ກອງປະຊຸມສາມັນປະຈຳປີ ຄັ້ງທີ XXVII ຄະນະຜູ້ແທນຊາຍແດນ ລາວ-ຫວຽດນາມ ໄດ້ຈັດຂຶ້ນຢາງເປັນທາງການ ໃນລະຫວ່າງວັນທີ 9 ທັນວາ 2017, ທີ່ນະຄອນຫຼວງຮ່າໂນ້ຍ, ສສ ຫວຽດນາມ. ຄະນະຜູ້ແທນຊາຍແດນຝ່າຍລາວ ນຳໂດຍທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນ ສປປ ລາວ ແລະ ຝ່າຍຫວຽດນາມນຳໂດຍທ່ານ ເລ ຮວ່າຍ ຈູງ, ກຳມະການສູນກາງພັກ, ຮອງລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນ ສສ ຫວຽດນາມ. ເຂົ້າຮ່ວມກອງປະຊຸມຄັ້ງນີ້ຍັງມີຜູ້ຕາງໜ້າຈາກບັນດາກະຊວງ, ຂະແໜງການທີ່ກ່ຽວຂ້ອງຈາກສູນກາງ ແລະ ທ້ອງຖິ່ນໂດຍມີທ່ານຮອງເຈົ້າແຂວງຜູ້ຊີ້ນໍາວຽກງານຊາຍແດນຈາກ 10 ຄູ່ແຂວງ ທີ່ມີຊາຍແດນຕິດຈອດກັນເຂົ້າຮ່ວມ.
ກອງປະຊຸມຄັ້ງນີ້, ໄດ້ຈັດຂຶ້ນໃນທ່າມກາງບັນຍາກາດ ແຫ່ງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໄດ້ຮັບການເພີ່ມພູນຄູນສ້າງ ແລະ ຂະຫຍາຍຕົວເຂົ້າສູ່ລວງເລິກຢ່າງບໍ່ຢຸດຢັ້ງ ແລະ ແມ່ນປີສາມັກຄີມິດຕະພາບ ລາວ-ຫວຽດນາມ ທີ່ໄດ້ຮ່ວມກັນສະເຫຼີມສະຫຼອງ 2 ວັນປະຫັວດສາດ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 55 ປີ .
ກອງປະຊຸມໄດ້ທົບທວນຄືນການຈັດຕັ້ງປະຕິບັດສັນຍາ ວ່າດ້ວຍການຄຸ້ມຄອງຊາຍແດນ ແລະ ດ່ານຊາຍແດນ ລະຫວ່າງ ປະເທດລາວ-ຫວຽດນາມ ແລະບົດບັນທຶກກອງປະຊຸມຄະນະຜູ້ແທນຊາຍແດນ ລາວ-ຫວຽດນາມ ຄັ້ງນີ້ XXVI ໃນໜຶ່ງປີຜ່ານມາ, ຊຶ່ງສອງຝ່າຍໄດ້ສະຫຼຸບ, ສັງເກດຕີລາຄາຢ່າງຮອບດ້ານ ກ່ຽວກັບວຽກງານການຄຸ້ມຄອງຊາຍແດນ, ການພັດທະນາເສດຖະກິດ, ການຄ້າ, ວັດທະນະທຳ ແລະ ທ່ອງທ່ຽວຊາຍແດນ, ການເຊື່ອມຕໍ່ເສັ້ນຄົມມະນາຄົມ, ການເຂົ້າ-ອອກຜ່ານແດນ, ການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນ ລາວ-ຫວຽດນາມ, ຊຶ່ງໄດ້ປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບຄວາມສາມັກຄີແບບພິເສດ ແລະ ການຮ່ວມມືຮອບດ້ານທີ່ເປັນມູນເຊື້ອ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ມາແຕ່ດົນນານແລ້ວນັ້ນ ເພື່ອສ້າງຊາຍແດນຂອງສອງປະເທດໃຫ້ກາຍເປັນຊາຍແດນແຫ່ງສັນຕິພາບມິດຕະພາບ ແລະ ການຮ່ວມມືພັດທະນາແບບຍືນຍົງ.
ໃນກອງປະຊຸມນີ້, ສອງຝ່າຍໄດ້ເປັນເອກະພາບກັນວາງທິດທາງແຜນການປະຕິບັດວຽກງານໃນຕໍ່ໜ້າ ກ່ຽວກັບວຽກງານການຄຸ້ມຄອງຊາຍແດນລະຫວ່າງສອງປະເທດ ໂດຍຈະຊຸກຍູ້ໃຫ້ພາກສ່ວນທີ່ກ່ຽວຂ້ອງສະກັດກັ້ນບັນດາປະກົດການຫຍໍ້ທໍ້ ທີ່ເກີດຂຶ້ນຕາມບໍລິເວນຊາຍແດນສອງປະເທດໃຫ້ທັນການ ແລະ ມີປະສິດທິຜົນຂຶ້ນຕື່ມ, ພ້ອມກັນນ້ັນ, ສອງຝ່າຍຈະສຸມໃສ່ວຽກງານໂຄສະນາເຜີຍແຜ່ລະບຽບການຄຸ້ມຄອງຊາຍແດນ, ການປົກປັກຮັກເສັ້ນຊາຍແດນ ແລະ ຫຼັກໝາຍຊາຍແດນປະເທດ ໃຫ້ແກ່ປະຊາຊົນຢູ່ຕາມ ບໍລິເວນຊາຍແດນເຂົ້າໃຈແຈ້ງ ກ່ຽວກັບເຂດອຳນາດອະທິປະໄຕ ແລະ ຜືນແຜນດິນອັບຄົບຖ້ວນຂອງຊາດ; ສອງຝ່າຍຈະເພີ່ມທະວີບັນດາມາດຕະການຊຸກຍູ້ໃຫ້ເສດຖະກິດ, ການຄ້າ, ວັດທະນະທຳ, ການທ່ອງທ່ຽວຢູ່ຕາມບໍລິເວນຊາຍແດນໃຫ້ມີການຂະຫຍາຍຕົວ, ຂຶ້ນແຜນ ແລະ ພັດທະນາດ່ານ, ການພັດທະນາລະບົບເສັ້ນທາງຄົມມະນາຄົມ; ເພີ່ມທະວີການຈັດຕັ້ງປະຕິບັດຂໍ້ຕົກລົງລະດັບລັດຖະບານ ວ່າດ້ວຍການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນລາວ-ຫວຽດນາມ ໃຫ້ບັນລຸຕາມເປົ້າໝາຍທີ່ວາງໄວ້.