ໃນລະຫວ່າງວັນທີ 27-28 ມິຖຸນາ 2017, ຄະນະເຈົ້າໜ້າທີ່ອາວຸໂສພາຍໃຕ້ຄະນະກໍາມາທິການຊາຍແດນຮ່ວມ ລາວ-ໄທ, ໄທ-ລາວ ໄດ້ຮ່ວມກັນລົງກວດກາພື້ນທີ່ຕົວຈິງຊາຍແດນ ລາວ-ໄທ ທາງບົກ ບໍລິເວນແກ້ງຜາໄດ ແລະ ບໍລິເວນຜາຕັ້ງ-ຜາບ່ອງ ຊຶ່ງເປັນຈຸດຄົງຄ້າງທີ່ນອນໃນຈໍານວນ 14 ຈຸດຈາກການສໍາຫຼວດ ແລະ ປັກຫຼັກໝາຍຊາຍແດນ ລາວ-ໄທ ທີ່ເລີ່ມມາແຕ່ປີ 1997, ເບື້ອງລາວຂຶ້ນກັບເມືອງປາກທາ, ແຂວງບໍ່ແກ້ວ ແລະ ເບື້ອງໄທຂຶ້ນກັບ ອໍາເພີວຽງແກ່ນ, ຈັງຫວັດຊຽງຣາຍ. ຄະນະຝ່າຍລາວນໍາໂດຍ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ປະທານຄະນະເຈົ້າໜ້າທີ່ອາວຸໂສຮ່ວມ ລາວ-ໄທ (ຝ່າຍລາວ) ແລະ ຄະນະຝ່າຍໄທນໍາໂດຍ ທ່ານ ວະສິນ ທີລະເວດຊະຍານ, ທີ່ປຶກສາກະຊວງການຕ່າງປະເທດ, ປະທານຄະນະເຈົ້າໜ້າທີ່ອາວຸໂສຮ່ວມ ໄທ-ລາວ (ຝ່າຍໄທ).

ການລົງກວດກາພື້ນທີ່ໃນຄັ້ງນີ້ ແມ່ນປະຕິບັດຕາມຜົນຂອງກອງປະຊຸມຄະນະກຳມາທິການຊາຍແດນຮ່ວມ ລາວ-ໄທ; ໄທ-ລາວ (JBC) ຄັ້ງທີ 10, ສະບັບລົງວັນທີ 23 ມັງກອນ 2015 ທີ່ນະຄອນຫຼວງວຽງຈັນ ແລະ ປະຕິບັດຕາມການຕົກລົງເຫັນດີໃນການພົບປະສອງຝ່າຍ ລະຫວ່າງ ປະທານຄະນະເຈົ້າໜ້າທີ່ອາວຸໂສຮ່ວມທັງສອງຝ່າຍ ຄັ້ງວັນທີ 02​ ກຸມພາ 2017 ທີ່ດ່ານສາກົນວັງເຕົ່າ-ຊ່ອງເມັກ.

ໃນໂອກາດລົງກວດກາພື້ນທີ່ຄັ້ງນີ້, ປະທານຄະນະເຈົ້າໜ້າທີ່ອາວຸໂສຮ່ວມທັງສອງຝ່າຍໄດ້ຮັບຟັງການລາຍງານ ແລະ ຊີ້ແຈງຈາກກອງສໍາຫຼວດ ແລະ ປັກຫຼັກໝາຍຊາຍແດນທາງບົກຮ່ວມ ລາວ-ໄທ; ໄທ-ລາວ ກ່ຽວກັບເຫດຜົນ ແລະ ຄວາມຄືບໜ້າຂອງການດໍາເນີນການສໍາຫຼວດ ແລະ ແກ້ໄຂຈຸດຄົງຄ້າງຮ່ວມກັນໃນໄລຍະຜ່ານມາ. ຈາກນັ້ນ, ປະທານຮ່ວມທັງສອງຝ່າຍກໍ່ໄດ້ແນະນໍາເຈົ້າໜ້າທີ່ກອງສໍາຫຼວດທັງສອງຝ່າຍ ຈົ່ງສືບຕໍ່ຮ່ວມກັນປຶກສາຫາລືຊອກຫາວິທີການແກ້ໄຂທີ່ເໝາະສົມ ອັນສອດຄ່ອງກັບຫຼັກການທາງດ້ານກົດໝາຍ ແລະ ຫຼັກການເຕັກນິກ ເພື່ອແກ້ໄຂຈຸດຄົງຄ້າງດັ່ງກ່າວໃຫ້ສໍາເລັດໂດຍໄວ ເປັນຕົ້ນ ຮ່ວມກັນສໍາຫຼວດເກັບລາຍລະອຽດເພີ່ມເຕີມ, ແຕ້ມແຜນຜັງສະໜາມ, ກໍານົດຈຸດທີ່ເໝາະສົມ ແລະ ກໍ່ສ້າງຫຼັກໝາຍຊາຍແດນ ພ້ອມທັງຂີດທິດເນັ່ງເສັ້ນຊາຍແດນໃນແຜນຜັງສະໜາມເທິງສັນປັນນໍ້າທີ່ຕໍ່ເນື່ອງ ທີ່ເປັນທິດເນັ່ງຂອງເສັ້ນຊາຍແດນຕາມສົນທິສັນຍາ ຝຣັ່ງ-ສະຫຍາມ ສະບັບລົງວັນທີ 23 ມີນາ 1907 ແລ້ວລາຍງານຕາມລໍາດັບຂັ້ນຈົນເຖິງປະທານຄະນະກໍາມາທິການຊາຍແດນຮ່ວມ ລາວ-ໄທ; ໄທ-ລາວ ພິຈາລະນາຕໍ່ໄປ.

ການລົງກວດກາພື້ນທີ່ຂອງຄະນະເຈົ້າໜ້າທີ່ອາວຸໂສຮ່ວມ ລາວ-ໄທ; ໄທ-ລາວ ໃນຄັ້ງນີ້ ໄດ້ດໍາເນີນໄປດ້ວຍບັນຍາກາດອັນສ້າງສັນ, ເຕັມໄປດ້ວຍໄມຕີຈິດມິດຕະພາບ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ແລະ ໄດ້ຮ່ວມກັນປຶກສາຫາລື ຢ່າງຈິງໃຈ ແລະ ກົງໄປກົງມາໃນທຸກໆບັນຫາ ອັນເປັນພື້ນຖານ ແລະ ຄວາມປາຖະໜາທີ່ຈະຮ່ວມກັນເລັ່ງລັດແກ້ໄຂຈຸດຄົງຄ້າງໃຫ້ສໍາເລັດຕາມແຜນການ ຂອງກອງປະຊຸມຄະນະກໍາມາທິການຊາຍແດນຮ່ວມ ລາວ-ໄທ; ໄທ-ລາວ (JBC) ຄັ້ງທີ 10, ສະບັບລົງວັນທີ 23 ມັງກອນ 2015 ທີ່ນະຄອນຫຼວງວຽງຈັນ ວາງໄວ້ຄື: ການສໍາຫຼວດ ແລະ ປັກຫຼັກໝາຍຊາຍແດນທາງບົກຮ່ວມ ລາວ-ໄທ ໃຫ້ສໍາເລັດ ໃນປີ 2016 ແລະ ທາງນໍ້າ ໃນປີ 2018.