ໃນໂອກາດເດີນທາງເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດ ຂອງ ອາຊີ (Future of Asia) ຄັ້ງທີ 23 ແຕ່ວັນທີ 05-06 ມິຖຸນາ 2017 ທີ່ຈັດໂດຍ ສໍານັກຂ່າວ ນິກເກ ຂອງ ຍີ່ປຸ່ນ. ໃນວັນທີ 05 ມິຖຸນາ 2017, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ຂຶ້ນກ່າວຄຳປາໄສ ຕໍ່ກອງປະຊຸມດັ່ງກ່າວ, ຊຶ່ງໄດ້ຮັບຄວາມສົນໃຈຈາກ ບັນດາຜູ້ເຂົ້າຮ່ວມກອງປະຊຸມ ເປັນຢ່າງຍິ່ງ. ຕໍ່ມາວັນທີ 07 ມິຖຸນາ 2017, ທ່ານນາຍົກລັດຖະມົນຕີ ໄດ້ທຳການຢ້ຽມຢາມຍີ່ປຸ່ນ ຢ່າງເປັນທາງການ, ຊຶ່ງພິທີຕ້ອນຮັບໄດ້ຈັດຂຶ້ນທີ່ ເຮືອນຮັບຮອງລັດຖະບານ ໂດຍສອງທ່ານນາຍົກໄດ້ຍ່າງກວດແຖວກອງກຽດຕິຍົດ, ພົບປະສຸດຍອດສອງຝ່າຍ, ຖະແຫລງຂ່າວຮ່ວມ ແລະ ງານລ້ຽງຮັບຮອງ ຕາມພິທີການຕ້ອນຮັບ ຂອງ ຝ່າຍຍີ່ປຸ່ນ.
ໃນການພົບປະສອງຝ່າຍ ແມ່ນເຕັມໄປດ້ວຍບັນຍາກາດອົບອຸ່ນ ແລະ ເຂົ້າອົກເຂົ້າໃຈຊຶ່ງກັນ ແລະ ກັນ, ໂດຍສອງຝ່າຍໄດ້ຕີລາຄາສູງ ຕໍ່ການເປັນຄູ່ຮ່ວມມືຍຸດທະສາດ ລະຫວ່າງ ສອງປະເທດ ທີ່ນັບມື້ນັບຂະຫຍາຍຕົວຂຶ້ນຢ່າງບໍ່ຢຸດຢັ້ງ, ຊຶ່ງເຫັນໄດ້ຈາກຫຼາຍຂົງເຂດຂອງການຮ່ວມມື ປະສົບຜົນສຳເລັດດີ. ສອງປະເທດໄດ້ມີການແລກປ່ຽນການຢ້ຽມຢາມ ຊຶ່ງກັນ ແລະ ກັນ ຢ່າງເປັນປົກກະຕິ ລະຫວ່າງການນໍາຂັ້ນສູງ ກໍ່ຄືລະດັບຕ່າງໆ. ຕົວເລກທາງດ້ານການຄ້າ, ການລົງທຶນ ແລະ ການທ່ອງທ່ຽວຂອງຍີ່ປຸ່ນ ຢູ່ ສປປ ລາວ ມີຈໍານວນເພີ່ມຂຶ້ນຢ່າງຕໍ່ເນື່ອງ. ປັດຈຸບັນ, ການລົງທຶນຂອງຍີ່ປຸ່ນ ຈັດຢູ່ໃນອັນດັບ 7 ຂອງການລົງທຶນຕ່າງປະເທດໃນລາວ ລວມມີ 102 ໂຄງການ ມູນຄ່າທັງໝົດປະມານ 438 ລ້ານໂດລາສະຫະລັດ ແລະ ມູນຄ່າການຄ້າສອງຝ່າຍ ໃນປີ 2016 ມີປະມານ 231 ລ້ານໂດລາສະຫະລັດ, ໃນນັ້ນ ລາວນໍາເຂົ້າ 116 ລ້ານໂດລາສະຫະລັດ ແລະ ສົ່ງອອກ 115 ລ້ານໂດລາສະຫະລັດ, ຈັດເປັນອັນດັບ 4 ຮອງຈາກໄທ, ຈີນ ແລະ ຫວຽດນາມ. ພ້ອມນັ້ນ, ສອງຝ່າຍ ໄດ້ຕີລາຄາສູງ ຕໍ່ການຈັດຕັ້ງປະຕິບັດ ແຜນຮ່ວມມືການພັດທະນາ ລະຫວ່າງ ສປປ ລາວ ແລະ ຍີ່ປຸ່ນ ເພື່ອພັດທະນາປະເທດລາວແບບຍືນຍົງ ຄຽງຄູ່ກັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 (2016-2020) ຂອງ ສປປ ລາວ. ສອງຝ່າຍ ມີຄວາມຍິນດີຈະສືບຕໍ່ປຶກສາຫາລື ແລະ ຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ ແລະ ວັດທະນະທໍາ ລວມທັງດ້ານຕ່າງໆ ທີ່ຢູ່ພາຍໃຕ້ຂອບຄູ່ຮ່ວມມືຍຸດທະສາດນໍາກັນ. ພ້ອມກັນນັ້ນ, ສອງຝ່າຍ ຍັງໄດ້ຫາລືກັນ ກ່ຽວກັບ ຄວາມເປັນໄປໄດ້ໃນການເປີດສາຍການບິນໂດຍກົງ ໂຕກຽວ-ວຽງຈັນ ເພື່ອສົ່ງເສີມການໄປມາຫາສູ່ກັນ ລະຫວ່າງ ປະຊາຊົນສອງປະເທດໃຫ້ຫຼາຍຂຶ້ນ. ນອກຈາກນັ້ນ, ສອງຝ່າຍ ໄດ້ແລກປ່ຽນຄຳເຫັນ ຕໍ່ສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ ເພື່ອປະກອບສ່ວນເຮັດໃຫ້ມີສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງຂອງພາກພື້ນ.
ໃນໂອກາດດັ່ງກ່າວ, ພະນະທ່ານນາຍົກ ທອງລຸນ ສີສຸລິດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມສາກົນ ກ່ຽວກັບ ອະນາຄົດຂອງອາຊີຄັ້ງນີ້, ພ້ອມທັງຕີລາຄາສູງ ແລະ ສະແດງຄວາມຂອບໃຈ ຕໍ່ການຊ່ວຍເຫຼືອຂອງລັດຖະບານຍີ່ປຸ່ນ ໃນດ້ານຕ່າງໆເຊັ່ນ: ການຊ່ວຍເຫຼືອທາງການເພື່ອການພັດທະນາ (ODA) ທີ່ເປັນອັນດັບ 01 ຂອງປະເທດທີ່ໃຫ້ການຊ່ວຍເຫຼືອແກ່ ສປປ ລາວ, ເຊິ່ງໃນປີ 2016 ໄດ້ມີ 05 ໂຄງການ ລວມມູນຄ່າທັງໝົດ 13,854 ຕື້ເຢນ (ປະມານ 122 ລ້ານໂດລາສະຫະລັດ) ແລະ ໃນສົກ 06 ເດືອນຕົ້ນປີ 2017 ກໍ່ມີການລົງນາມເອກະສານແລກປ່ຽນ 02 ໂຄງການ ລວມມູນຄ່າ 367 ລ້ານເຢນ (ປະມານ 3,7 ລ້ານໂດລາສະຫະລັດ); ການອະນຸມັດໂຄງການຮ່ວມມືດ້ານວິຊາການ ໃນສົກປີ 2015-2016 ຈໍານວນ 11 ໂຄງການ, ເຊິ່ງບັນດາໂຄງການເຫຼົ່ານັ້ນ ຈະຈັດຕັ້ງປະຕິບັດ ໃນສົກປີ 2017-2018; ການອະນຸມັດທຶນການສຶກສາໄລຍະຍາວ ລະດັບປະລິນຍາໂທ ແລະ ປະລິນຍາເອກ ເພື່ອສ້າງຂີດຄວາມສາມາດໃຫ້ ສປປ ລາວ ໃນການປັບປຸງວຽກງານ ບູລະນະຮັກສາທາງຫຼວງແຫ່ງຊາດຂອງລາວ; ໂຄງການຊ່ວຍເຫຼືອທາງດ້ານການຄຸ້ມຄອງເສດຖະກິດມະຫາພາກ ໂດຍສະເພາະການຄຸ້ມຄອງ ແລະ ເກັບລາຍຮັບເຂົ້າງົບປະມານ; ໂຄງການສ້າງຂີດຄວາມສາມາດໃຫ້ແກ່ການນຳຂັ້ນສູງ ຂອງ ສປປ ລາວ; ໂຄງການຂະຫຍາຍສະໜາມບິນສາກົນວັດໄຕ; ການສົ່ງອາສາສະໝັກຍີ່ປຸ່ນ ມາຊ່ວຍ ສປປ ລາວ, ເຊິ່ງນັບແຕ່ປີ 1965 ມາເຖິງປັດຈຸບັນ ມີອາສາສະໝັກ ຫຼາຍກວ່າ 800 ຄົນ ແລະ ຊ່ຽວຊານ ຫຼາຍກວ່າ 4.500 ຄົນ; ແລະ ການໃຫ້ທຶນຊ່ວຍເຫຼືອລ້າແກ່ ສປປ ລາວ ເຂົ້າໃນໂຄງການເລັ່ງລັດວຽກງານເກັບກູ້ລະເບີດ ເພື່ອສະໜັບສະໜູນໃຫ້ແກ່ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ໄລຍະ 02 ເປັນຈໍານວນເງິນ 7,03 ລ້ານໂດລາສະຫະລັດ. ໃນຂະນະດຽວກັນ, ພະນະທ່ານນາຍົກ ທອງລຸນ ສີສຸລິດ ຍັງໄດ້ສະແດງຄວາມຂອບໃຈ ຕໍ່ ລັດຖະບານຍີ່ປຸ່ນ ທີ່ເຫັນດີສືບຕໍ່ສຶກສາຄວາມເປັນໄປໄດ້ ໃນການກໍ່ສ້າງເສັ້ນທາງດ່ວນ ວຽງຈັນ-ຮ່າໂນຍ, ເຊິ່ງເປັນໂຄງການບຸລິມະສິດ ທີ່ນອນຢູ່ໃນແຜນຍຸດທະສາດການພັດທະນາ ຂອງທັງສອງປະເທດ ລາວ-ຫວຽດນາມ. ການຊ່ວຍເຫຼືອທັງໝົດນັ້ນ ໄດ້ປະກອບສ່ວນອັນສໍາຄັນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ສອດຄ່ອງກັບຄວາມຈໍາເປັນ ໃນການປັບປຸງການດຳລົງຊີວິດຂອງປະຊາຊົນລາວໃຫ້ດີຂຶ້ນ ເພື່ອຫຼຸດຜ່ອນຄວາມທຸກຍາກ ກໍຄືຫຼຸດຄວາມແຕກໂຕນດ້ານການພັດທະນາຂອງ ສປປ ລາວ ກັບປະເທດອື່ນໃນພາກພື້ນ ເພື່ອໃຫ້ຫຍັບໃກ້ເຂົ້າຫາກັນ.
ໃນໂອກາດດຽວກັນ, ພະນະທ່ານ ຊິນໂຊ ອາເບະ, ນາຍົກລັດຖະມົນຕີ ແຫ່ງ ຍີ່ປຸ່ນ ກໍໄດ້ສະແດງຄວາມຍິນດີຕ້ອນຮັບ ຕໍ່ການຢ້ຽມຢາມ ຂອງ ນາຍົກລັດຖະມົນຕີລາວ ຄັ້ງນີ້ ແລະ ຕີລາຄາສູງ ຕໍ່ການຮ່ວມມືຂອງ ສປປ ລາວ ໃນຂອບສອງຝ່າຍ ແລະ ຫລາຍຝ່າຍ, ພ້ອມທັງສະແດງຄວາມຂອບໃຈ ຕໍ່ການເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດຂອງອາຊີ ຂອງ ທ່ານນາຍົກລັດຖະມົນຕີລາວ ແລະ ສະແດງຄວາມຂອບໃຈ ຕໍ່ລັດຖະບານ ແຫ່ງ ສປປ ລາວ ທີ່ໃຫ້ການຮ່ວມມື-ສະໜັບສະໜູນ ຍີ່ປຸ່ນ ໃນເວທີພາກພື້ນ ແລະ ສາກົນ.
ພາຍຫຼັງສຳເລັດການພົບປະ, ສອງນາຍົກລັດຖະມົນຕີ ລາວ ແລະ ຍີ່ປຸ່ນ ກໍໄດ້ຮ່ວມຖະແຫລງຂ່າວ ຕໍ່ສື່ມວນຊົນ ກ່ຽວກັບ ຜົນສຳເລັດຂອງການພົບປະສຸດຍອດສອງຝ່າຍດັ່ງກ່າວ.