ໃນຕອນບ່າຍຂອງວັນທີ 23 ສິງຫາ 2017, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ເບັນ ຄິງ (Ben KING), ເອກອັກຄະລັດຖະທູດ ນິວຊີແລນ ປະຈຳ ສປປ ລາວ, ໃນໂອກາດສຳເລັດການປະຕິບັດໜ້າທີ່ການທູດຢູ່ ສປປ ລາວ, ຊຶ່ງມີສຳນັກງານສະຖານເອກອັກຄະລັດຖະທູດ ຕັ້ງຢູ່ ບາງກອກ, ປະເທດໄທ.
ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ, ພ້ອມທັງສະແດງ ຊົມເຊີຍທ່ານທູດ ທີ່ໄດ້ເຄື່ອນໄຫວຢ່າງຫ້າວຫັນ ເຂົ້າໃນການປະຕິບັດໜ້າທີ່ການທູດຢູ່ ສປປ ລາວ ຕະຫຼອດໄລຍະ 1 ປີກວ່າຜ່ານມາ, ເຊິ່ງເຫັນໄດ້ຈາກຄວາມພະຍາຍາມ ແລະ ເອົາໃຈໃສ່ໃນການເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງສອງປະເທດ ທີ່ມີມາແລ້ວນັ້ນ ໃຫ້ໄດ້ຮັບການຂະຫຍາຍຕົວໄປໃນຫຼາຍຂົງເຂດຢ່າງຕໍ່ເນື່ອງ, ເປັນຕົ້ນແມ່ນການຮ່ວມມືດ້ານກະສິກຳ, ເຊັ່ນ ໂຄງການຊ່ວຍເຫຼືອການຄວບຄຸມພະຍາດປາກເປື່ອຍລົງເລັບສັດລ້ຽງ (New Zealand-funded Foot and Mouth Disease Control Activity) ໃນໄລຍະ 5 ປີ (2016-2020) ແລະ ໂຄງການຄຸນນະພາບຊີ້ນງົວຢູ່ ສປປ ລາວ (Lao PDR Quality Beef Initiative) ແຕ່ປີ 2017-2021, ຊຶ່ງໄດ້ລົງນາມຮ່ວມກັນໃນເດືອນ ກໍລະກົດ 2017 ທີ່ຜ່ານມາ. ໃນຂະນະດຽວກັນ, ທ່ານ ສະເຫຼີມໄຊ ກົມມະສິດ ກໍໄດ້ສະແດງຄວາມຂອບໃຈ ແລະ ຮູ້ບຸນຄຸນ ໂດຍຜ່ານທ່ານທູດ ໄປຍັງລັດຖະບານ ນິວຊີແລນ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນຫຼາຍດ້ານ, ເປັນຕົ້ນແມ່ນທາງດ້ານການພັດທະນາຊັບພະຍາກອນມະນຸດ, ໂຄງການສົ່ງເສີມກິດຈະກຳການທ່ອງທ່ຽວ ໄລຍະ 1 ແລະ ໄລຍະ 2 ແຕ່ປີ 2015-2020 (Lao Tourism Support Activity), ໂຄງການເກັບກູ້ລະເບີດທີ່ບໍ່ທັນແຕກ (UXO) ແລະ ການຊ່ວຍເຫຼືອໃນການກະກຽມຄວາມພ້ອມທາງດ້ານບຸກຄະລາກອນໃຫ້ແກ່ ສປປ ລາວ ເພື່ອເປັນເຈົ້າພາບຈັດກອງປະຊຸມ ອາຊຽນ ໃນປີ 2016 ທີ່ໄດ້ຮັບຜົນສຳເລັດຢ່າງຈົບງາມ.
ພ້ອມກັນນັ້ນ, ທ່ານລັດຖະມົນຕີ ຍັງໄດ້ສະແດງຄວາມຊົມເຊີຍທີ່ ທ່ານທູດ ໄດ້ຖືກແຕ່ງຕັ້ງເປັນຮອງຫົວໜ້າຫ້ອງການກະຊວງການຕ່າງປະເທດ ນິວຊີແລນ ທີ່ຮັບຜິດຊອບຂົງເຂດອາເມລິກາ ແລະ ອາຊີ, ແລະ ເຊື່ອໝັ້ນວ່າ ພາຍຫຼັງທີ່ ທ່ານທູດ ເດີນທາງກັບຄືນປະເທດແລ້ວ ຈະສືບຕໍ່ສົ່ງເສີມ ແລະ ຊຸກຍູ້ການພົວພັນ ແລະ ຮ່ວມມື ລາວ-ນິວຊີແລນ ໃຫ້ນັບມື້ຂະຫຍາຍຕົວຍິ່ງໆຂຶ້ນ.
ໃນໂອກາດດັ່ງກ່າວ, ທ່ານທູດ ເບັນ ຄິງ ກໍໄດ້ສະແດງຄວາມຂອບໃຈຕໍ່ ທ່ານລັດຖະມົນຕີ ທີ່ສະຫຼະເວລາໃຫ້ກຽດຕ້ອນຮັບ ການເຂົ້າຢ້ຽມອຳລາໃນຄັ້ງນີ້, ພ້ອມທັງໄດ້ແຈ້ງໃຫ້ຊາບ ກ່ຽວກັບ ການເຊື້ອເຊີນ ທ່ານລັດຖະມົນຕີ ສະເຫຼີມໄຊ ກົມມະສິດ ໄປຢ້ຽມຢາມ ນິວຊີແລນ ໃນເວລາທີ່ເໝາະສົມ.