ໃນເວລາ 09:00 ໂມງ ວັນທີ 20 ມີນາ 2018 ທີ່ສະຖານທູດຫວຽດນາມ ຢູ່ນະຄອນຫຼວງວຽງຈັນ, ສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍການນຳຂັ້ນສູງຂອງລາວ ໄດ້ຕາງໜ້າ ພັກ, ລັດຖະບານ, ສະພາແຫ່ງຊາດ ແລະ ສູນກາງແນວລາວສ້າງຊາດ ເຂົ້າວາງພວງມາລາ ແລະ ຂຽນປື້ມໄຫວ້ອາໄລ ຕໍ່ການເສຍຊີວິດ ຂອງ ສະຫາຍ ຟານ ວັນ ຄາຍ, ອະດີດຄະນະບໍລິຫານງານສູນກາງພັກຄອມມູນິດຫວຽດນາມ ສະໄໝ ທີ V, VI, VII, VIII, IX; ອະດີດກໍາມະການກົມການເມືອງສູນກາງພັກຄອມມູນິດຫວຽດນາມ ສະໄໝ ທີ VII, VIII, IX; ອະດີດຄະນະປະຈຳກົມການເມືອງສະໄໝທີ VIII; ອະດີດນາຍົກລັດຖະມົນຕີ ແຫ່ງ ສສ.ຫວຽດນາມ, ທັງເປັນອະດີດສະມາຊິກສະພາແຫ່ງຊາດຫວຽດນາມ ສະໄໝ ທີ VIII, IX, X, XI.
ສະຫາຍ ຟານ ວັນ ຄາຍ ເປັນໜຶ່ງໃນການນຳຫວຽດນາມ ທີ່ມີຄວາມປີຊາສາມາດ ແລະ ໄດ້ປະກອບສ່ວນສຳຄັນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດຫວຽດນາມ ເປັນເວລາຫຼາຍກວ່າ 70 ປີ. ສະຫາຍ ເປັນຜູ້ທີ່ມີການປະກອບສ່ວນອັນໃຫຍ່ຫຼວງໃຫ້ແກ່ພາລະກິດປ່ຽນແປງໃໝ່ຂອງຫວຽດນາມ. ສະຫາຍ ຟານ ວັນ ຄາຍ ຍັງເປັນຜູ້ໜຶ່ງທີ່ປະກອບສ່ວນສຳຄັນ ໃຫ້ແກ່ການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຕະຫຼອດມາ.
ໃນວັນດຽວກັນ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດ ໄດ້ນຳພາ ບັນດາຄະນະກົມໃນກະຊວງການຕ່າງປະເທດ ໄປວາງພວງມາລາ ແລະ ຂຽນປື້ມໄຫວ້ອາໄລ ທີ່ສະຖານທູດຫວຽດນາມ ທີ່ນະຄອນຫຼວງວຽງຈັນ ເຊັ່ນກັນ.