ຊົມເຊີຍຜົນສໍາເລັດກອງປະຊຸມໃຫຍ່ ຄັ້ງທີ X ຂອງພັກ ຢ່າງສຸດໃຈ ! ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ ! ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ ! ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ
a
ເຊື່ອມຕໍ່ເວັບໄຊພາຍໃນລາວ
Links
Lao Government
Law Project
UN
Lao PDR Trade Portal

ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຢ້ຽມຢາມ ສ. ລັດເຊຍ ຢ່າງເປັນທາງການ

 

lao-russia fm 2

 

lao-russia fm

 

ໂດຍຕອບສະໜອງຕາມຄໍາເຊີນ ຂອງ ທ່ານ ເຊເກ ລາວາຣົບ (Sergey Lavrov), ລັດຖະມົນຕີກະຊວງການຕ່າງປະເທດ ແຫ່ງ ສະຫະພັນ ຣັດເຊຍ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ສ. ຣັດເຊຍ ຢ່າງເປັນທາງການ ໃນລະຫວ່າງວັນທີ 15-17 ມິຖຸນາ 2017, ເຊິ່ງເປັນການຢ້ຽມຢາມຄັ້ງທໍາອິດ ນັບແຕ່ໄດ້ດໍາລົງຕໍາແຫນ່ງເປັນລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ຊຶ່ງການຢ້ຽມຢາມ ໄດ້ດຳເນີນຂຶ້ນໃນປີແຫ່ງການສະເຫຼີມສະຫຼອງສາຍພົວພັນການທູດ ຄົບຮອບ 57 ປີ ລະຫວ່າງ ລາວ-ຣັດເຊຍ (07/10/1960-07/10/2017) ອັນເປັນນິມິດໝາຍໃຫ້ແກ່ການເພີ່ມທະວີສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອອັນດີງາມ ລະຫວ່າງ ສອງປະເທດ ໃຫ້ແໜ້ນແຟ້ນຍິ່ງຂຶ້ນ.

ໃນວັນທີ 16 ມິຖຸນາ 2017, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ພົບປະສອງຝ່າຍຢ່າງເປັນທາງການ ກັບ ທ່ານ ເຊເກ ລາວາຣົບ, ລັດຖະມົນຕີກະຊວງການຕ່າງປະເທດ ແຫ່ງ ສະຫະພັນ ຣັດເຊຍ, ທີ່ ກະຊວງການຕ່າງປະເທດ ສ. ຣັດເຊຍ. ທັງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືອັນດີງາມ ທີ່ມີມາແຕ່ຍາວນານ, ບົນພື້ນຖານຄວາມໄວ້ເນື້ອເຊື່ອໃຈ ແລະ ການຊ່ວຍເຫຼືອເຊິ່ງກັນ ແລະ ກັນ, ຕ່າງຝ່າຍຕ່າງໄດ້ຮັບຜົນປະໂຫຍດ ແລະ ການເປັນຄູ່ຮ່ວມມື ຍຸດທະສາດນຳກັນ ລະຫວ່າງສອງປະເທດ ທີ່ສືບຕໍ່ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ຊຶ່ງເຫັນໄດ້ຈາກການທີ່ທັງສອງປະເທດ ໄດ້ມີການແລກປ່ຽນການຢ້ຽມຢາມຊຶ່ງກັນ ແລະ ກັນ ຢ່າງເປັນປົກກະຕິ, ໃນນັ້ນ ການພົວພັນຮ່ວມມື ລະຫວ່າງ ສອງລັດຖະສະພາ ແລະ ສອງກະຊວງປ້ອງກັນປະເທດ ລາວ-ຣັດເຊຍ ໄດ້ຮັບການຂະຫຍາຍຕົວດີ ໃນໄລຍະຜ່ານມາ, ພ້ອມທັງໄດ້ມີການຕີລາຄາສູງ ຕໍ່ການຮ່ວມມື ແລະ ການເຄື່ອນໄຫວຂອງຄະນະສະມາຄົມມິດຕະພາບ ແລະ ຄະນະກຳມາທິການຮ່ວມມື ລາວ-ຣັດເຊຍ, ຣັດເຊຍ-ລາວ ທີ່ເຮັດບົດບາດໃນການຊຸກຍູ້ ແລະ ຜັນຂະຫຍາຍການພົວພັນຮ່ວມມື ລາວ-ຣັດເຊຍ ໃຫ້ມີຄວາມໜັກແໜ້ນ ແລະ ເຂັ້ມແຂງຍິ່ງຂຶ້ນ. ໃນດ້ານການຮ່ວມມືສອງຝ່າຍ ລາວ-ຣັດເຊຍ ແມ່ນໄດ້ຮັບການຂະຫຍາຍຕົວຢ່າງຕໍ່ເນື່ອງ, ຊຶ່ງໃນດ້ານເສດຖະກິດ-ການຄ້າ ໃນປີ 2016 ຜ່ານມາ ມູນຄ່າການຄ້າສອງຝ່າຍບັນລຸໄດ້ 16,3 ລ້ານໂດລາສະຫະລັດ. ການລົງທຶນຂອງຣັດເຊຍ ຖືກຈັດຢູ່ອັນດັບທີ 22 ຂອງການລົງທຶນຕ່າງປະເທດໃນລາວ, ລວມມີ 23 ໂຄງການ ແລະ ມີມູນຄ່າປະມານ 52,7 ລ້ານໂດລາສະຫະລັດ, ຊຶ່ງການລົງທຶນຂອງຣັດເຊຍ ສ່ວນໃຫຍ່ປະກອບມີຂະແໜງ ພະລັງງານໄຟຟ້າ, ບໍ່ແຮ່, ໂທລະຄົມ, ການພິມເງິນກີບ, ໂຄງການພິມໜັງສືຜ່ານແດນ ອີ-ປັດສະປອດ ແລະ ອື່ນໆ. ການຮ່ວມມືດ້ານການທ່ອງທ່ຽວ ກໍຢູ່ໃນຈັງຫວະຂະຫຍາຍຕົວຂຶ້ນ, ຊຶ່ງຈຳນວນນັກທ່ອງທ່ຽວຣັດເຊຍ ເຂົ້າມາລາວເພີ່ມຂຶ້ນຈາກ 10 ພັນກວ່າຄົນ ໃນປີ 2014 ມາເປັນ 12 ພັນກວ່າຄົນ ໃນປີ 2015. ນອກຈາກນັ້ນ, ການຮ່ວມມືດ້ານການສຶກສາ ກໍໄດ້ຮັບການເສີມຂະຫຍາຍຢ່າງເປັນປົກກະຕິ, ໂດຍຈຳນວນນັກສຶກສາລາວໄປຮຽນຢູ່ຣັດເຊຍ ໄດ້ເພີ່ມຂຶ້ນໃນແຕ່ລະປີ, ຊຶ່ງໃນປີ 2016 ມີຈຳນວນນັກຮຽນລາວ 87 ຄົນ ທີ່ໄປສຶກສາຢູ່ມະຫາວິທະຍາໄລຕ່າງໆຂອງຣັດເຊຍ ໃນລະດັບປະລິນຍາຕີ, ປະລິນຍາໂທ ແລະ ປະລິນຍາເອກ.

ໃນໂອກາດດັ່ງກ່າວ, ສອງຝ່າຍເຫັນດີຈະເພີ່ມທະວີການພົວພັນຮ່ວມມືທີ່ດີແລ້ວນັ້ນ ໃຫ້ແໜ້ນແຟ້ນຍິ່ງຂຶ້ນ ແລະ ມີໝາກຜົນລື່ນເກົ່າ ເພື່ອຍົກລະດັບສາຍພົວພັນສອງຝ່າຍຂຶ້ນສູ່ຈຸດສູງ ໃນໄລຍະໃໝ່, ໂດຍຈະຊຸກຍູ້ໃຫ້ມີການແລກປ່ຽນການຢ້ຽມຢາມ ແລະ ໄປມາຫາສູ່ກັນ ໃນທຸກລະດັບ ແລະ ທຸກຂະແໜງການຮ່ວມມື ນັບແຕ່ການນຳຂັ້ນສູງຈົນຮອດລະດັບວິຊາການຂອງສອງປະເທດ, ລວມທັງລະຫວ່າງ ສອງນະຄອນຫຼວງ ມົດສະກູ ແລະ ນະຄອນຫຼວງວຽງຈັນ ເພື່ອຜັນຂະຫຍາຍ ແລະ ຊຸກຍູ້ບັນດາສັນຍາຮ່ວມມືກັນ ໃຫ້ໄດ້ຮັບການຈັດຕັ້ງປະຕິບັດ ແລະ ປະກົດຜົນເປັນຈິງ. ພ້ອມກັນນັ້ນ, ສອງຝ່າຍຍັງເຫັນດີຈະຈັດກອງປະຊຸມປຶກສາຫາລື ລະດັບຮອງລັດຖະມົນຕີກະຊວງການຕ່າງປະເທດ ລາວ-ຣັດເຊຍ ແລະ ຈະສືບຕໍ່ຊຸກຍູ້ການຮ່ວມມືໃນຂົງເຂດເສດຖະກິດ-ການຄ້າ, ການລົງທຶນ, ພະລັງງານ, ການສຶກສາ, ວິທະຍາສາດ-ເຕັກໂນໂລຊີ, ການທ່ອງທ່ຽວ, ໂທລະຄົມມະນາຄົມ, ການທະຫານ ແລະ ຂະແໜງການອື່ນໆ ທີ່ທັງສອງຝ່າຍມີຄວາມສົນໃຈຮ່ວມກັນ, ໂດຍສະເພາະ ຈະເພີ່ມທະວີຊຸກຍູ້ ບັນດາໂຄງການລົງທຶນຂອງລັດເຊຍ ທີ່ກຳລັງດຳເນີນການຢູ່ ສປປ ລາວ ໃຫ້ປະຕິບັດສຳເລັດຕາມຄາດໝາຍ ທີ່ໄດ້ຕົກລົງກັນໄວ້ ເພື່ອນຳເອົາຜົນປະໂຫຍດອັນແທ້ຈິງ ມາສູ່ປະຊາຊົນສອງຊາດ ລາວ-ຣັດເຊຍ. ນອກນັ້ນ, ສອງຝ່າຍ ຍັງເປັນເອກະພາບກັນທີ່ຈະສືບຕໍ່ສະໜັບສະໜູນເຊິ່ງກັນ ແລະ ກັນ ໃນພາກພື້ນ ແລະ ສາກົນ.

ພາຍຫຼັງສຳເລັດການພົບປະສອງຝ່າຍ, ໄດ້ມີການຖະແຫຼງຂ່າວຮ່ວມກັນ ກ່ຽວກັບ ຜົນຂອງການພົບປະ ແລະ ຜົນສຳເລັດຂອງການຢ້ຽມຢາມທາງການ ຢູ່ ສ. ຣັດເຊຍ ໃນຄັ້ງນີ້ ຕໍ່ສື່ມວນຊົນ. ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຕາງໜ້າໃຫ້ລັດຖະບານ ສປປ ລາວ ສະແດງຄວາມຂອບໃຈຢ່າງຈິງໃຈ ຕໍ່ການຮ່ວມມືຊ່ວຍເຫຼືອອັນລ້ຳຄ່າຂອງລັດຖະບານຣັດເຊຍ ໃຫ້ແກ່ ສປປ ລາວ.

ໃນໂອກາດຢ້ຽມຢາມດັ່ງກ່າວ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ພົບປະກັບບັນດາການນຳຂັ້ນສູງຂອງ ສ. ຣັດເຊຍ ຄື: ປະທານກຳມາທິການພົວພັນຕ່າງປະເທດ ສະພາສູງຣັດເຊຍ, ປະທານຄະນະກຳມາທິການຮ່ວມມື ຣັດເຊຍ-ລາວ ແລະ ປະທານສະມາຄົມມິດຕະພາບ ຣັດເຊຍ-ລາວ. ນອກຈາກນີ້, ທ່ານ ສະເຫຼີມໄຊ ກົມມະສິດ ໄດ້ໄປຢ້ຽມຢາມ ສະຖາບັນ ການພົວພັນຮ່ວມມືສາກົນ ແຫ່ງຊາດຣັດເຊຍ (MGIMO) ໂດຍໄດ້ຂຶ້ນປາຖະກະຖາ ກ່ຽວກັບ ບົດບາດຂອງ ສປປ ລາວ ໃນອາຊຽນ ແລະ ຜົນສຳເລັດຂອງ ສປປ ລາວ ໃນການເປັນປະທານອາຊຽນ, ການກະກຽມຂອງ ສປປ ລາວ ໃນການເຂົ້າປະຊາຄົມເສດຖະກິດອາຊຽນ ແລະ ທັດສະນະຂອງ ສປປ ລາວ ໃນເວທີພາກພື້ນ ແລະ ສາກົນ ໃຫ້ແກ່ນັກສຶກສາ ທີ່ກຳລັງສຶກສາຢູ່ສະຖາບັນດັ່ງກ່າວ. ການຢ້ຽມຢາມ ສ. ຣັດເຊຍ ຂອງຄະນະຜູ້ແທນ ນຳໂດຍ ທ່ານລັດຖະມົນຕີກະຊວງການຕ່າງປະເທດ ສປປ ລາວ ໃນຄັ້ງນີ້ ໄດ້ຮັບຜົນສຳເລັດ ຮຽບຮ້ອຍດີທຸກປະການ.

ບົດຂ່າວອື່ນໆ

Lao Government
a
ສາລະຄະດີ 70ປີ ວັນການທູດລາວ

a
ຄັງຮູບ
a
ຈຳນວນຜູ້ເຂົ້າຊົມ
120717
ມື້ນີ້92
ມື້ວານ95
ອາທິດນີ້445
ເດືອນນີ້2205
a
ຈຳນວນຜູ້ເຂົ້າຊົມຕັ້ງແຕ່ 16 ມີນາ 2015

ຜູ້ເຂົ້າຊົມ: 225710