ໃນວັນທີ 17 ກຸມພາ 2017, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນກາມິດຕະພາບ ໃຫ້ແກ່ ທ່ານ ໂຮສ໌ ເສເຣທອນ (Hos Sereythonh), ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງ ຣາຊະອານາຈັກ ກຳປູເຈຍ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ທີ່ສຳເລັດການປະຕິບັດໜ້າທີ່ການທູດ ຢູ່ ສປປ ລາວ ເພື່ອເປັນການຍ້ອງຍໍຊົມເຊີຍຜົນງານທີ່ ທ່ານທູດ ໄດ້ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ 2 ປະເທດ ໃນໄລຍະເວລາ 3 ປີ. ໃນໂອກາດນີ້, ທ່ານທູດ ໄດ້ກ່າວສະແດງຄວາມຂອບໃຈຢ່າງສູງ ຕໍ່ລັດຖະບານ ກໍຄືກະຊວງການຕ່າງປະເທດ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອ ແລະ ອຳນວນຄວາມສະດວກຕະຫຼອດໄລຍະການປະຕິບັດໜ້າທີ່ວກງານການທູດຂອງທ່ານ ຢູ່ ສປປ ລາວ ຈົນປະສົບຜົນສຳເລັດເປັນຢ່າງດີ.

ໃນຕະຫຼອດໄລຍະ 3 ປີຜ່ານມາ, ທ່ານ ໂຮສ໌ ເສເຣທອນ ໄດ້ເອົາໃຈໃສ່ເຄື່ອນໄຫວວຽກງານການທູດຢ່າງຫ້າວຫັນ ເພື່ອເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີ ແລະ ການຮ່ວມມື ລະຫວ່າງ ປະຊາຊົນສອງປະເທດ ລາວ-ກຳປູເຈຍ, ຕັ້ງໜ້າປະກອບສ່ວນເຂົ້າໃນການຊຸກຍູ້ໃຫ້ມີການແລກປ່ຽນການຢ້ຽມຢາມຊຶ່ງກັນ ແລະ ກັນ ຂອງການນຳຫຼາຍລະດັບຂອງພັກ, ລັດ, ສະພາ ແລະ ວິຊາການຂັ້ນຕ່າງໆ ເປັນຈຳນວນຫຼາຍຄະນະ, ໂດຍສະເພາະຢ່າງຍິ່ງແມ່ນການຈັດຕັ້ງພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 60 ປີ ລະຫວ່າງ ລາວ ແລະ ກຳປູເຈຍ ຢູ່ ນະຄອນຫຼວງວຽງຈັນ, ຊຸກຍູ້ໃຫ້ທ່ານນາຍົກລັດຖະມົນຕີ ກຳປູເຈຍ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28 ແລະ 29 ທີ່ ສປປ ລາວ ເປັນເຈົ້າພາບ, ຊຸກຍູ້ໃຫ້ ທ່ານນາຍົກລັດຖະມົນຕີ ສປປ ລາວ ເຂົ້າຮ່ວມກອງປະຊຸມສຸດຍອດ CLV ຢູ່ແຂວງຊຽມຣຽມ ຣາຊະອານາຈັກ ກຳປູເຈຍ ແລະ ອື່ນໆ.

ນອກນີ້, ທ່ານທູດ ຍັງໄດ້ປະກອບສ່ວນໃນການຊຸກຍູ້ການຮ່ວມມືໃນດ້ານຕ່າງໆເຊັ່ນ: ດ້ານວັດທະນະທຳ-ສັງຄົມ, ປ້ອງກັນຊາດ-ປ້ອງກັນຄວາມສະຫງົບ, ໂດຍສະເພາະແມ່ນວຽກງານຊາຍແດນ ທີ່ເຫັນວ່າຕະຫຼອດໄລຍະ 3-4 ປີ ມານີ້, ມີຫຼາຍອັນກ້າວໜ້າ ເປັນຕົ້ນວ່າ: ການເປີດສະຖານກົງສູນໃຫຍ່ຂອງ ສປປ ລາວ ທີ່ແຂວງຊຽງແຕງ, ຣາຊະອານາຈັກ ກຳປູເຈຍ ແລະ ສະຖານກົງສູນໃຫຍ່ຂອງ ກຳປູເຈຍ ທີ່ແຂວງຈຳປາສັກ ສປປ ລາວ, ໂດຍການເຂົ້າຮ່ວມຂອງສອງນາຍົກລັດຖະມົນຕີ ແລະ ສອງຝ່າຍສາມາດເປີດນຳໃຊ້ໜັງສືຜ່ານແດນຮ່ວມກັນ ຊຶ່ງເລີ່ມນຳໃຊ້ແຕ່ວັນທີ 1 ມັງກອນ 2017 ເປັນຕົ້ນມາ.