ໃນ​ວັນ​ທີ 25 ເມ​ສາ 2017 ທີ່​ຜ່ານ​ມາ, ທ່ານສະ​ເຫຼີມ​ໄຊກົມ​ມະ​ສິດ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ, ໄດ້​ຮັບ​ການ​ເຊື້ອ​ເຊີນຈາກ ສູນ Jeffrey Sachs ເພື່ອ​ການ​ພັດ​ທະ​ນາ​ແບບ​ຍືນ​ຍົງ, ປະ​ເທດ​ມາ​ເລ​ເຊຍ, ໃຫ້​ເປັນ​ແຂກ​ກິດ​ຕິ​ມະ​ສັກ ​ເພື່ອ​ມີ​ຄຳ​ເຫັນ ​ຕໍ່​ກອງ​ປະ​ຊຸມສຳ​ມະ​ນາ​ ກ່ຽວ​ກັບ ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ ຢູ່​ພາກ​ພື້ນ​ອາ​ຊີຕາ​ເວັນ​ອອກ​ສ່ຽງ​ໃຕ້ເຊິ່ງ​ໄດ້​ຈັດ​ຂື້ນ​ພາຍ​ໃຕ້​ຫົວ​ຂໍ້ “ການ​ກຳ​ນົດ​ທິດ​ທາງແລະທ່າ​ແຮງເພື່ອ​ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ​ໃນ​ອາ​ນະ​ຄົດ”.

ໃນ​ໂອ​ກາດ​ດັ່ງ​ກ່າວ, ທ່ານ​ລັດ​ຖະ​ມົນ​ຕີຕ່າງ​ປະ​ເທດ ສ​ປ​ປ​ລາວ ໄດ້​ຊີ້​ໃຫ້​ເຫັນ​ຄວາມ​ໝາຍ​​ສຳ​ຄັນ​ຂອງ​ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍການພັດທະນາແບບຍືນຍົງ (SDGs)ພ້ອມ​ທັງ​ຕີ​ລາ​ຄາ​ຄືນສະ​ພາບ​ຄວາມ​ຄືບ​ໜ້າ ແລະ ສິ່ງ​ທ້າ​ທາຍ​ຕ່າງໆ ໂດຍ​ລວມ​ໃນ​ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ດັ່ງ​ກ່າວໃນ​ລະ​ດັບ​ສາ​ກົນ, ໂດຍ​ສະ​ເພາະ​ຢູ່ພາກພື້ນອາ​ຊີຕາ​ເວັນ​ອອກ​ສ່ຽງ​ໃຕ້(ອາ​ຊຽນ). ​ທ່ານ ລັດ​ຖະ​ມົນ​ຕີ​ໄດ້​ເນັ້ນ​ໃຫ້​ເຫັນເຖິງຄວາມ​ສຳ​ຄັນ​ຂອງການ​ເພີ່ມ​ທະ​ວີ​ການ​ຮ່ວມ​ມື​ ລະ​ຫວ່າງ​​ປະ​ເທດ​ສະ​ມາ​ຊິກ​ອາ​ຊຽນເພື່ອ​​ພ້ອມ​ກັນ​ຫັນ​ວິ​ໄສ​ທັດ​ປະ​ຊາ​ຄົມ​ອາ​ຊຽນ​ແຕ່​ນີ້​ຮອດ​ປີ 2025 ທີ່​ປະ​ກອບ​ດ້ວຍ​ສາມ​ເສົາ​ຄ້ຳ​ ໃຫ້​ປະ​ກົດ​ຜົນ​ເປັນ​ຈິງເຊິ່ງຈະ​ເປັນ​ການ​ປະ​ກອບ​ສ່ວນ​ທີ່​ສຳ​ຄັນແລະ  ຊຸກ​ຍູ້​ໃຫ້​ມີ​ການ​ເລັ່ງ​ລັດ​ການ​ບັນ​ລຸ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ​ໃນ​ລະ​ດັບ​ພາກ​ພື້ນເນື່ອງ​ຈາກວ່າ​ບັນ​ດາ​ເປົ້າ​ຫມາຍຂອງ​ວຽກ​ງານ​ໃນ​ສາມ​ເສົ້າ​ຄ້ຳ​ປະ​ຊາ​ຄົມ​ອາ​ຊຽນ ແມ່ນ​ມີ​ຄວາມ​ສອດ​ຄ່ອງ ​ກັບວາ​ລະ​ການ​ພັດ​ທະ​ນາ​ແບບ​ຍືນ​ຍົງ 2030 ຂອງ​ສາ​ກົນເປັນ​ຕົ້ນການ​ລຶບ​ລ້າງ​ຄວາມ​ທຸກ​ຍາກ, ການ​ປົກ​ປັກ​ຮັກ​ສາແລະ​ການນຳ​ໃຊ້​ຊັບ​ພະ​ຍາ​ກອນ​ທຳ​ມະ​ຊາດ​ຢ່າງ​ມີປະ​ສິດ​ທິ​ຜົນ ແລະ ຍືນ​ຍົງ, ການ​ກຽມ​ພ້ອມຮັບ​ມື​ກັບ​ສະ​ພາບ​ການ​ປ່ຽນ​ແປງ​ຂອງດິນ​ຟ້າ​ອາ​ກາດ, ການ​ປັ​ບ​ປຸງແລະພັດ​ທະ​ນາ​ພື້ນ​ຖານ​ໂຄງ​ລ່າງແລະ ​ການ​ພັດ​ທະ​ນາ​ໂດຍ​ການ​ມີ​ສ່ວນ​ຮ່ວມແລະການຮັບປະກັນໃຫ້​ທຸກ​ຄົນໄດ້​ຮັບ​ຜົນ​ປະ​ໂຫຍດຈາກ​ການ​ພັດ​ທະ​ນາ​ຢ່າງ​ທົ່ວ​ເຖິງ​ກັນ. ນອກ​ນັ້ນ, ທ່ານລັດະ​ຖະ​ມົນ​ຕີຍັງ​ໄດ້​ ຍົກ​ໃຫ້​ເຫັນຄວາມ​ໝາຍ​ໝັ້ນທາງການເມືອງຂອງລັດ​ຖະ​ບານລາວໃນ​ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍການ​ພັດ​ທະ​ນາ​ແບບ​ຍືນ​ຍົງຂອງ​ສາ​ກົນເຊິ່ງໄດ້​ຜັນ​ຂະ​ຫຍາຍ​ເຂົ້າ​ໃນ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ແຫ່ງ​ຊາດ ແລະ ໄດ້​ສ້າງ​ຕັ້ງ​ຄະ​ນະ​ຊີ້​ນຳ​ລະ​ດັບ​ຊາດ​ເພື່ອ​ການ​ຈັດ​ຕັ້ງ​ປະ​ຕິ​ບັດ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງໂດຍພາຍ​ໃຕ້​ການ​ເປັນ​ປະ​ທານ​ຂອງພະ​ນະ​ທ່ານນາ​ຍົກ​ລັດ​ຖະ​ມົນ​ຕີທອງ​ລຸນສີ​ສຸ​ລິດ. ນອກ​ຈາກນັ້ນ ສ​ປ​ປ​ລາວ ຍັງ​ໄດ້​ຖືກ​ເລືອກ​ໃຫ້​ເປັນຫນຶ່ງໃນບັນດາ​ປະ​ເທດ​ຕົວ​ແບບ (PILOT COUNTRY) ເພື່ອຈັດຕັ້ງປະຕິບັ​ດເປົ້າຫມາຍ SDGs ຢູ່ພາກພື້ນອາຊີ. ໃນຕອນ​ທ້າຍ, ທ່ານ​ ສະ​ເຫຼີມ​ໄຊກົມ​ມະ​ສິດ​ ກໍ​ໄດ້ຕອບຄໍາຖາມຈາກຜູ້ເຂົ້້າຮ່ວມ ແລະ ​ເນັ້ນ​ໜັກ​ເຖີງ​ຄວາມ​ສຳ​ຄັນຂອງການ​ຟື້ນ​ຟູການ​ເປັນ​ຄູ່​ຮ່ວມ​ມື​​ທີ່​ດີເພື່ອ​ສະ​ໜັບ​ສະ​ໜູນແລະຊຸກ​ຍູ້​ສົ່ງ​ເສີມເຊິ່ງ​ກັນແລະກັນໃນ​ການ​ບັນ​ລຸ​ຄາດ​ໝາຍແລະບູ​ລິມ​ະ​ສິດ​ດ້ານການພັດທະນາ ທີ່ອີງໃສ່ສະພາບຈຸດພິເສດສະເພາະຂອງ​ແຕ່​ລະ​ປະ​ເທດ​ເພື່ອ​ພ້ອມ​ກັນ​ບັນ​ລຸເປົ້າ​ໝາຍການພັດ​ທະ​ນາໃນ​ລະ​ດັບ​ພາກ​ພື້ນແລະວາ​ລະ​ການພັດທະນາຂອງສາ​ກົນ. ເຂົ້າຮ່ວມມີຄໍາເຫັນໃນພາກເປີດ ກອງປະຊຸມສໍາມະນາດັ່ງກ່າວ ຍັງປະກອບມີລັດຖະມົນຕີຮັບຜິດຊອບວຽກງານວາງແຜນເສດຖະກິດມາເລເຊຍ, ລັດຖະມົນຕີຮັບຜິດ ຊອບແຜນການພັດທະນາແຫ່ງຊາດ ອິນໂດເນເຊຍ, ລັດຖະມົນຕີວາງແຜນເສດຖະກິດ ຟິລິປິນ, ສາດສະດາຈານ ເຈຟຣີ ແຊັກສ ຈາກມະຫາວິທະຍາໄລ ໂຄລໍາເບຍ, ສ. ອາເມລິກາ, ທີ່ປຶກສາພິເສດຂອງເລຂາທິການໃຫຍ່ ສປຊ ດ້ານການພັດທະນາແບບຍືນຍົງ. ກອງປະຊຸມສໍາມະນາດັ່ງກ່າວຈະດໍາເນີນເປັນໄລຍະເວລາ 2 ວັນ ເພື່ອເປີດໂອກາດໃຫ້ບັນດານັກຄົ້ນຄວ້າດ້ານການພັດທະນາທີ່ມີຜົນງານແລະຊື່ສຽງ ຢູ່ພາກພື້ນ ແລະ ສາກົນ ໄດ້ແລກປ່ຽນບົດຮຽນ ນໍາກັນ ໂດຍສະເພາະກ່ຽວກັບຜົນສໍາເລັດ ແລະ ສິ່ງທ້າທາຍຂອງປະເທດຕ່າງໆ ໃນການປະຕິບັດເປົ້າຫມາຍການພັດທະນາຂອງສາກົນ.