ເພື່ອເປັນການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ແລະ ການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ, ທ່ານ ທະໂຣ ໂຄໂນະ (H.E Mr. Taro KONO), ລັດຖະມົນຕີກະຊວງການຕ່າງປະເທດຍີ່ປຸ່ນ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ, ໃນລະຫວ່າງວັນທີ 07-08 ເມສາ 2018.
ໃນວັນທີ 07 ເມສາ 2018, ທີ່ ກະຊວງການຕ່າງປະເທດ, ໄດ້ມີການພົບປະສອງຝ່າຍ ລະຫວ່າງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ທະໂຣ ໂຄໂນະ, ລັດຖະມົນຕີຕ່າງປະເທດຍີ່ປຸ່ນ. ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືຂອງສອງປະເທດ ລາວ-ຍີ່ປຸ່ນ ໃນຖານະເປັນຄູ່ຮ່ວມຍຸດທະສາດ ທີ່ນັບມື້ນັບຂະຫຍາຍຕົວຂຶ້ນຢ່າງບໍ່ຢຸດຢັ້ງ, ເຂົ້າສູ່ລວງກວ້າງ, ລວງເລິກ ແລະ ເປັນຮູບປະທຳຍິ່ງຂຶ້ນ, ເຊິ່ງເຫັນໄດ້ຈາກມີການແລກປ່ຽນການຢ້ຽມຢາມ ແລະ ໄປມາຫາສູ່ກັນຢ່າງເປັນປົກກະຕິຂອງການນຳຂັ້ນສູງ ແລະ ຂັ້ນຕ່າງໆ ນັບແຕ່ສູນກາງລົງຮອດທ້ອງຖິ່ນ, ໂດຍສະເພາະ ສອງກະຊວງການຕ່າງປະເທດ ໄດ້ມີການພົບປະກັນຢ່າງຕໍ່ເນື່ອງ ຊຶ່ງສະແດງໃຫ້ເຫັນເຖິງຄວາມໃກ້ຊິດຕິດແທດ ແຫ່ງຄວາມເປັນຄູ່ຮ່ວມຍຸດທະສາດຂອງສອງປະເທດ ລາວ-ຍີ່ປຸ່ນ. ພ້ອມກັນນີ້, ສອງຝ່າຍ ຍັງໄດ້ສະແດງຄວາມຍິນດີທີ່ສອງປະເທດ ໄດ້ມີການຮ່ວມມືເພື່ອພັດທະນາ ສປປ ລາວ ແບບຍືນຍົງຮ່ວມກັນ, ເຊິ່ງແຜນການດັ່ງກ່າວ ກຳລັງດຳເນີນການຄຽງຄູ່ກັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 ຂອງ ສປປ ລາວ ຊຶ່ງໄດ້ນຳເອົາໝາກຜົນເປັນຮູບປະທຳມາສູ່ປະຊາຊົນລາວຢ່າງແທ້ຈິງ. ສອງຝ່າຍ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມລິເລີ່ມການຄົ້ນຄວ້າດ້ານນະໂຍບາຍ ເພື່ອສ້າງສະຖຽນລະພາບດ້ານການເງິນໃຫ້ແກ່ ສປປ ລາວ, ພ້ອມທັງສະແດງຄວາມຊົມເຊີຍ ທີ່ເຫັນວ່າການຄ້າສອງຝ່າຍ ມີທ່າອ່ຽງເພີ່ມຂຶ້ນທຸກປີ, ນັກລົງທຶນຍີ່ປຸ່ນ ສົນໃຈມາລົງທຶນຢູ່ລາວ ຫຼາຍຂຶ້ນ ໂດຍສະເພາະໃນຂະແໜງກະສິກຳ, ອຸດສະຫະກຳ ແລະ ຫັດຖະກຳ, ອຸດສາຫະກຳໄມ້ ແລະ ການບໍລິການ. ປັດຈຸບັນ, ການລົງທຶນຂອງຍີ່ປຸ່ນ ຢູ່ ສປປ ລາວ ມີ 101 ໂຄງການ, ມູນຄ່າການລົງທຶນ 158 ລ້ານໂດລາສະຫະລັດ, ຈັດຢູ່ໃນອັນດັບທີ 14 ໃນ 52 ປະເທດທີ່ມາລົງທຶນຢູ່ ສປປ ລາວ.
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ທ່ານລັດຖະມົນຕີຕ່າງ ປະເທດຍີ່ປຸ່ນ ແລະ ຄະນະທີ່ມາຢ້ຽມຢາມ ສປປ ລາວ ໃນຄັ້ງນີ້, ພ້ອມທັງໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈຢ່າງເລິກເຊິ່ງ ຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ມາໂດຍຕະຫຼອດ, ຊຶ່ງເປັນການປະກອບສ່ວນອັນສຳຄັນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງ ສປປ ລາວ, ໂດຍສະເພາະຍີ່ປຸ່ນ ຍັງໄດ້ໃຫ້ການຊ່ວຍເຫຼືອທາງການເພື່ອການພັດທະນາ (ODA) ຈຳນວນ 90-100 ລ້ານໂດລາສະຫະລັດ ຕໍ່ປີ, ຊຶ່ງຍັງເປັນອັນດັບ 1 ຂອງຕ່າງປະເທດ ທີ່ໃຫ້ທຶນຊ່ວຍເຫຼືອລ້າແກ່ ສປປ ລາວ ໂດຍສະເພາະການຊ່ວຍເຫຼືອໃນການພັດທະນາພື້ນຖານໂຄງລ່າງ, ຊັບພະຍາກອນມະນຸດ, ສາທາລະນະສຸກ, ກະສິກຳ-ປ່າໄມ້ ແລະ ອື່ນໆ, ລວມທັງການຜັນຂະຫຍາຍແຜນການ ການເຊື່ອມໂຍງເຂົ້າພາກພື້ນຂອງ ສປປ ລາວ ເປັນຕົ້ນແມ່ນ ໂຄງການສຶກສາອອກແບບຄວາມເປັນໄປໄດ້ໃນການສ້າງເສັ້ນທາງດ່ວນ ວຽງຈັນ-ຮ່າໂນ້ຍ ແລະ ໂຄງການຂະຫຍາຍສະໜາມບິນສາກົນວັດໄຕ ຊຶ່ງຈະສຳເລັດການກໍ່ສ້າງໃນເດືອນມີຖຸນາ 2018 ນີ້, ພ້ອມທັງສະແດງຄວາມຂອບໃຈຕໍ່ການຊ່ວຍເຫຼືອໃນດ້ານອື່ນໆເຊັ່ນ: ໂຄງການຊ່ວຍເຫຼືອທາງດ້ານການຄຸ້ມຄອງເສດຖະກິດມະຫາພາກ, ໂດຍສະເພາະການສ້າງຄວາມອາດສາມາດການເກັບລາຍຮັບເຂົ້າງົບປະມານແຫ່ງຊາດ, ການຄຸ້ມຄອງການເກັບພາສີ ແລະ ການຄຸ້ມຄອງໜີ້ສິນພາກລັດ; ການຊ່ວຍເຫຼືອສ້າງຂີດຄວາມສາມາດໃຫ້ແກ່ບຸກຄະລາກອນ ແລະ ການນຳຂັ້ນສູງຂອງ ສປປ ລາວ, ການສ້າງຂີດຄວາມສາມາດໃນວຽກງານປ້ອງກັນຊາດ, ປ້ອງກັນຄວາມສະຫງົບ; ການສົ່ງຊ່ຽວຊານ ແລະ ອາສາສະໝັກຍີ່ປຸ່ນ ມາຊ່ວຍເຫຼືອ ສປປ ລາວ, ຊຶ່ງນັບແຕ່ປີ 1965 ເປັນຕົ້ນມາ ໄດ້ມີຊ່ຽວຊານຫຼາຍກວ່າ 4500 ຄົນ ແລະ ອາສາສະໝັກ 978 ຄົນ ມາຊ່ວຍເຫຼືອຂະ ແໜງການຕ່າງໆຂອງ ສປປ ລາວ.
ໃນໂອກາດດຽວກັນ, ທ່ານ ທາໂຣ ໂຄໂນະ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ທັງໃນຂອບການຮ່ວມມືສອງຝ່າຍ ແລະ ຫລາຍຝ່າຍ; ພ້ອມທັງສະແດງຄວາມຍິນດີສືບຕໍ່ໃຫ້ການຮ່ວມມືກັບຝ່າຍລາວ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ແລະ ການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ໃຫ້ນັບມື້ນັບກ້າວເຂົ້າສູ່ລວງເລິກ.
ພາຍຫຼັງສຳເລັດການພົບປະສອງຝ່າຍ, ສອງລັດຖະມົນຕີກະຊວງການຕ່າງປະເທດ ລາວ ແລະ ຍີ່ປຸ່ນ ກໍໄດ້ຖະແຫລງຂ່າວຮ່ວມ ຕໍ່ສື່ມວນຊົນຂອງລາວ ແລະ ຍີ່ປຸ່ນ ກ່ຽວກັບ ຜົນສຳເລັດຂອງການພົບປະສອງຝ່າຍໃນຄັ້ງນີ້. ຫຼັງຈາກນັ້ນ, ທ່ານລັດຖະມົນຕີ ທະໂຣ ໂຄໂນະ ແລະ ຄະນະ ຍັງໄດ້ຮັບກຽດເຂົ້າຢ້ຽມຂ່ຳນັບ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ທີ່ ສຳນັກງານນາຍົກລັດຖະມົນຕີ. ໃນໂອກາດຢ້ຽມຢາມ ສປປ ລາວ ໃນຄັ້ງນີ້, ທ່ານ ທະໂຣ ໂຄໂນະ ພ້ອມດ້ວຍຄະນະ ຍັງໄດ້ໄປຢ້ຽມຊົມໂຄງການຂະຫຍາຍອາຄານສະໜາມບິນສາກົນວັດໄຕ, ຢ້ຽມຢາມສູນການແພດຟື້ນຟູໜ້າທີການ (COPE) ແລະ ຢ້ຽມຢາມສະໜາມຝຶກຊອບກິລາບານເຕະຂອງນັກກິລາພິການຕາ.