ໃນຕອນເຊົ້າຂອງ ວັນທີ 28 ມີນາ 2018, ທີ່ ກະຊວງການຕ່າງປະເທດ ໄດ້ຈັດພິທີມອບບັດໃຫ້ສະມາຊິກພັກ ຊຸດທີ VII ແລະ ປາຖະກະຖາ ປະຫວັດມູນເຊື້ອວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 63 ປີ (22/03/1955– 22/03/2018), ໂດຍພາຍໃຕ້ການເປັນປະທານຂອງ ສະຫາຍ ສະເຫລີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການຕ່າງປະເທດ. ມີບັນດາຄະນະພັກ, ຄະນະນຳ, ສະມາຊິກພັກ, ພະນັກງານ - ລັດຖະກອນ ທົ່ວກະຊວງເຂົ້າຮ່ວມຢ່າງພ້ອມພຽງ.

ໃນໂອກາດນີ້ ສະຫາຍ ສະເຫລີມໄຊ ກົມມະສິດ, ໄດ້ໃຫ້ກຽດຂຶ້ນມອບບັດໃຫ້ສະມາຊິກພັກ ຈຳນວນ 82 ສະຫາຍ, ຍິງ 21 ສະຫາຍ ໃນຈຳນວນສະມາຊິກພັກທີ່ໄດ້ຮັບບັດ ທັງໝົດ 675 ສະຫາຍ, ຊຶ່ງກວມເອົາ 90 % ແລະ ມີຄຳເຫັນໂອ້ລົມຕໍ່ສະມາຊິກພັກຜູ້ທີ່ໄດ້ຮັບບັດໃນຄັ້ງນີ້, ຊຶ່ງກ່ອນອື່ນ ສະຫາຍປະທານໄດ້ສະແດງຄວາມຍ້ອງຍໍຊົມເຊີຍມາຍັງ ບັນດາຮາກຖານພັກ ທີ່ໄດ້ເອົາໃຈໃສ່ຊຸກຍູ້ກໍ່ສ້າງສະມາຊິກພາຍໃນໜ່ວຍຂອງຕົນ ຈົນສາມາດປະຕິບັດໄດ້ຕາມມາດຖານ, ເງື່ອນໄຂຮັບບັດ. ພ້ອມກັນນີ້, ຍັງຍົກໃຫ້ເຫັນຄວາມໝາຍສຳຄັນຂອງບັດສະມາຊິກພັກ, ບັນດາມາດຖານ, ເງື່ອນໄຂຕ່າງໆຂອງສະມາຊິກພັກຜູ້ທີ່ຈະໄດ້ຮັບບັດ ແລະ ລວມທັງການຄຸ້ມຄອງນຳໃຊ້ບັດສະມາຊິກພັກໃຫ້ຖືກຕ້ອງ.

ໃນໂອກາດດຽວກັນນີ້ ສະຫາຍ ສະເຫລີມໄຊ ກົມມະສິດ, ຍັງໄດ້ປາຖະກະຖາ ເລົ່າປະຫວັດມູນເຊື້ອການກຳເນີດ ແລະ ການເຕີບໃຫຍ່ຂະຫຍາຍຕົວຂອງພັກປະຊາຊົນປະຕິວັດລາວ, ໂດຍຍົກໃຫ້ເຫັນ ມູນເຊື້ອອັນອົງອາດສະຫຼາດສ່ອງໃສຂອງພັກ ທີ່ໄດ້ນຳພາກອງທັບ ແລະ ປະຊາຊົນລາວບັນດາເຜົ່າດຳເນີນການຕໍ່ສູ້ຍາດເອົາເອກະລາດ, ອຳນາດ, ອະທິປະໄຕ ແລະ ຄວາມມີອິດສະຫຼະພາບມາສູ່ປະຊາຊົນລາວບັນດາເຜົ່າ, ຍົກໃຫ້ເຫັນວິວັດທະນາການແຫ່ງການກໍ່ຕັ້ງປັບປຸງເຕີບໃຫຍ່ ແລະ ຂະຫຍາຍຕົວ, ຜົນງານວິລະກຳອັນລ້ຳເລີດ, ທາດແທ້ມູນເຊື້ອອັນສະຫງ່າງາມຂອງພັກ.ຕະຫຼອດໄລຍະຜ່ານມາເພື່ອແນ່ໃສ່ສຶກສາອົບຮົມໃຫ້ສະມາຊິກພັກ-ພະນັກງານໃຫ້ຮັບຮູ້ເຂົ້າໃຈຢ່າງເລິກເຊິ່ງ, ພ້ອມກັນນັ້ນ ເອົາໃຈໃສ່ສຶບຕໍ່ຮັກສາ ແລະເສີມຂະຫຍາຍທາດແທ້ມູນເຊື້ອອັນດີງາມຂອງພັກຕະຫຼອດໄປ, ຊາດລາວແມ່ນຊາດໜຶ່ງທີ່ມີປະຫວັດແຫ່ງການກຳເນີດ, ຄົງຕົວ ແລະຂະຫຍາຍຕົວຍາວນານມານັບຫຼາຍພັນປີ, ມີປະຫວັດອັນເກົ່າແກ່, ມີມູນເຊື້ອທີ່ສະຫງ່າອົງອາດ ແລະ ຈົບງາມມາແຕ່ບູຮານນະການ ເຊັ່ນ:ມູນເຊື້ອດຸໜັ່ນໃນການອອກແຮງງານ, ມູນເຊື້ອສາມັກຄີປອງດອງ, ມູນເຊື້ອຮັກເຊື້ອແພງຊາດ, ມູນເຊື້ອວັດທະນາທຳທີ່ ເປັນເອກະລັກອັນດີງາມຂອງຊາດ ແລະອັນພົ້ນເດັ່ນກວ່າໝູ່ແມ່ນມູນເຊື້ອແຫ່ງການຕໍ່ສູ້ບໍ່ຍອມຈຳນົນຕ້ານການຮຸກຮານຂອງສັດຕູ ຢ່າງເດັດດ່ຽວໜຽວແໜ້ນ ຂອງບັນດາບັນພະບູລຸດລາວເຮົາໃນການທ້ອນໂຮມ, ປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຄວາມຢູ່ເຢັນເປັນສຸກຂອງປະຊາຊົນລາວບັນດາເຜົ່າໃນແຕ່ລະຍຸກແຕ່ລະສະໄໝ ສືບທອດຕໍ່ກັນມາຈົນເຖິງປັດຈຸບັນ. ພັກປະຊາຊົນປະຕິວັດລາວ ແມ່ນພັກຂອງຊົນຊັ້ນກຳມະກອນ ເປັນຕົວແທນທີ່ຈົ່ງຮັກພັກດີສິດຜົນປະໂຫຍດຂອງຊົນຊັ້ນກຳມະກອນ ຊາວຜູ້ອອກແຮງງານ ລາວທີ່ຮັກຊາດ ແລະ ຂອງຊາດລາວທັງໝົດ, ພັກປະຊາຊົນປະຕິວັດລາວຍຶດໜັ້ນລັດທິມາກ-ເລນິນ ແລະ ມູນເຊື້ອອັນດີງາມຂອງພັກເປັນພື້ນຖານແຫຼ່ງແນວຄິດເປັນເຂັມທິດໃຫ້ແກ່ການຈັດຕັ້ງ ແລະ ການເຄື່ອນໄຫວຂອງພັກເສີມຂະຫຍາຍລັດທິຮັກຊາດອັນແທ້ຈິງສົມທົບກັບລັດທິສາກົນອັນຜ່ອງໃສຂອງຊົນຊັ້ນກຳມະກອນ ຮັບເອົາສິ່ງຍອດຍິ່ງທາງດ້ານສະຕິປັນຍາທີ່ກ້າວໜ້າ ຂອງມະນຸດເພື່ອກຳນົດແນວທາງແຜນການນະໂຍບາຍຂອງພັກ ຍົກສູງຄວາມສາມາດ ແລະຄຸນະພາບການຊີ້ນຳ-ນຳພາຂອງພັກ ຕ້ານລະບອບຫຼາຍເຄົ້າຫຼາຍພັກ ຕ້ານລັດທິເອກະຊົນ ແລະຕ້ານລັດທິສວຍໂອກາດໃນທຸກຮູບແບບ.ນັບແຕ່ມື້ສ້າງຕັ້ງຂຶ້ນພັກປະຊາຊົນປະຕິວັດລາວ ໄດ້ກຳນົດອຸດົມການຂອງຕົນຢ່າງຈະແຈ້ງຄື: ນຳພາປວງຊົນລາວດຳເນີນການ ຕໍ່ສູ້ຕ້ານພວກຈັກກະພັດລ່າເມືອງຂຶ້ນ ເພື່ອນຳເອົາຄວາມເປັນເອກະລາດມາໃຫ້ແກ່ປະເທດຊາດ ແລະ ສິດເປັນເຈົ້າມາໃຫ້ປະຊາຊົນສ້າງສາປະເທດຊາດ ກ້າວຂຶ້ນສູ່ຈຸດ   ໝາຍສັງຄົມນິຍົມ. ປະຈຸບັນ ພັກເຮົາໄດ້ເສີມຂະຫຍາຍອຸດົມການໃຫ້ມີຄວາມສອດຄ່ອງຕື່ມອີກຄື: ນຳພາທົ່ວປວງຊົນລາວປົກປັກຮັກສາ ແລະ ພັດທະນາປະເທດຊາດ ເຮັດໃຫ້ປະຊາຊົນຮັ່ງມີຜາສຸກ ປະເທດຊາດມັ່ງຄັ່ງເຂັ້ມແຂງ ສັງຄົມສາມັກຄີປອງດອງ, ປະຊາທິປະໄຕ, ຍຸຕິທຳ ແລະສີວິໄລ.ພ້ອມນັ້ນ ສະຫາຍປະທານ ຍັງໄດ້ເນັ້ນໜັກໃຫ້ຄະນະພັກ-ຄະນະນຳ, ສະມາຊິກພັກ-ພະນັກງານລັດຖະກອນ ກະຊວງການຕ່າງປະເທດ ຈົ່ງພ້ອມກັນເອົາໃຈໃສ່ຕັ້ງໜ້າສຶກສາຄົ້ນຄວ້າ, ເຊື່ອມຊຶມ ແລະ ກຳແໜ້ນເອົາແນວທາງນະໂຍບາຍປ່ຽນແປງໃໝ່ຂອງພັກ ແລະ ປະກອບສ່ວນຢ່າງຕັ້ງໜ້າໃນການຜັນຂະຫຍາຍເນື້ອໃນຈິດໃຈ ມະຕິກອງປະຊຸມໃຫຍ່ ຄັ້ງທີ Xຂອງພັກ ເຂົ້າໃນໜ້າທີ່ການເມືອງໃນກົມກອງ ແລະ ວຽກງານຂອງຕົນດ້ວຍຈິດໃຈ ບຸກທະລຸຢ່າງແຂງແຮງເຮັດໃຫ້ ມີຜົນສຳເລັດຢ່າງຕັ້ງໜ້າ.