ທ່ານ ສະເຫຼີມ ໄຊກົມມະສິດ, ລັດຖະມົນຕີກະຊວງການຕ່າງປະເທດ ໄດ້ນຳພາຄະນະຜູ້ແທນ ແຫ່ງ ສປປ ລາວ ເຂົ້າຮ່ວມກອງປະຊຸມວົງແຄບ ຂອງລັດຖະມົນຕີຕ່າງປະເທດອາຊຽນ ພາຍໃຕ້ການເປັນເຈົ້າພາບ ແລະ ປະທານ ຂອງ ຟີລິປີນ ໃນຕອນເຊົ້າຂອງວັນທີ 21 ກຸມພາ 2017 ທີ່ ໂບຣາຄາຍ, ຟີລິບປີນ.

         ກອງປະຊຸມວົງແຄບຂອງລັດຖະມົນຕີຕ່າງປະເທດອາຊຽນຄັ້ງນີ້ ເປັນກອງປະຊຸມເປີດສາກການເປັນປະທານ ອາຊຽນ ຂອງ ຟີລິບປີນ ໃນປີ 2017 ພາຍໃຕ້ຄຳຂວັນ: “ຮ່ວມມືເພື່ອການປ່ຽນແປງ, ຜູກພັນກັບສາກົນ” ຊຶ່ງໃນໂອກາດນີ້, ຟີລິບປີນ ໄດ້ແຈ້ງ 6 ບູລິມະສິດ ສໍາລັບການເປັນປະທານອາຊຽນຂອງຕົນ ໃນປີ 2017 ຊຶ່ງປະກອບມີ: 1) ປະຊາຄົມອາຊຽນຕາມທິດປະຊາຊົນ, ປະຊາຊົນເປັນແກນກາງ, 2) ສັນຕິພາບ ແລະ ສະຖຽນລະພາບໃນພາກພື້ນ, 3) ຄວາມໝັ້ນຄົງ ແລະ ການຮ່ວມມືທາງທະເລ, 4) ການພັດທະນາແບບກວມລວມ ແລະ ນຳໃຊ້ນະວັດຕະກຳ, 5) ອາຊຽນທີ່ເພິ່ງພາຕົນເອງ, ແລະ 6) ອາຊຽນເປັນຕົວແບບຂອງການຮ່ວມມືພາກພື້ນ ແລະ ບົດບາດຂອງອາຊຽນ ໃນເວທີສາກົນ. ປີ 2017 ເປັນປີຄົບຮອບ 50 ປີຂອງການສ້າງຕັ້ງອາຊຽນ, ກອງປະຊຸມຈຶ່ງໄດ້ປຶກສາຫາລື ກ່ຽວກັບ ການຈັດກິດຈະກໍາສະເຫຼີມສະຫລອງວັນທີ່ສຳຄັນດັ່ງກ່າວ ໃນລະດັບພາກພື້ນ ແລະ ໃນປະເທດສະມາຊິກອາຊຽນ. ນອກນັ້ນ, ບັນດາລັດຖະມົນຕີຕ່າງປະເທດອາຊຽນໄດ້ປຶກສາຫາລື ກ່ຽວກັບ ການຜັນຂະຫຍາຍບັນດາຜົນຂອງກອງປະ ຊຸມສຸດຍອດອາຊຽນ ຄັ້ງທີ 28 ແລະ 29 ທີ່ຈັດຂື້ນ ຢູ່ ສປປ ລາວ ໃນຕົ້ນເດືອນກັນຍາ 2016 ທີ່ຜ່ານມາ. ກອງປະຊຸມຍັງໄດ້ປຶກສາຫາລື ກ່ຽວກັບ ການພົວພັນພາຍນອກຂອງອາຊຽນ ຊຶ່ງໃນປີນີ້ ຈະມີການຈັດກອງປະຊຸມສຸດຍອດ ສະເຫຼີມສະຫຼອງຄົບຮອບ 40 ປີ ແຫ່ງການພົວພັນຮ່ວມມື ລະຫວ່າງ ອາຊຽນ ກັບ ສະຫະລັດອາເມລິກາ, ການາດາ ແລະ ອີຢູ ແລະ ຄົບຮອບ 25 ປີ ແຫ່ງການພົວພັນຮ່ວມມື ອາຊຽນ ກັບ ອິນເດຍ ແລະ ໄດ້ຢ້ຳເຖີງ ຄວາມສຳຄັນຂອງການສືບຕໍ່​​ຮັດ​ແໜ້ນການ​ພົວພັນ​ກັບ​ພາຍ​ນອກ ໂດຍການ​ສົ່ງເສີມບັນດາກົນ​ໄກ​ທີ່​ອາຊຽນສ້າງຕັ້ງຂຶ້ນ ໃຫ້ເຂັ້ມແຂງ ​ແລະ ຍຶດໝັ້ນຄວາມ​ເປັນ​ແກນ​ກາງ​ຂອງອາຊຽນ. ພ້ອມນີ້, ກອງປະຊຸມໄດ້ແລກປ່ຽນຄຳຄິດຄຳເຫັນ ຕໍ່ບັນຫາພາກພື້ນ ແລະ ສາກົນທີ່ມີຄວາມສົນໃຈ ແລະ ເປັນຫ່ວງຮ່ວມກັນ ທີ່ສືບຕໍ່ມີການ​ປ່ຽນ​ແປງ​ຢ່າງ​ໄວວາ​ ແລະ ບໍ່​​​ສາມາດກະຕວງໄດ້ ຊຶ່ງອາຊຽນຕ້ອງໄດ້ຕິດຕາມຢ່າງໃກ້ຊິດ.

   ໃນໂອກາດດັ່ງກ່າວນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈ ຕໍ່ບັນດາປະເທດສະມາຊິກອາຊຽນ ທີ່ໄດ້ໃຫ້ການສະໜັບສະໜູນ ແລະ ຮ່ວມມືຢ່າງໃກ້ຊິດແກ່ ສປປ ລາວ ໃນການເປັນປະທານອາຊຽນ ໃນປີ 2016 ຊຶ່ງໄດ້ສຳເລັດລົງດ້ວຍໝາກຜົນຢ່າງຈົບງາມ. ພ້ອມນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ຍັງໄດ້ຊຸກຍູ້ໃຫ້ຂະແໜງການກ່ຽວຂ້ອງ ຂອງເສົາຄໍ້າການເມືອງ-ຄວາມຫມັ້ນຄົງອາຊຽນ ເພີ່ມທະວີຄວາມພະຍາຍາມ ໃນການຈັດຕັ້ງປະຕິບັດ ແຜນແມ່ບົດປະຊາຄົມການເມືອງ-ຄວາມຫມັ້ນຄົງອາຊຽນ 2025 ແລະ ຢໍ້າເຖິງ ຄວາມສໍາຄັນຂອງແຜນວຽກຂໍ້ລິເລີ້ມເພື່ອການເຊື່ອມໂຍງອາຊຽນ ສະບັບທີ່ 3 ແລະ ແຜນແມ່ບົດ ເພື່ອການເຊື່ອມຈອດອາຊຽນ 2025 ຊຶ່ງ 2 ເອກະສານດັ່ງກ່າວ ແມ່ນສ່ວນຫນຶ່ງຂອງວິໄສທັດປະຊາຄົມອາຊຽນ 2025 ແລະ ມີລັກສະນະກວມລວມທັງສາມເສົາຄໍ້າ. ໃນຕອນທ້າຍ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຢໍ້າວ່າ ໃນທ່າມກາງທີ່ສະພາບແວດລ້ອມພາກພື້ນ ແລະ ສາກົນພວມຜັນແປທີ່ບໍ່ສາມາດກະຕວງໄດ້, ອາຊຽນຄວນສືບຕໍ່ ຄວາມພະຍາຍາມ ໃນການສົ່ງເສີມປະຊາຄົມອາຊຽນໃຫ້ເຂັ້ມແຂງ ໂດຍຍຶດຫມັ້ນໃນບັນດາຫລັກການພື້ນຖານ ຂອງອາຊຽນ, ແລະ ສົ່ງເສີມຄວາມສາມັກຄີ ແລະ ຄວາມເປັນແກນກາງຂອງອາຊຽນ ໃນການພົວພັນກັບພາຍນອກ ແລະ ໃນໂຄງສ້າງພາກພື້ນທີ່ພວມຜັນແປ.

        ກ່ອນການຈັດກອງປະຊຸມວົງແຄບ ຂອງລັດຖະມົນຕີຕ່າງປະເທດອາຊຽນ ໄດ້ມີກອງປະຊຸມຂອງຄະນະກຳມະການ ຜູ້ຕາງໜ້າຖາວອນປະຈຳອາຊຽນ ແລະ ກອງປະຊຸມເຈົ້າໜ້າທີ່ອາວຸໂສອາຊຽນ ໃນວັນທີ 19 ແລະ 20 ກຸມພາ 2017 ຕາມລຳດັບ.