ໃນຕອນເຊົ້າ ຂອງວັນທີ 24 ກຸມພາ 2018, ຢູ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂາໍ່ນັບຂອງຄະນະຜູ້ແທນລັດຖະສະພາ ສະຫະລັດ ອາເມລິກາ, ນຳໂດຍ ທ່ານ Bob Goodlatte, ປະ ທານກຳມາທິການຕຸລາການ, ໃນໂອກາດເດີນທາງມາເຄື່ອນໄຫວຢ້ຽມຢາມ ສປປລາວ ໃນລະຫວ່າງວັນທີ 23-25 ກຸມພາ 2018.
ການເດີນທາງມາຢ້ຽມຢາມ ສປປ ລາວ ຂອງລັດຖະສະພາ ສະຫະລັດ ອາເມລິກາ ຄັ້ງນີ້ ແມ່ນຄະນະທີ່ສອງ ຖັດຈາກຄະນະກຳມາທິການຈັດສັນງົບປະມານ. ໃນໂອກາດດັ່ງກ່າວນີ້, ທ່ານລັດຖະ ມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ສປປ ລາວ ຂອງຄະນະລັດຖະສະພາສະຫະລັດ, ຊຶ່ງເປັນໂອກາດທີ່ສຳຄັນໃນການປຶກສາຫາລື ເພື່ອຊອກຊ່ອງທາງເພີ້ມທະວີການພົວພັນ ແລະ ຮ່ວມມືສອງຝ່າຍ ໂດຍສະເພາະໃນວຽກງານນິຕິ ບັນຍັດຂອງສອງປະເທດໃນຕໍ່ໜ້າ. ນອກນັ້ນ, ຍັງໄດ້ປຶກສາຫາລືໃນບັນຫາທີ່ຕ່າງຝ່າຍມີຄວາມສົນໃຈຮ່ວມກັນຢ່າງກົງໄປກົງມາ ເພື່ອເປັນການເສີມຂະຫຍາຍການພົວພັນ-ຮ່ວມມື ລະຫວ່າງ ສອງປະເທດ. ໃນໂອກາດນີ້, ທ່ານລັດຖະມົນຕີ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນ ສະຫະລັດ ອາເມລິກາ ທີ່ໄດ້ໃຫ້ການຮ່ວມມືຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະວຽກງານເກັບກູ້ລູກລະເບີດທີ່ຍັງບໍ່ທັນແຕກ, ການສຶກສາ, ສາທາລະນະສຸກ, ການຄວບຄຸມ ແລະ ປາບປາມຢາເສບຕິດ ກໍຄື ໃນດ້ານການບັງຄັບໃຊ້ກົດໝາຍ ແລະ ອື່ນໆ.
ໃນລະຫວ່າງການເດີນທາງມາຢ້ຽມຢາມ ສປປ ລາວ ຄັ້ງນີ້, ທ່ານປະທານກຳມາທິການຕຸລາ ການ ຍັງໄດ້ເຂົ້າຢ້ຽມຂ່ຳນັບ ທ່ານ ນ. ປານີ ຢາທໍ້ຕູ້, ປະທານສະພາແຫ່ງຊາດ, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແລະ ພົບປະສອງຝ່າຍກັບ ທ່ານ ສຈ. ດຣ. ເອກສະຫວ່າງ ວົງວິຈິດ, ປະທານກຳມາທິການ ການຕ່າງປະເທດ ເພື່ອຮັດແໜ້ນການພົວພັນ ຮ່ວມມື ລະຫວ່າງ ສປປ ລາວ - ສະຫະລັດ ອາເມລິກາ ໃຫ້ແໜ້ນແຟ້ນຍິ່ງຂຶ້ນ. ຄະນະຜູ້ແທນລັດຖະສະພາອາເມລິກາຍັງໄດ້ໄປຢ້ຽມ ຢາມສູນການແພດຟື້ນຟູໜ້າທີ່ການ(COPE) ທີ່ນະຄອນຫຼວງວຽງຈັນ.