາະການຮ່ວມມືກັນ ເພື່ອເພີ່ມທະວີບໍລິມາດ ແລະ ປະສິດທິພາບ ທາງດ້ານການຄ້າ, ການລົງທືນ ລະຫວ່າງ ສອງປະເທດ ເປັນຕົ້ນແມ່ນການປະຕິບັດໂຄງການໃຫຍ່ຮ່ວມກັນ ໃຫ້ມີປະສິດທິຜົນດີ, ພິເສດແມ່ນ ການຮ່ວມມືກັນໃນເວທີພາກພື້ນ ແລະ ສາກົນ. ກະຊວງການຕ່າງປະເທດ ແຫ່ງ ສປປ ລາວ ຈະໃຫ້ການຮ່ວມມືຢ່າງເຕັມທີ່ ເພື່ອໃຫ້ທ່ານເອກອັກຄະລັດຖະທູດ ສໍາເລັດໜ້າທີ່ອັນສູງສົ່ງ ທີ່ໄດ້ຮັບມອບໝາຍຂອງຕົນ.

ພິ​ເສດ ໃນ​ປີ 2017 ນີ້, ສະຖານທູດຫວຽດນາມ ແລະ ກະ​ຊວງ​ການ​ຕ່າງ​ປະ​ເທດ​ລາວ ຈະ​ໄດ້​ປະ​ສານ​ງານ​ກັນ​ ແລະ ຮ່ວມມືກັນ ຢ່າງ​ໃກ້​ຊິດ ເພື່ອ​ກະ​ກ​ຽມ​ໃຫ້​ບັນ​ດາ​ກິດ​ຈະ​ກຳ ສະ​ເຫຼີມ​ສະຫຼອງ​ສອງວັນ​ປະ​ຫວັດ​ສາດ​ຂອງ​ສອງ​ຊາດ ຄື: ວັນ​ເຊັນ​ສົນ​ທິ​ສັນ​ຍາ​ມິດ​ຕະ​ພາບ ແລະ ການ​ຮ່ວມ​ມື ຄົບ​ຮອບ 40 ປີ (18/7/1977-18/7/2017) ແລະ ວັນ​ສ້າງ​ຕັ້ງ​ສາຍ​ພົວ​ພັນ​ການ​ທູດ ​ລະ​ຫວ່າງ ລາວ-ຫວຽດ​ນາມ ຄົບ​ຮອບ 55 ປີ (5/9/1962-5/9/2017) ປະ​ສົມ​ຜົນ​ສຳ​ເລັດ​ຢ່າງ​ຈົບ​ງາມ.

​ໃນ​ໂອ​ກາດ​ດຽວ​ກັນ, ທ່ານ ຫງວຽນ ບາ ຮຸ່ງ, ໄດ້​ສະ​ແດງ​ຄວາມ​ຂອບ​ໃຈຕໍ່ ທ່ານ ສະເຫຼີມໄຊ ກົມມະສິດ, ທີ່​ໄດ້​ໃຫ້​ການ​ຕ້ອນ​ຮັບ​ອັນ​ອົບ​ອຸ່ນ ແລະ ສະ​ໜິດ​ສະ​ໜົມ ພ້ອມ​ທັງ​ໃຫ້​ຄຳ​ໝັ້ນ​ສັນ​ຍາ​ວ່າ ຕະຫຼອດ​ໄລ​ຍະ​ປະ​ຕິ​ບັດ​ໜ້າ​ທີ່​ຂອງ​ຕົນ ​ຢູ່ ສ​ປປ ລາວ, ​ຈະເຮັດສຸດ​ຄວາມ​ສາ​ມາດເພື່ອ​ເຮັດ​ໃຫ້​ສາຍ​ພົວ​ພັນ​ມິດ​ຕະ​ພາບ​, ຄວາມ​ສາ​ມັກແບບ​ພິ​ເສດ ແລະ ການ​ຮ່ວມ​ມື​ຮອບ​ດ້ານລະ​ຫວ່າງ​ສອງ​ປະ​ເທດ​ ​ຈະ​ເລີນງອກ​ງາມຍິ່ງໆ​ຂຶ້ນ, ປະກອບສ່ວນເຂົ້າໃນການຮັດແໜ້ນການພົວພັນມິດຕະພາບ, ການສ້າງສາພັດທະນາຂອງສອງປະເທດ, ການຮ່ວມມືທີ່ມີໝາກຜົນໃນດ້ານເສດຖະກິດ, ການຄ້າ, ການລົງທືນ; ການຮ່ວມມືໃນດ້ານປ້ອງກັນຊາດປ້ອງກັນຄວາມສະຫງົບ ແລະ ອື່ນໆ ໃຫ້ນັບມື້ນັບດີຂຶ້ນ.