ໃນໂອກາດເດີນທາງເຂົ້າຮ່ວມກອງປະຊຸມສຸດຍອດ ສະໄຫມພິເສດ ອາຊຽນ-ອົດສະຕຣາລີ ທີ່ ຊິດນີ, ປະເທດອົດສະຕຣາລີ ລະຫວ່າງວັນທີ 15-19 ມີນາ 2018, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ໄດ້ຕ້ອນຮັບການເຂົ້າຢ້ຽມຂ່ຳນັບຂອງພີ່ນ້ອງຄົນເຊື້ອຊາດລາວ ທີ່ດຳລົງຊີວິດ ຢູ່ ອົດສະຕຣາລີ ນໍາໂດຍ ທ່ານ ນາງ ໄພວັນ ພູມິນ ພົນເສນາ, ກຳມະການສູນກາງແນວລາວສ້າງຊາດ ປະຈຳ ອົດສະຕຣາລີ ປະມານເກືອບ 50 ທ່ານ, ໃນຕອນແລງຂອງວັນທີ 16 ມີນາ 2018.
ໃນການພົບປະໂອ້ລົມຄັ້ງນີ້, ພະນະທ່ານ ທອງລຸນ ສີສຸລິດ ໄດ້ເນັ້ນໃຫ້ເຫັນວ່າ: ພັກ ແລະ ລັດຖະບານ ຍາມໃດກໍຖືວ່າ ພີ່ນ້ອງຄົນເຊື້ອຊາດລາວ ຢູ່ຕ່າງປະເທດ ແມ່ນວົງຄະນະຍາດແຫ່ງຊາດລາວ ທີ່ບໍ່ສາມາດຕັດແຍກອອກກັນໄດ້, ເປັນກໍາລັງແຮງໜຶ່ງປະກອບສ່ວນເຂົ້າໃນການສ້າງສາພັດທະນາປະເທດຊາດ, ເປັນປັດໃຈ ແລະ ຂົວຕໍ່ທີ່ສໍາຄັນໃນການຊຸກຍູ້ການພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ລາວ ແລະ ອົດສະຕຣາລີ ໃຫ້ແຫນ້ນແຟ້ນຍິ່ງໆຂຶ້ນ. ພັກ-ລັດຖະບານລາວ ມີນະໂຍບາຍສົ່ງເສີມ ແລະ ອຳນວຍຄວາມສະດວກໃຫ້ແກ່ພີ່ນ້ອງເຊື້ອຊາດລາວຢູ່ຕ່າງປະເທດ ໄດ້ກັບໄປຢ້ຽມຢາມບ້ານເກີດເມືອງນອນຂອງຕົນ, ພົບປະຍາດພີ່ນ້ອງ, ເຂົ້າຮ່ວມກິດຈະກໍາສະເຫລີມສະຫລອງວັນສຳຄັນຕ່າງໆຂອງຊາດ ກໍຄືໂອກາດການມີສ່ວນຮ່ວມໃນການພັດທະນາສ້າງສາປະເທດຊາດ ແລະ ຊຸກຍູ້ໃຫ້ຊີວິດການເປັນຢູ່ຂອງປະຊາຊົນລາວ ນັບມື້ດີຍິ່ງຂຶ້ນ.
ການພົບປະຄັ້ງນີ້ ເຕັມໄປດ້ວຍບັນຍາກາດໄມຕີຈິດມິດຕະພາບ, ຊຶ່ງພີ່ນ້ອງຄົນເຊື້ອຊາດລາວ ຢູ່ ອົດສະຕຣາລີ ຕ່າງກໍໃຫ້ຄວາມສົນໃຈ ຕໍ່ການພັດທະນາເສດຖະກິດ-ສັງຄົມຂອງ ສປປ ລາວ, ລວມທັງປະກອບສ່ວນໃນການເຜີຍແຜ່ໂຄສະນາວັດທະນະທໍາ, ຮີດຄອງປະເພນີອັນດີງາມຂອງລາວ ແລະ ຍັງມີຄວາມສົນໃຈຢາກປະກອບສ່ວນເຂົ້າໃນການສ້າງສາພັດທະນາປະເທດຊາດ ບໍ່ວ່າຈະດ້ວຍຮູບການເຂົ້າມາລົງທຶນຢູ່ລາວ ແລະ ເປັນອາສາສະຫມັກເຂົ້າມາຊ່ວຍເຫລືອສັງຄົມລາວເຮົາ.
ຄົນເຊື້ອຊາດລາວ ທີ່ດຳລົງຊີວິດຢູ່ ອົດສະຕຣາລີ ມີຫລາຍກວ່າ 15.000 ຄົນ, ຊຶ່ງປະກອບອາຊີບຢູ່ໃນຂະແຫນງການວິຊາຊີບຕ່າງໆ, ນອກນັ້ນ, ຍັງມີຈຳນວນໜຶ່ງມີລະດັບການສຶກສາສູງ ແລະ ເຂົ້າເຮັດວຽກຢູ່ໃນກົງຈັກລັດຂອງອົດສະຕຣາລີ, ແລະ ມີການຈັດຕັ້ງທັງຫມົດ 16 ສະມາຄົມ.