ໃນວັນທີ 18 ມີນາ 2018 ທີ່ ຊິດນີ, ອົດສະຕຣາລີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມສຸດຍອດ ອາຊຽນ-ອົດສະຕຣາລີ ສະໄໝພິເສດ ພາຍໃຕ້ຄຳຂວັນ: “ສົ່ງເສີມຄວາມໝັ້ນຄົງ ແລະ ຄວາມສົມບູນພູນສຸກຂອງພາກພື້ນ”.
ໃນກອງປະຊຸມສຸດຍອດຄັ້ງນີ້, ບັນດາຜູ້ນໍາ ອາຊຽນ ແລະ ອົດສະຕຣາລີ ໄດ້ຕີລາຄາສູງຕໍ່ໝາກຜົນຂອງການຮ່ວມມື ລະຫວ່າງອາຊຽນ ແລະ ອົດສະຕຣາລີ ຕະຫຼອດໄລຍະ 44 ປີຜ່ານມາ ກວມເອົາຂົງເຂດການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທໍາ-ສັງຄົມ ຊຶ່ງມີຄວາມຄືບຫນ້າເທື່ອລະກ້າວ ແລະ ຈົນສາມາດບັນລຸການຍົກລະດັບການພົົວພັນຂຶ້ນເປັນຄູ່ຮ່ວມຍຸດທະສາດໃນປີ 2014. ສຳລັບທິດທາງ ການຮ່ວມມືອາຊຽນ-ອົດສະຕຣາລີ ໃນຕໍ່ໜ້າ, ກອງປະຊຸມໄດ້ເຫັນດີສືບຕໍ່ຮັດແໜ້ນ ການເປັນຄູ່ຮ່ວມຍຸດທະສາດອາຊຽນ-ອົດສະຕຣາລີ ໂດຍສຸມໃສ່ເພີ່ມທະວີການຮ່ວມມືໃນຂະແຫນງ ທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນ ເປັນຕົ້ນແມ່ນ ດ້ານການສຶກສາ, ການພັດທະນາຊັບພະຍາກອນມະນຸດ, ການຄ້າແລະການລົງທຶນ, ການຮ່ວມມືລະຫວ່າງພາກທຸລະກິດ, ການຮັດແຄບຄວາມແຕກໂຕນດ້ານການພັດທະນາ, ການເຊື່ອມຈອດພາກພື້ນ ໂດຍສະເພາະແມ່ນການພັດທະນາໂຄ່ງລ່າງພື້ນຖານທີ່ມີຄຸນນະພາບ ແລະ ຍືນຍົງ, ສົ່ງເສີມການໄປມາຫາສູ່ກັນລະຫວ່າງປະຊາຊົນອາຊຽນ ແລະ ອົດສະຕຣາລີ,ແລະ ການຮ່ວມມືເພື່ອຮັບມີກັບບັນຫາອາດຊະຍາກຳຂ້າມຊາດ.
ໃນໂອກາດນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນບາງຈຸດສຳຄັນ ເປັນຕົ້ນແມ່ນ ການສົ່ງເສີມການສຶກສາ ກໍຄື ການພັດທະນາຊັບພະຍາກອນມະນຸດ ຊຶ່ງໃນນັ້ນໄດ້ຕີລາຄາສູງຕໍ່ການຊ່ວຍເຫຼືອດ້ານການສຶກສາຂອງອົດສະຕຣາລີ ຕໍ່ບັນດາປະເທດສະມາຊິກອາຊຽນ ລວມທັງ ສປປ ລາວ ໃນຮູບແບບທຶນການສຶກສາ ແລະ ຝຶກອົບຮົມໃນດ້ານຕ່າງໆ ລວມທັງ ແຜນການຮ່ວມມືດ້ານການສຶກສາ ໂຄລັມໂບ (New Colombo Plan) ຊຶ່ງມີປະສິດທິຜົນດີ, ພ້ອມທັງສະເໜີໃຫ້ ອົດສະຕຣາລີ ສືບຕໍ່ໃຫ້ການຊ່ວຍເຫຼືອໃນຂົງເຂດການສຶກສາເປັນຈຸດໜັກ. ນອກນັ້ນ, ຍັງໄດ້ຊົມເຊີຍຕໍ່ຄວາມໝາຍໝັ້ນຂອງອົດສະຕຣາລີ ທີ່ຈະໃຫ້ການຮ່ວມມື ແລະ ຊ່ວຍເຫຼືອອາຊຽນ ເພື່ອຫຼຸດຜ່ອນຄວາມແຕກໂຕນດ້ານການພັດທະນາພາຍໃນອາຊຽນ ແລະ ສະເໜີໃຫ້ອົດສະຕຣາລີ ສືບຕໍ່ສຸມໃສ່ເພີ່ມທະວີການຮ່ວມມືກັນ ໃນຂະແຫນງການທີ່ອົດສະຕຣາລີ ມີທ່າແຮງ ເຊັັ່ນ: ດ້ານການເຊື່ອມຈອດ, ດ້ານກະສິກໍາ ໂດຍສະເພາະ ການຖ່າຍທອດເຕັກໂນໂລຊີ ການຜະລິດໃນຂະແໜງການກະສິກຳສະອາດ, ອຸດສະຫະກຳປຸງແຕ່ງກະສິກຳ ແລະ ສົ່ງເສີມການເຂົ້າເຖິງຕະຫຼາດພາກພື້ນ ແລະ ສາກົນ ຂອງຜະລິດຕະພັນກະສິກຳຈາກປະເທດສະມາຊິກອາຊຽນ ແລະ ອື່ນໆ.
ພ້ອມດຽວກັນນັ້ນ, ບັນດາຜູ້ນຳອາຊຽນ ແລະ ອົດສະຕຣາລີ ໄດ້ປຶກສາຫາລື ກ່ຽວກັບ ການຮ່ວມມື ດ້ານເສດຖະກິດລະຫວ່າງອາຊຽນ ແລະ ອົດສະຕຣາລີ ແລະ ໄດ້ເຫັນດີເພີ່ມທະວີການຮ່ວມມືເພື່ອການເຊື່ອມໂຍງເສດຖະກິດພາກພື້ນ ໂດຍສະເພາະການສ້າງຂີດຄວາມສາມາດ ແລະ ການຈັດຕັ້ງປະຕິບັດມາດຕະການຫຼຸດຜ່ອນສິ່ງກີດຂວາງດ້ານການຄ້າ ພາຍໃຕ້ສັນຍາເຂດການຄ້າເສລີອາຊຽນ-ອົດສະຕຣາລີ-ນິວຊີແລນ ແລະ ການເລັ່ງລັດການເຈລະຈາສັນຍາການເປັນຄູ່ຮ່ວມເສດຖະກິດຮອບດ້ານພາກພື້ນ. ໃນໂອກາດດັ່ງກ່າວ, ບັນດາຜູ້ນຳອາຊຽນ ແລະ ອົດສະຕຣາລີ ໄດ້ຮັບຊາບ ແລະ ຊົມເຊີຍຕໍ່ຜົນສຳເລັດຂອງກອງປະຊຸມສຸດຍອດພາກທຸະກິດອາຊຽນ-ອົດສະຕຣາລີ ໂດຍການເຂົ້າຮ່ວມຂອງບັນດາຫົວໜ່ວຍທຸລະກິດຂອງ ອາຊຽນ ແລະ ອົດສະຕຣາລີ.
ບັນດາຜູ້ນຳອາຊຽນ ແລະ ອົດສະຕຣາລີ ຍັງໄດ້ປຶກສາຫາລື ກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ. ກອງປະຊຸມ ໄດ້ຊົມເຊີຍຕໍ່ ຜົນສໍາເລັດຂອງກອງປະຊຸມ ວ່າດ້ວຍການຕ້ານການກໍ່ການຮ້າຍ ໂດຍມີ ທ່ານລັດຖະມົນຕີ ສົມແກ້ວ ສີລາວົງ ເຂົ້າຮ່ວມ ແລະ ເຫັນວ່າ ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືຕ້ານການກໍ່ການຮ້າຍ ລະຫວ່າງ ອາຊຽນ ແລະ ອົດສະຕຣາລີ ທີ່ໄດ້ລົງນາມຮັບຮອງເອົາໃນໂອກາດນີ້ ຈະເປັນພື້ນຖານອັນສໍາຄັນ ໃຫ້ແກ່ການຮ່ວມມືໃນຂົງເຂດດັ່ງກ່າວໃນຕໍ່ໜ້າ.
ໃນກອງປະຊຸມຄັ້ງນີ້, ບັນດາຜູ້ນຳອາຊຽນ ແລະ ອົດສະຕຣາລີ ໄດ້ເຫັນດີຮັບຮອງເອົາຖະແຫຼງການຮ່ວມ ກອງປະຊຸມສຸດຍອດ ອາຊຽນ-ອົດສະຕຣາລີ ສະໄຫມພິເສດ ຫລື ຖະແຫລງການຊິດນີ ເພື່ອເປັນທິດເຍືອງທາງໃນການເສີມຂະຫຍາຍການເປັນຄູ່ຮ່ວມຍຸດທະສາດອາຊຽນ-ອົດສະຕຣາລີ ໃນຊຸມປີຕໍ່ໜ້າ.