ໃນທ່າມກາງບັນຍາກາດທີ່ທົ່ວປວງຊົນສອງຊາດ ລາວ-ຫວຽດນາມ ພວມດຳເນີນການສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ ປີ 2017 ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ (18/7/1977 – 18/7/2017) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ (5/9/1962 – 5/9/2017) ຢ່າງຄຶກຄື້ນ, ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ ໃນນາມເປັນຮອງປະທານຄະນະຊີ້ນຳລະດັບຊາດ, ເປັນຜູ້ປະຈຳການ ແລະ ທັງເປັນໃຈກາງ ໃນການພົວພັນປະສານງານກັບບັນດາຂະແໜງການພາຍໃນ, ທ້ອງຖິ່ນ ແລະ ກັບເພື່ອນຫວຽດນາມ, ໄດ້ໃຫ້ສຳພາດຕໍ່ ທີມງານລາຍການ “ລົມກັນວັນນີ້” ຂອງໂທລະພາບແຫ່ງຊາດລາວ ແລະ ທີມງານສຳນັກຂ່າວສານປະເທດລາວ, ໃນຕອນບ່າຍຂອງວັນທີ 10 ກໍລະກົດ 2017, ທີ່ ກະຊວງການຕ່າງປະເທດ.
ໃນໂອກາດດັ່ງກ່າວ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ກ່າວຢຳ້ເຖິງ ຈຸດປະສົງ ແລະ ຄວາມຫມາຍຄວາມສຳຄັນຂອງການຈັດຕັ້ງສະເຫຼີມສະຫຼອງປີສາມັກຄີມິດຕະພາບ ໃນຄັ້ງນີ້, ໂດຍສະເພາະແມ່ນເພື່ອເຮັດໃຫ້ຄົນຮຸ່ນໜຸ່ມ ໄດ້ຮັບຮູ້ ແລະ ເຂົ້າໃຈມູນເຊື້ອແຫ່ງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ເພື່ອສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອດັ່ງກ່າວ. ພ້ອມກັນນັ້ນ, ທ່ານໄດ້ຍົກໃຫ້ເຫັນເຖິງ ຜົນສຳເລັດອັນພົ້ນເດັ່ນ ແລະ ສິ່ງທ້າທາຍ ຕະຫຼອດໄລຍະ 55 ປີ ແຫ່ງການສ້າງຕັ້ງສາຍພົວພັນການທູດ ແລະ 40 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ເວົ້າລວມ, ເວົ້າສະເພາະ ການຮ່ວມມືລະຫວ່າງສອງກະຊວງການຕ່າງປະເທດ ລາວ-ຫວຽດນາມ, ໂດຍສອງກະຊວງ ໄດ້ມີຂໍ້ຕົກລົງຮ່ວມມືນຳກັນ ໄລຍະຍາວ ແຕ່ປີ 2014-2020. ນອກຈາກນັ້ນ, ທ່ານຍັງໄດ້ເວົ້າເຖິງ ແຜນການຈັດຕັ້ງປະຕິບັດໃນຕໍ່ໜ້າ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃຫ້ໝັ້ນຄົງຕະຫຼອດໄປ. ໃນຕອນທ້າຍ, ທ່ານກໍໄດ້ເຊີນຊວນປະຊາຊົນບັນດາເຜົ່າຂອງທັງສອງປະເທດ ຈົ່ງຮ່ວມກັນສ້າງຂະບວນການປະກອບສ່ວນເຂົ້າໃນບັນດາກິດຈະກຳການເຄື່ອນໄຫວຕ່າງໆ ເພື່ອເປັນການຂໍ່ານັບຮັບຕ້ອນ ແລະ ເຮັດໃຫ້ການຈັດຕັ້ງການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ໃນຄັ້ງນີ້ມີຄວາມໝາຍ ແລະ ປະສົບຜົນສຳເລັດຢ່າງຈົບງາມ.
ໃນວັນດຽວກັນ, ທ່ານລັດຖະມົນຕີກະຊວງການຕ່າງປະເທດ ຍັງໄດ້ໃຫ້ສຳພາດຕໍ່ ວາລະສານ ທາເກັດ ແລະ ວິທະຍຸກະຈາຍສຽງແຫ່ງຊາດລາວ. ຕໍ່ທີມງານຂອງວາລະສານທາເກັດ, ທ່ານໄດ້ຍົກໃຫ້ຮູ້ເຖິງ ການຈັດຕັ້ງປະຕິບັດແນວທາງນະໂຍບາຍການຕ່າງປະເທດຂອງພັກ-ລັດຖະບານ ໃນສະພາບການໃໝ່ ແລະ ການດຳເນີນຍຸດທະສາດການພັດທະນາຂະແໜງການຕ່າງປະເທດ ຮອດປີ 2025, ແນວທາງການຕ່າງປະເທດຂອງ ສປປ ລາວ ພາຍຫຼັງເຂົ້າຮ່ວມປະຊາຄົມເສດຖະກິດອາຊຽນ (AEC), ຜົນສຳເລັດ ແລະ ສິ່ງທ້າທາຍຕ່າງໆຂອງ ສປປ ລາວ ໃນການເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 28 ແລະ ຄັ້ງທີ 29 ໃນປີ 2016 ຜ່ານມາ ແລະ ສິ່ງທີ່ຄວນເອົາໃຈໃສ່ປັບປຸງ ເພື່ອກະກຽມໃຫ້ແກ່ການເປັນປະທານອາຊຽນ ໃນຮອບຕໍ່ໄປ.
ສຳລັບການໃຫ້ສຳພາດຕໍ່ ທີມງານລາຍການ “ຍົກບັນຫາມາສົນທະນາ” ຂອງວິທະຍຸກະຈາຍສຽງແຫ່ງຊາດລາວ, ທ່ານ ສະເຫຼີມໄຊ ກົມມະສິດ ໄດ້ຍົກໃຫ້ເຫັນເຖິງສາຍພົວພັນຮ່ວມມືແບບຄູ່ຮ່ວມມືຍຸດທະສາດຮອບດ້ານ ທີ່ໝັ້ນຄົງຍາວນານລະຫວ່າງ ລາວ-ຈີນ ທີ່ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ແຕກດອກອອກຜົນ ເປັນທີ່ໜ້າເພິ່ງພໍໃຈ ອັນໄດ້ນຳຜົນປະໂຫຍດຕົວຈິງມາສູ່ປະຊາຊົນຂອງສອງປະເທດ, ແລະ ແຜນການຮ່ວມມືສອງຝ່າຍ ລາວ-ຈີນ ໃນອະນາຄົດ. ພ້ອມກັນນັ້ນ, ທ່ານຍັງໄດ້ເວົ້າເຖິງ ຄວາມສຳຄັນຂອງ ສປປ ລາວ ໃນການເຂົ້າຮ່ວມ ຂໍ້ລິເລີ່ມ ໜຶ່ງແລວທາງ-ໜຶ່ງເສັ້ນທາງ ທີ່ປະກາດໂດຍປະທານ ສີ ຈິນຜິງ ໃນປີ 2013 ແລະ ຜົນປະໂຫຍດທີ່ລາວເຮົາຈະໄດ້ຮັບຈາກຂໍ້ລິເລີ່ມດັ່ງກ່າວ. ໃນນັ້ນ, ກໍລວມທັງໂຄງການທາງລົດໄຟ ລາວ-ຈີນ ທີ່ເປັນຜົນສຳເລັດເບື້ອງຕົ້ນຂອງຂໍ້ລິເລີ່ມ ໜຶ່ງແລວທາງ ໜຶ່ງເສັ້ນທາງ, ຊຶ່ງຈະເປັນການປະກອບສ່ວນຢ່າງແຂງແຮງ ຕໍ່ຍຸດທະສາດຫັນປະເທດທີ່ບໍ່ມີຊາຍແດນອອກສູ່ທະເລ ຂອງ ສປປ ລາວ ເປັນປະເທດເຊື່ອມຈອດກັບປະເທດໃກ້ຄຽງ ແລະ ພາກພື້ນ.