ໃນວັນທີ 28-29 ກໍລະກົດ 2017 ທີ່ ນະຄອນກຸ້ຍຢາງ, ແຂວງກຸ້ຍໂຈວ, ສປ ຈີນ, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມງານສັບປະດາການຮ່ວມມືດ້ານວຽກງານການສຶກສາ ອາຊຽນ-ຈີນ ຄັ້ງທີ 10 ພາຍໃຕ້ການເປັນປະທານຂອງ ທ່ານ ນາງ ລິວ ຈຽນ ຕົງ, ຮອງນາຍົກລັດຖະມົນຕີ ແຫ່ງ ສາທາລະນະລັດ ປະຊາຊົນຈີນ. ຄຳຂວັນ ສຳລັບ ງານສັບປະດາປີນີ້ ແມ່ນ “ແບ່ງປັນຄວາມສຳເລັດ ໃນການຮ່ວມມືດ້ານການສຶກສາ ແລະ ເລີ່ມຕົ້ນບົດຮຽນໃໝ່ ໄປພ້ອມກັນກັບ ຂໍ້ລິເລີ້ມ ໜຶ່ງແລວທາງ ໜຶ່ງເສັ້ນທາງ”. ຈຸດປະສົງຂອງງານ ແມ່ນເພື່ອສົ່ງເສີມການແລກປ່ຽນ ລະຫວ່າງ ປະຊາຊົນກັບປະຊາຊົນ ແລະ ເປີດໂອກາດໃຫ້ແກ່ອາຊຽນ ແລະ ຈີນ ໄດ້ຮຽນຮູ້ຊຶ່ງກັນ ແລະ ກັນ.
ໃນໂອກາດການເຂົ້າຮ່ວມງານຄັ້ງນີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ຖືກຮັບກຽດຂຶ້ນກ່າວຄຳປາໃສຕາງໜ້າບັນດາປະເທດສະມາຊິກອາຊຽນ, ຊຶ່ງໄດ້ຕີລາຄາສູງຕໍ່ໝາກຜົນຄວາມສຳເລັດຂອງການພົວພັນ ອາຊຽນ-ຈີນ ຕະຫຼອດໄລຍະສອງທົດສະວັດເຄິ່ງຜ່ານມາ ເປັນຕົ້ນແມ່ນ ໃນປີ 2016 ຜ່ານມາ ອາຊຽນ ແລະ ຈີນ ໄດ້ສະເຫຼີມ ສະຫຼອງວັນຄົບຮອບ 25 ປີແຫ່ງການສ້າງສາຍພົວພັນ ອາຊຽນ-ຈີນ, ຫຼາຍກິດຈະກໍາທີ່ສຳຄັນໄດ້ຖືກຈັດຕັ້ງປະຕິບັດ, ແລະ ສຳຄັນທີ່ສຸດແມ່ນໄດ້ຈັດກອງປະຊຸມສຸດຍອດສະເຫຼີມສະຫຼອງຂື້ນໃນເດືອນກັນຍາ 2016 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງ ສປປ ລາວ ແລະ ໄດ້ຮັບຜົນສຳເລັດຢ່າງຈົບງາມ, ຊຶ່ງເປັນຂີດໝາຍທາງປະຫວັດສາດ ໃນການສ້າງກາລະໂອກາດທີ່ສຳຄັນສຳລັບ ອາຊຽນ ແລະ ຈີນ ແລະ ທັງເປັນພື້ນຖານທີ່ເຂັ້ມແຂງໃນການເສີມສ້າງການພົວພັນ ອາຊຽນ-ຈີນ ໃນທົດສະວັດຕໍ່ໆໄປ. ພ້ອມນີ້, ບັນດາຜູ້ນຳຂອງທັງສອງຝ່າຍ ໄດ້ຢືນຢັນເຖິງຄວາມໝາຍໝັ້ນຂອງຕົນໃນການເສີມສ້າງການເປັນຄູ່ຮ່ວມຍຸດທະສາດ ອາຊຽນ-ຈີນ ໂດຍຜ່ານການຈັດຕັ້ງປະຕິບັດບັນດາແຜນປະຕິບັດງານ ອາຊຽນ-ຈີນ 2016-2020 ຊຶ່ງຈະເປັນການສົ່ງເສີມການແລກປ່ຽນ ລະຫວ່າງ ປະຊາຊົນກັບປະຊາຊົນ ໃນດ້ານການສຶກສາ, ກິລາ ແລະ ວັດທະນະທຳ, ການຮັດແຄບຄວາມແຕກໂຕນກັນດ້ານການພັດທະນາ, ການເຊື່ອມຈອດອາຊຽນ, ການເຊື່ອມໂຍງອາຊຽນ, ການສ້າງປະຊາຄົມອາຊຽນ ແລະ ຂໍ້ລິເລີ້ມໜຶ່ງແລວທາງໜຶ່ງເສັ້ນທາງໃນອານາຄົດ.
ທ່ານຮອງນາຍົກລັດຖະມົນຕີ ໄດ້ກ່າວຕື່ມອີກວ່າ ເຖິງວ່າ ອາຊຽນໄດ້ປະກາດສ້າງປະຊາຄົມອາຊຽນແລ້ວ, ແຕ່ອາຊຽນຈະສືບຕໍ່ຈັດຕັ້ງປະຕິບັດແຜນປະຕິບັດງານວິໄສທັດປະຊາຄົມອາຊຽນ 2025, ລວມທັງແຜນແມ່ບົດການເຊື່ອມຈອດອາຊຽນ 2025. ໃນຂະນະດຽວກັນ, ຂໍ້ລິເລີ້ມໜຶ່ງແລວທາງໜຶ່ງເສັ້ນທາງກໍ່ແມ່ນໜຶ່ງໃນບັນດາຂໍ້ລິເລີ້ມທີ່ສຳຄັນເພື່ອວາງທິດທາງຍຸດທະສາດ ໃນການຮ່ວມມືອາຊຽນ-ຈີນໃນອະນາຄົດ. ອາຊຽນ ຕີລາຄາສູງ ຕໍ່ການປະກາດຂອງລັດຖະບານຈີນເພື່ອສືບຕໍ່ໃຫ້ການຊ່ວຍເຫຼືອ ຂະແໜງການສືກສາເພີ້ມເປັນສອງເທົ່າໃຫ້ອາຊຽນ ເປັນຈໍານວນ 3 ແສນ ເທື່ອຄົນ ພາຍໃນປີ 2025 ໂດຍຜ່ານໂຄງການຮ່ວມມືເສັ້ນທາງສາຍໄໝ ແລະ ນອກນັ້ນ, ຈີນກໍໄດ້ຊ່ວຍທຶນສືກສາໃຫ້ໄດ້ 1000 ທຶນ ຕໍ່ອາຊຽນ ໃນປີ 2017 ນີ້, ຊຶ່ງຈະເປັນການປະກອບສ່ວນ ເຂົ້າໃນການແລກປ່ຽນການໄປມາຫາສູ່ກັນຂອງປະຊາຊົນ ແລະ ພາຍໃນປີ 2020 ໃຫ້ມີນັກທ່ອງທ່ຽວຈາກທັງສອງຝ່າຍ ເຖິງ 30 ລ້ານຄົນ.
ນອກຈາກເຂົ້າຮ່ວມງານສັບປະດາການຮ່ວມມືດ້ານວຽກງານການສຶກສາ ອາຊຽນ-ຈີນ ແລ້ວ, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ຍັງໄດ້ພົບປະສອງຝ່າຍ ກັບ ທ່ານນາງ ລິວ ຈຽນ ຕົງ, ຮອງນາຍົກລັດຖະມົນຕີແຫ່ງສປຈີນ, ຊຶ່ງທັງສອງຝ່າຍໄດ້ຕີລາຄາສູງ ແລະ ສະແດງຄວາມຍິນດີ ທີ່ເຫັນວ່າການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຈີນ ໄດ້ຮັບການສືບຕໍ່ເສີມຂະຫຍາຍຢ່າງບໍ່ຢຸດຢັ້ງ ແລະ ລົງເລິກໃນວຽກງານຕົວຈິງຫລາຍດ້ານ. ນອກນີ້, ການນໍາຂັ້ນສູງຂອງສອງປະເທດ ກໍໄດ້ສືບຕໍ່ແລກ ປ່ຽນການຢ້ຽມຢາມ ຊຶ່ງກັນ ແລະ ກັນ ຢ່າງເປັນປົກກະຕິ. ໃນປີ 2016 ທີ່ຜ່ານມາ ການນຳຂັ້ນສູງຂອງລາວຫຼາຍທ່ານ ກໍໄດ້ເດີນທາງມາຢ້ຽມຢາມທາງການ ຢູ່ ສປ ຈີນ, ແລະ ທັງສອງຝ່າຍເຫັນດີສະໜັບສະໜູນໃຫ້ສືບຕໍ່ມູນເຊື້ອອັນດີງາມດັ່ງກ່າວ.