ທ່ານ ລມຕ ຢ້ຽມຂ່ຳນັບ ພະນະທ່ານ ປະທານາທິບໍດີ ອາເລັກຊານເດີ ວານເດີ ເບນເລັນ (Alexander Van der Bellen) ແຫ່ງ ສ. ໂອຕຣິສ໌

ທ່ານ ລມຕ ພົບປະກັບ ທ່ານ ເຊບັດທຽນ ຄວກສ໌, ລັດຖະມົນຕີກິດຈະການເອີຣົບ, ການເຊື່ອມໂຍງ ແລະ ການຕ່າງປະເທດ ແຫ່ງ ສ. ໂອຕຣິສ໌

ໂດຍຕອບສະໜອງຕາມຄຳເຊີນຂອງ ທ່ານ ເຊບັດທຽນ ຄວກສ໌ (Sebastian Kurz), ລັດຖະມົນຕີກິດຈະການເອີຣົບ, ການເຊື່ອມໂຍງ ແລະ ການຕ່າງປະເທດ ແຫ່ງ ສາທາລະນະລັດ ໂອຕຣິສ໌, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ພ້ອມດ້ວຍຄະນະ ໄດ້ດຳເນີນການຢ້ຽມຢາມ ສ. ໂອຕຣິສ໌ ຢ່າງເປັນທາງການ, ໃນລະຫວ່າງວັນທີ 28-29 ພຶດສະພາ 2017, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ສ. ໂອຕຣິສ໌. ການຢ້ຽມຢາມຄັ້ງນີ້ ແມ່ນເຫດການສໍາຄັນໜຶ່ງ ສໍາລັບສອງປະເທດ ລາວ ແລະ ໂອຕຣິສ໌ ທີ່ມີຂຶ້ນໃນໂອກາດທີ່ສອງປະເທດ ພວມສະຫຼອງວັນຄົບຮອບ 50 ປີ ແຫ່ງການສ້າງຕັ້ງສາຍພົວພັນການທູດນໍາກັນ.

ໃນຕອນເຊົ້າຂອງວັນທີ 29 ພຶດສະພາ 2017, ທ່ານລັດຖະມົນຕີ ສະເຫຼີມໄຊ ກົມມະສິດ ແລະ ຄະນະ ໄດ້ເຂົ້າຢ້ຽມຂ່ຳນັບ ພະນະທ່ານ ອາເລັກຊານເດີ ວານເດີ ເບນເລັນ (Alexander Van der Bellen), ປະທານາທິບໍດີ ແຫ່ງ ສ. ໂອຕຣິສ໌, ທີ່ ທຳນຽບປະທານາທິບໍດີ ຢູ່ ນະຄອນຫຼວງວຽນນາ. ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈ ຕໍ່ ປະທານາທິບໍດີໂອຕຣິສ໌ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ພ້ອມທັງໄດ້ນຳເອົາຄວາມຢື້ຢາມຖາມຂ່າວ ຈາກ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ມາເຖິງ ພະນະທ່ານ ປະທານາທິບໍດີ ໂອຕຣິສ໌. ໃນການພົບປະໂອ້ລົມ, ທັງສອງຝ່າຍ ໄດ້ມີການແລກປ່ຽນຄຳເຫັນກັນ ກ່ຽວກັບ ສະພາບພາຍໃນຂອງກັນ ແລະ ກັນ, ຊຶ່ງປະທານາທິບໍດີ ໂອຕຣິສ໌ ໄດ້ໃຫ້ຄວາມສົນໃຈ ຕໍ່ການສ້າງສາພັດທະນາ ຂອງ ສປປ ລາວ ໂດຍເຫັັນວ່າ ສາມາດບັນລຸໄດ້ຄວາມກ້າວໜ້າ ແລະ ຜົນສໍາເລັດຫຼາຍຢ່າງ, ຈາກການທີ່ເພິ່ນເອງ ກໍເຄີຍໄດ້ມີໂອກາດມາຢ້ຽມຢາມລາວ ໃນກ່ອນໜ້ານີ້.

ໃນຕອນບ່າຍຂອງວັນດຽວກັນ, ທ່ານລັດຖະມົນຕີ ສະເຫຼີມໄຊ ກົມມະສິດ ພ້ອມດ້ວຍຄະນະ ໄດ້ພົບປະສອງຝ່າຍ ກັບ ທ່ານ ເຊບັດທຽນ ຄວກສ໌, ລັດຖະມົນຕີກິດຈະການເອີຣົບ, ການເຊື່ອມໂຍງ ແລະ ການຕ່າງປະເທດ ແຫ່ງ ສ. ໂອຕຣິສ໌ ແລະ ຄະນະ, ທີ່ ກະຊວງການຕ່າງປະເທດ ໂອຕຣິສ໌. ໃນການພົບປະຄັ້ງນີ້, ສອງຝ່າຍໄດ້ທົບທວນ ແລະ ຕີລາຄາສູງຕໍ່ ສາຍພົວພັນ ແລະ ການຮ່ວມມືທີ່ດີ ລະຫວ່າງສອງປະເທດ ນັບຕັ້ງແຕ່ໄດ້ສ້າງສາຍພົວພັນການທູດນຳກັນ ໃນວັນທີ 01 ກັນຍາ 1967 ຈົນເຖິງປັດຈຸບັນ ຄົບຮອບ 50 ປີ ພໍດີ. ທັງສອງຝ່າຍ ຍັງໄດ້ມີຄວາມມຸ້ງຫວັງ ທີ່ຈະສືບຕໍ່ເສີມຂະຫຍາຍການພົວພັນຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການສຶກສາ-ວັດທະນະທຳ, ການຮ່ວມມືດ້ານການພັດທະນາ ແລະ ອື່ນໆ ທີ່ສອງປະເທດມີທ່າແຮງບົ່ມຊ້ອນ. ພ້ອມກັນນັ້ນ, ສອງຝ່າຍ ຍັງໄດ້ແລກປ່ຽນຄຳຄິດຄຳເຫັນ ກ່ຽວກັບ ສະພາບການທີ່ພົ້ນເດັ່ນ ໃນພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ໃນການພົບປະສອງຝ່າຍ, ທ່ານລັດຖະມົນຕີ ສະເຫຼີມໄຊ ໄດ້ສະແດງຄວາມຍິນດີຕໍ່ ທ່ານລັດຖະມົນຕີ ເຊບັດທຽນ ຄວກສ໌ ທີ່ໄດ້ຖືກແຕ່ງຕັ້ງໃຫ້ເປັນ ປະທານພັກປະຊາຊົນໂອຕຣິສ໌, ໃນວັນທີ 14 ພຶດສະພາ 2017, ທັງນີ້ກໍເພື່ອເປັນການກະກຽມໃຫ້ແກ່ການເລືອກຕັ້ງທົ່ວໄປ ທີ່ຈະມີຂຶ້ນໃນມໍ່ໆນີ້, ແລະ ໄດ້ສະແດງຄວາມຂອບໃຈຕໍ່ລັດຖະບານໂອຕຣິສ໌ ທີ່ໄດ້ໃຫ້ການຮ່ວມມືສະໜັບສະໜູນແກ່ ສປປ ລາວ ໃນພາລະກິດສ້າງສາພັດທະນາປະເທດ ໃນໄລຍະຜ່ານມາ, ໂດຍສະເພາະການອະນຸມັດເງິນກູ້ຍືມດອກເບ້ຍຕໍ່າ ສໍາລັບການດໍາເນີນໂຄງການພັດທະນາ ໃນຫຼາຍຂະແຫນງການ, ເຊັ່ນ: ດ້ານສາທາລະນະສຸກ, ກະສິກໍາ, ການກໍ່ສ້າງໂຄງລ່າງພື້ນຖານ, ການສຶກສາ ແລະ ອື່ນໆ. ໃນຂະນະດຽວກັນ, ທ່ານ ສະເຫຼີມໄຊ ກົມມະສິດ ກໍໄດ້ເຊີນຊວນຊຸກຍູ້ໃຫ້ບັນດານັກທຸລະກິດຂອງໂອຕຣິສ໌ ມາຢ້ຽມຢາມ ສປປ ລາວ ເພື່ອສຶກສາເບິ່ງຄວາມອາດສາມາດໃນການລົງທຶນ ຢູ່ ສປປ ລາວ ໃນຂະແໜງທີ່ມີຄວາມສົນໃຈ, ພ້ອມທັງສະເໜີໃຫ້ມີການແລກປ່ຽນການຢ້ຽມຢາມຂອງ ຄະນະນັກທຸລະກິດ ລາວ-ໂອຕຣິສ໌ ເພື່ອເປັນການເປີດກວ້າງການຮ່ວມມືລະຫວ່າງກັນ. ໃນຕອນທ້າຍຂອງການພົບປະ, ທ່ານ ສະເຫຼີມໄຊ ກົມມະສິດ ໄດ້ເຊື້ອເຊີນ ທ່ານ ເຊບັດທຽນ ຄວກສ໌, ລັດຖະມົນຕີຕ່າງປະເທດ ໂອຕຣິສ໌ ເພື່ອດໍາເນີນການຢ້ຽມຢາມ ສປປ ລາວ ຢ່າງເປັນທາງການ ໃນໂອກາດ ແລະ ເວລາທີ່ເຫັນວ່າເໝາະສົມ.

ໂອຕຣິສ໌ ແມ່ນເປັນປະເທດທີ່ໃຫ້ການຮ່ວມມືຢ່າງຕັ້ງໜ້າ ໃນການສະໜອງເງິນກູ້ດອກເບ້ຍຕໍ່າ ໃຫ້ແກ່ ສປປ ລາວ ໃນມູນຄ່າເຖິງ 180 ກວ່າລ້ານ ເອີໂຣ ສໍາລັບໂຄງການທີ່ສໍາຄັນ ເຊັ່ນ: ການກໍ່ສ້າງ ແລະ ປັບປຸງຂະຫຍາຍໂຮງໝໍໃຫ້ທັນສະໄໝ, ການສ້າງຂົວ, ການນໍາເຂົ້າອຸປະກອນການແພດທີ່ທັນສະໄໝ ແລະ ອື່ນໆ, ຊຶ່ງມາຮອດປັດຈຸບັນ ໂຄງການສ່ວນໃຫຍ່ ໄດ້ປະຕິບັດສໍາເລັດໄປແລ້ວ.

ສປປ ລາວ ແລະ ໂອຕຣິສ໌ ໄດ້ມີສະພາບຈຸດພິເສດທີ່ຄ້າຍຄືກັນ: ເປັນປະເທດນ້ອຍ, ພົນລະເມືອງໜ້ອຍ ແລະ ບໍ່ມີຊາຍແດນຕິດກັບທະເລ ແຕ່ຫາກມີທ່າແຮງໃນການກາຍເປັນທາງຜ່ານເຊື່ອມຈອດທາງດ້ານເສດຖະກິດ ສໍາລັບບັນດາປະເທດໃກ້ຄຽງ. ໃນນັ້ນ ໂອຕຣິສ໌ ຍັງເປັນປະເທດທີ່ມີທ່າແຮງທາງດ້ານເສດຖະກິດ, ເປັນສູນກາງການເງິນຂອງຂົງເຂດ, ການທ່ອງທ່ຽວຂະຫຍາຍຕົວ ແລະ ອື່ນໆ. ດ້ານການພັດທະນາພະລັງງານໄຟຟ້າ, ໂອຕຣິສ໌ ໄດ້ມີການຮັກສາສິ່ງແວດລ້ອມດີ ໂດຍສະເພາະການປົກປັກຮັກສາຊັບພະຍາກອນນໍ້າ ໃນແມ່ນ້ຳ ດານູບ ແລະ ສາຂາຕ່າງໆ ເພື່ອຜະລິດພະລັງງານໄຟຟ້າ, ຊຶ່ງມີເຂື່ອນໄຟຟ້ານ້ຳລົ້ນ 09 ແຫ່ງ ຕາມລ້ອງແມ່ນໍ້າ ດານູບ, ພ້ອມທັງມີການຂະຫຍາຍລະບົບການຜະລິດໄຟຟ້າພະລັງງານລົມ ທີ່ເປັນພະລັງງານສະອາດ. ໃນໄລຍະຜ່ານມາ, ສປປ ລາວ ແລະ ໂອຕຣິສ໌ ໄດ້ໃຫ້ການສະໜັບສະໜູນ ເຊິ່ງກັນ ແລະ ກັນ ໃນການເຄື່ອນໄຫວຮ່ວມກັນ ຢູ່ໃນເວທີພາກພື້ນ ແລະ ສາກົນ.

ນອກຈາກນັ້ນ, ຄະນະຜູ້ແທນລາວ ໄດ້ເຄື່ອນໄຫວທັດສະນະສຶກສາເບິ່ງ ພື້ນຖານການຜະລິດ ແລະ ຢ້ຽມຊົມສະຖານທີ່ວັດທະນະທຳ ແລະ ປະຫວັດສາດ ຈໍານວນໜຶ່ງ ຂອງນະຄອນຫຼວງວຽນນາ.