ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງຕອນລຸ່ມ-ສະຫະລັດ ອາເມລິກາ ຄັ້ງທີ 10 ໃນວັນທີ 6 ສິງຫາ 2017, ທີ່ນະຄອນຫລວງມະນີລາ, ຟີລິບປິນ.

ກອງປະຊຸມດັ່ງກ່າວໄດ້ຈັດຂຶ້ນໂດຍພາຍໃຕ້ການເປັນປະທານຂອງທ່ານ ເຣັກສ ທິວເລີເຊິນ, ລັດຖະມົນຕີກະຊວງການຕ່າງປະເທດ ແຫ່ງ ສະຫະລັດ ອາເມລິກາ, ໂດຍມີບັນດາລັດຖະມົນຕີ ກະຊວງການຕ່າງປະເທດຂອງ ກໍາປູເຈຍ, ສປປ ລາວ, ໄທ, ຫວຽດນາມ, ຮອງລັດຖະມົນຕີກະຊວງການຕ່າງປະເທດ ມຽນມາ ແລະ ເລຂາທິການໃຫຍ່ອາຊຽນ ພ້ອມດ້ວຍຄະນະຜູ້ແທນຂອງຕົນ ເຂົ້າຮ່ວມ.

ກອງປະຊຸມໄດ້ສະແດງຄວາມຍິນດີ ຕໍ່ຄວາມຄືບໜ້າຂອງການຈັດຕັ້ງປະຕິບັດບັນດາແຜນວຽກ ແລະ ໂຄງການຕ່າງໆ ພາຍໃຕ້ຂອບຮ່ວມມືດັ່ງກ່າວໃນໄລຍະຜ່ານມາ, ຊຶ່ງໃນນັ້ນ ສປປ ລາວ ກໍໄດ້ຮ່ວມກັບ ສ. ອາເມລິກາ ກໍາລັງຈັດຕັ້ງປະຕິບັດໂຄງການໃຫມ່ ຈໍານວນ 2 ໂຄງການ ພາຍໃຕ້ແຜນວຽກຂອງໂຄງການ ພື້ນຖານໂຄງລ່າງທີ່ທັນສະໄໝ ສໍາລັບແມ່ນໍ້າຂອງ (Smart Infrastructure for the Mekong ຫລື SIM) ຢູ່ ກະຊວງພະລັງງານ ແລະ ບໍ່ແຮ່ ແລະ ໂຄງການຝຶກອົບຮົມດ້ານເຕັກນິກຕ່າງໆ, ລວມທັງ ໂຄງການເຊື່ອມຈອດແມ່ນໍ້າຂອງ ໂດຍຜ່ານການສຶກສາ ແລະ ຝຶກອົບຮົມ (Connecting the Mekong through Education and Training ຫລື COMET) ຈໍານວນ 1 ໂຄງການ ຢູ່ ມະຫາວິທະຍາໄລແຫ່ງຊາດ.

ພ້ອມນັ້ນ, ກອງປະຊຸມ ຍັງໄດ້ປຶກສາຫາລືກັນ ກ່ຽວກັບ ຂໍ້ສະເຫນີຂອງສະຫະລັດ ອາເມລິກາ ທີ່ມີຊື່ວ່າ: “ຂໍ້ລິເລີ່ມຂໍ້ມູນແມ່ນໍ້າຂອງ” ຫລື Mekong Water Data Initiative, ພ້ອມທັງ ແລກປ່ຽນຄວາມຄິດຄວາມເຫັນ ກ່ຽວກັບ ຂົງເຂດຈຸດສຸມຂອງການຮ່ວມມືໃນຊຸມປີຕໍ່ໜ້າ.

ສຸດທ້າຍ, ກອງປະຊຸມດັ່ງກ່າວ ໄດ້ຮັບຮອງເອົາ 2 ເອກະສານສໍາຄັນຄື: ຖະແຫຼງການຮ່ວມ ຂອງກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງຕອນລຸ່ມ - ສ. ອາເມລິກາ ຄັ້ງທີ 10 ແລະ ຂໍ້ລິເລີ່ມຂໍ້ມູນແມ່ນໍ້າຂອງ ເພື່ອເປັນທິດທາງໃຫ້ແກ່ການຮ່ວມມືໃນຕໍ່ໜ້າ ແນໃສ່ສົ່ງເສີມການພັດທະນາ ເສດຖະກິດ-ສັງຄົມ ແລະ ຍົກສູງລະດັບຊີວິດການເປັນຢູ່ຂອງປະຊາຊົນ ໃນອະນຸພາກພື້ນແມ່ນໍ້າຂອງ ໃຫ້ດີຂຶ້ນເທື່ອລະກ້າວ.