ໃນວັນທີ 10 ມັງກອນ 2018, ສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະສອງຝ່າຍກັບ ສະຫາຍ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສສ. ຫວຽດນາມ, ໃນໂອກາດເຂົ້າຮ່ວມກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2, ທີ່ ພະນົມເປັນ, ຣາຊະອານາຈັກ ກໍາປູເຈຍ.

ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງ ແລະ ສະແດງຄວາມຊົມເຊີຍ ຕໍ່ຜົນສໍາເລັດອັນຈົບງາມ ແລະ ຮອບດ້ານ ໃນການຮ່ວມກັນຈັດບັນດາກິດຈະກໍາ ສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ໃນປີ 2017 ຜ່ານມາ ດ້ວຍບັນຍາກາດຟົດຟຶ້ນ, ມີຄວາມໝາຍຄວາມສໍາຄັນ ແລະ ເຕັມໄປດ້ວຍເນື້ອໃນຄວາມເຂົ້າອົກເຂົ້າໃຈ, ຊ່ວຍເຫຼືອຊຶ່ງກັນແລະກັນ; ພ້ອມທັງສະແດງຄວາມຊົມເຊີຍຕໍ່ໝາກຜົນການປະສານສົມທົບ ແລະ ການແລກປ່ຽນຄວາມຄິດເຫັນ ໃນຂອບຂອງກອງປະຊຸມຕ່າງໆທີ່ປິ່ນອ້ອມ ເປັນຕົ້ນແມ່ນການເຂົ້າຮ່ວມກອງປະຊຸມໃນຄັ້ງນີ້, ເຊິ່ງເຮັດໃຫ້ຜົນຂອງກອງປະຊຸມຜູ້ນໍາ ແມ່ນໍ້າຂອງ-ແມ່ນໍ້າລ້ານຊ້າງ ໄດ້ຮັບຜົນສໍາເລັດຢ່າງຈົບງາມ. ນອກນີ້, ສອງຝ່າຍຍັງໄດ້ປຶກສາຫາລື ແລະ ແລກປ່ຽນຄໍາຄິດເຫັນຮ່ວມກັນ ເພື່ອກະກຽມໃຫ້ແກ່ສອງກອງປະຊຸມໃຫຍ່ ທີ່ຈະຈັດຂຶ້ນໃນເດືອນກຸມພາ 2018 ນີ້, ຄື: ກອງປະຊຸມສອງກົມການເມືອງ ແລະ ກອງປະຊຸມຄະນະກໍາມະທິການຮ່ວມມື ລາວ-ຫວຽດນາມ ຄັ້ງທີ 40. ພ້ອມນັ້ນ, ສອງຝ່າຍຈະສືບຕໍ່ຊຸກຍູ້ການພົວພັນຮ່ວມມືສອງປະເທດ ລາວ-ຫວຽດນາມ ໃນປີ 2018 ແລະ ຕໍ່ໜ້າ ໃຫ້ມີບັນຍາກາດຟົດຟື້ນ ແລະ ມີໝາກຜົນກວ່າເກົ່າ.

ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ສະແດງຄວາມຂອບອົກຂອບໃຈຢ່າງສູງ ມາຍັງ ສະຫາຍ ຫງວຽນ ຊວັນ ຟຸກ ທີ່ໄດ້ເອົາໃຈໃສ່ຊຸກຍູ້ ແລະ ຊີ້ນໍາບັນດາຂະ ແໜງການກ່ຽວຂ້ອງຂອງຫວຽດນາມ ໃຫ້ມີການລົງນາມໃນສັນຍາ ລະຫວ່າງ ລັດຖະບານ ແຫ່ງ ສປປ ລາວ ແລະ ສສ. ຫວຽດນາມ, ພົ້ນເດັ່ນແມ່ນ ໂຄງການກໍ່ສ້າງຫໍສະພາແຫ່ງຊາດ ຫຼັງໃໝ່ຂອງລາວ.

ໃນໂອກາດດຽວກັນ, ສະຫາຍ ຫງວຽນ ຊວັນ ຟຸກ ກໍໄດ້ຖືໂອກາດນີ້ ສະແດງຄວາມຊົມເຊີຍຕໍ່ ລັດຖະບານລາວ ໃນການເຂົ້າຮັບເປັນປະທານຮ່ວມຂອງ ສປປ ລາວ ກັບ ສປ ຈີນ ສໍາລັບຂອບການຮ່ວມມື ແມ່ນນໍ້າຂອງ-ແມ່ນໍ້າລ້ານຊ້າງ ສົກປີ 2018-2020 ແລະ ອວຍພອນໃຫ້ການເປັນປະທານຮ່ວມ ຈົ່ງປະສົບຜົນສໍາເລັດຢ່າງຈົບງາມ.

ໃນວັນດຽວກັນ, ສະຫາຍ ທອງລຸນ ສີສຸລິດ ຍັງໄດ້ພົບປະສອງຝ່າຍກັບ ສະຫາຍ ລີ ເຄີ້ສຽງ, ນາຍົກລັດຖະມົນຕີ ແຫ່ງ ສປ ຈີນ. ໃນການພົບປະດັ່ງກ່າວ, ສອງຝ່າຍໄດ້ຕີລາຄາສູງຕໍ່ຜົນສໍາເລັດອັນຈົບງາມໃນການຢ້ຽມຢາມທາງລັດຖະກິດ ແຫ່ງ ສປປ ລາວ ຂອງ ສະຫາຍ ສີ ຈິ້ນຜິງ, ເລຂາທິການໃຫຍ່, ປະທານປະເທດ ແຫ່ງ ສປ ຈີນ ໃນລະຫວ່າງວັນທີ 13-14 ພະຈິກ 2017 ຜ່ານມາ ແລະ ເຫັນດີສືບຕໍ່ຜັນຂະຫຍາຍຜົນການຢ້ຽມຢາມດັ່ງກ່າວ ໃຫ້ໄດ້ຮັບໝາກຜົນສູງສຸດ, ໂດຍສະເພາະແມ່ນສືບຕໍ່ຈັດຕັ້ງປະຕິບັດ 17 ໂຄງການ ທີ່ສອງຝ່າຍໄດ້ຕົກລົງກັນແລ້ວ ໃຫ້ສໍາເລັດຕາມເປົ້າໝາຍທີ່ວາງໄວ້, ເປັນຕົ້ນແມ່ນ ໂຄງການລົດໄຟລາວ-ຈີນ ທີ່ເປັນໂຄງການຍຸດທະສາດ ແລະ ມີຄວາມໝາຍສໍໍາຄັນລະຫວ່າງສອງປະເທດ ກໍຄືພາກພື້ນ. ພ້ອມນີ້, ສອງຝ່າຍໄດ້ປຶກສາຫາລືກັນ ເພື່ອໃຫ້ການເປັນປະທານຮ່ວມຂອງ ສປປ ລາວ ກັບ ສປ ຈີນ ໃນຂອບການຮ່ວມມືແມ່ນນໍ້າຂອງ-ແມ່ນໍ້າລ້ານຊ້າງ ສົກປີ 2018-2020 ນີ້ ໃຫ້ໄດ້ຮັບຜົນສໍາເລັດຢ່າງຈົບງາມ. ນອກນີ້, ສອງຝ່າຍຍັງໄດ້ປຶກສາຫາລື ແລະ ແລກປ່ຽນຄໍາຄິດເຫັນ ກ່ຽວກັບ ການຈະຈັດງານວາງສະແດງສາກົນ ການນໍາເຂົ້າຂອງຈີນ (China International Import EXPO), ທີ່ຈະຈັດຂຶ້ນໃນເດືອນພະຈິກ 2018 ນີ້, ທີ່ ນະຄອນຊຽງໄຮ, ສປ ຈີນ, ຊຶ່ງ ສະຫາຍ ທອງລຸນ ສີສຸລິດ ກໍຈະນໍາພາຄະນະຜູ້ແທນລາວ ເຂົ້າຮ່ວມງານດັ່ງກ່າວ.

ໃນຕອນທ້າຍ, ທັງສອງຝ່າຍຕ່າງກໍ່ອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ລະຫວ່າງ ສປປ ລາວ ແລະ ສປ ຈີນ ຈົ່ງສຶບຕໍ່ຈະເລີນງອກງາມຍິ່ງໆຂຶ້ນ.