ໃນ​ຕອນ​ບ່າຍຂອງວັນ​ທີ 09 ມີນາ ​ທີ່​ຜ່ານ​ມານີ້, ທ່ານ ສະເຫລີມໄຊ ກົມມະສິດ, ກຳມະການສູນກາງພັກ, ລັດຖະມົນຕີວ່າການກະຊວງການຕ່າງປະເທດ, ໄດ້​ພົບ​ປະ ແລະ ໂອ້ລົມ ​ກັບ​ບັນ​ດາ​ພະ​ນັກ​ງານ​ຂອງ​ສະ​ຖານ​ທູດ ສປປ ລາວ ທີ່ ບາງກອກ, ແລະ ນັກສຶກສາລາວ ທີ່ກຳລັງສຶກສາຮ່ຳຮຽນ ທີ່ ຣາຊາອານາຈັກໄທ, ເນ່ື່ອງໃນໂອກາດທີ່ທ່ານເດີນທາງເຂົ້າຮ່ວມ ກອງປະຊຸມປະຈຳປີດ້ານການບໍລິຫານໃນສ່ວນພູມີພາກ ຂອງອົງການສະຫະປະຊາຊາດເພື່ອການພັດທະນາ ໃນເຂດ ອາຊີ-ປາຊີຟິກ ໂດຍມີຜູ້ເຂົ້າຮ່ວມທັງໝົດ 60 ກວ່າຄົນ.

ໃນ​ໂອ​ກາດ​​ນີ້, ທ່ານ ສະເຫລີມໄຊ ກົມມະສິດ ໄດ້​ແຈ້ງ​ສະ​ພາບ​ການ​ ກ່ຽວ​ກັບ​ ການພັດ​ທະ​ນາ​ເສດ​ຖະ​ກິດ​-ສັງ​ຄົມ ຂອງ​ປະ​ເທດ​ລາວ ແລະ ສະພາບ​ການອັນ​ພົ້ນ​ເດັ່ນຂອງໂລກ​ ໃຫ້​ພະ​ນັກ​ງານ​ສະ​ຖານ​ທູດ​ຮັບ​ຊາບ. ນອກ​ຈາກນັ້ນ, ທ່ານ​ຍັງ​ໄດ້​ຕີ​ລາ​ຄາ​ສູງ​ຕໍ່​ຜົນ​ງານ​ຂອງ​ບັນ​ດາ​ອ້າຍ​ນ້ອງ​ພະ​ນັກ​ງານ ​ທີ່​ໄດ້​ປະ​ກອບ​ສ່ວນ​ແກ່​ວຽກ​ງານ​ຂອງ​ສະ​ຖານ​ທູດ​ ໃນ​ໄລ​ຍະ​ຜ່ານ​ມາ ໃນ​ການ​ເຮັດ​ໜ້າ​ທີ່​ເປັນ​ເສ​ນາ​ທິ​ການ​ໃຫ້​ຂັ້ນ​ເທິງ​ໄດ້​ເປັນ​ຢ່າງ​ດີ ແລະ ຮຽກ​ຮ້ອງ​ໃຫ້​ພະ​ນັກ​ງານ​ທັງ​ໝົດ ຈົ່ງມີ​ສະ​ຕິ ແລະ ມີຄວາມຮັບຜິດຊອບສູງຕໍ່ວຽກງານທີ່ໄດ້ຮັບມອບໝາຍ ແລະ ​ກຳ​ແໜ້ນ​ແນວ​ທາງ​ນະ​ໂຍ​ບາຍ​ຂອງ​ພັກ ເປັນຕົ້ນແນວທາງການຕ່າງປະເທດໃນໄລຍະໃໝ່ ແລະ ມີ​ຄວາມ​ສາ​ມັກ​ຄີປຸ້ມລຸມ​ຮັກ​ແພງ​ກັນ.

ສ່ວນບັນຫາການກໍ່ສ້າງຊັບພະຍາກອນມະນຸດນັ້ນ, ທ່ານ ສະເຫລີມໄຊ ກົມມະສິດ ໄດ້ແນະນຳໃຫ້ບັນດານັກຮຽກນັກສຶກ ທີ່ກຳລັງຮຽນທີ່ປະເທດໄທ ຈົ່ງມີສະຕິຊາດ, ເອົາໃຈໃສ່ຕໍ່ການຮຽນໄປພ້ອມໆກັບການເຜີຍແຜ່ຮີດຄອງປະເພນີອັນດີງາມຂອງຊາດລາວເຮົາ.

ໃນວາລະສຸດທ້າຍຂອງການໂອ້ລົມ, ທ່ານ ຫລີ ບຸນຄ້ຳ ໄດ້ກ່າວສະແດງຄວາມຂອບໃຈຕໍ່ຄວາມເປັນຫ່ວງເປັນໃຍ ຂອງການນຳກະຊວງການຕ່າງປະເທດ ທີ່ໄດ້ໃຫ້ຄວາມສຳຄັນໃນການຊຸກຍູ້ການປະຕິບັດວຽກງານຂອງພັກ-ລັດ ໃຫ້ດຳເນີນໄປຢ່າງຖືກທິດ ແລະ ໃຫ້ຄຳປະຕິຍານວ່າ ສະຖານທູດຈະປະຕິບັດຕາມທຸກການຊີ້ນຳຂອງທ່ານລັດຖະມົນຕີ ເພື່ອໃຫ້ວຽກງານການນຳຂອງພັກ ແລະ ການຄຸ້ມຄອງລັດ ນັບມື້ນັບມີຄຸນນະພາບໃໝ່ ແລະ ເກີດໝາກເກີດຜົນເຖິງທີ່ສຸດ.