ໃນວັນທີ 11 ເມສາ 2018, ກະຊວງການຕ່າງປະເທດ ໄດ້ຈັດພິທີບາສີສູ່ຂວັນສະເຫຼີມສະຫຼອງບຸນປີໃຫມ່ລາວຂຶ້ນ ທີ່ ສວນອາຫານພອຍໄພລິນ, ເມືອງສີໂຄດຕະບອງ, ນະຄອນຫລວງວຽງຈັນ, ເພື່ອເປັນການສົ່ງທ້າຍປີເກົ່າ ພ.ສ 2560 ແລະ ຕ້ອນຮັບປີໃໝ່ ພ.ສ 2561. ໃນການສະເຫຼີມສະຫຼອງບຸນປະເພນີປີໃໝ່ລາວໃນຄັ້ງນີ້ ໂດຍການເປັນກຽດເຂົ້າຮ່ວມຂອງ ທ່ານ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ, ຄະນະພັກ-ຄະນະນຳກະຊວງ ພ້ອມດ້ວຍຄູ່ສົມລົດ, ພະນັກງານອາວຸໂສບຳນານ, ບັນດາຄະນະຫ້ອງການ-ຄະນະກົມ, ຄະນະພະແນກ, ອົງການຈັດຕັ້ງຊາວໜຸ່ມ, ແມ່ຍິງ ແລະ ກຳມະບານ ແລະ ພະນັກງານວິຊາການກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ. ພ້ອມດຽວກັນນັ້ນ, ບັນດາທູຕານຸທູດ, ກົງສູນກິດຕິມະສັກ, ຜູ້ຕາງໜ້າອົງການຈັດຕັ້ງສາກົນ ປະຈຳສ ສປປ ລາວ ພ້ອມດ້ວຍຄູ່ສົມລົດ ແລະ ແຂກທີ່ມີກຽດຈຳນວນໜຶ່ງ ກໍ່ຖືກເຊີນເຂົ້າຮ່ວມ.
ໃນໂອກາດສະເຫຼີມສະຫຼອງສົ່ງທ້າຍປີເກົ່າ ແລະ ຕ້ອນຮັບປີໃໝ່ຄັ້ງນີ້, ທ່ານ ສະເຫຼີມໄຊ ກົມມະສິດ ຕາງໜ້າໃຫ້ຄະນະພັກ, ຄະນະນຳກະຊວງການຕ່າງປະເທດ ໄດ້ມີຄຳເຫັນອວຍພອນປີໃໝ່ລາວ ຕໍ່ບັນດາພະນັກງານ ແລະ ແຂກທີ່ມີກຽດດ້ວຍຄວາມຮັກແພງ ແລະ ສະໜິດສະໜົມ. ພ້ອມນີ້, ທ່ານລັດຖະມົນຕີ ຍັງໄດ້ສະແດງຄວາມຮູ້ບຸນຄຸນ ແລະ ຂອບໃຈ ທຸກໆທ່ານ ໃນໄມຕີຈິດມິດຕະພາບອັນແໜ້ນແຟ້ນ, ການສະໜັບສະໜູນອັນລໍ້າຄ່າ ແລະ ການຮ່ວມມືຢ່າງຕໍ່ເນື່ອງ ທີ່ມີຕໍ່ກະຊວງການຕ່າງປະເທດ ກໍ່ຄື ສປປ ລາວ ຈາກບັນດາປະເທດເພື່ອນມິດ, ອົງການຈັດຕັ້ງສາກົນ ແລະ ຫວັງຢ່າງຍິ່ງວ່າຈະໄດ້ສືບຕໍ່ຮັບການສະໜັບສະໜູນ ແລະ ຮ່ວມມືຈາກທຸກພາກສ່ວນທັງພາຍໃນ ແລະ ຕ່າງປະເທດ ເພື່ອບັນລຸຜົນສໍາເລັດອັນໃຫມ່ກໍ່ຄື ຄວາມຕັ້ງໜ້າຂອງ ສປປ ລາວ ທີ່ຈະຫຼຸດພົ້ນອອກຈາກບັນຊີປະເທດດ້ອຍພັດທະນາໃນປີ 2020 ແລະ ບັນລຸເປົ້າໝາຍ SDG ຂອງ ສປຊ ທີ່ວາງອອກ, ຊຶ່ງໃນປັດຈຸບັນ ກະຊວງການຕ່າງປະເທດ ກໍາລັງເຄື່ອນໄຫວຢ່າງຕັ້ງໜ້າ, ຈັດຕັ້ງຜັນຂະຫຍາຍມະຕິຂອງກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8, ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງການຕ່າງປະເທດ ແລະ ບັນດາແຜນງານໂຄງການຂອງກອງປະຊຸມວຽກງານການຕ່າງປະເທດ ຄັ້ງທີ XIII ໃຫ້ປະກົດຜົນເປັນຈິງ ໂດຍຈັດຕັ້ງປະຕິບັດນະໂຍບາຍການຕ່າງປະເທດ ແລະ ການທູດຂອງ ສປປ ລາວ. ໃນນັ້ນ, ສປປ ລາວ ແມ່ນໄດ້ມີການເຄື່ອນໄຫວວຽກງານການຕ່າງປະເທດຢ່າງຫ້າວຫັນ ຮ່ວມກັບບັນດາປະເທດເພື່ອນມິດ ໃນຂອບການຮ່ວມມືສອງຝ່າຍ ແລະ ຫຼາຍຝ່າຍ, ໂດຍສະເພາະກັບບັນດາປະເທດເພື່ອນມິດອາຊຽນ ຊຶ່ງໃນປີ 2018 ນີ້ ພາຍໃຕ້ການເປັນປະທານອາຊຽນຂອງປະເທດສິງກະໂປນັ້ນ, ສປປ ລາວ ແມ່ນພ້ອມແລ້ວທີ່ຈະໃຫ້ການສະໜັບສະໜູນ ແລະ ເຮັດວຽກຮ່ວມກັນຢ່າງໃກ້ຊິດ ເພື່ອສົ່ງເສີມສາຍພົວພັນມິດຕະພາບ ແລະ ການຮ່ວມມືໃນກຸ່ມອາຊຽນ ເພື່ອເຮັດໃຫ້ອາຊຽນ ນັບມື້ເຕີບໃຫຍ່ຂະຫຍາຍຕົວ, ພ້ອມກັນນີ້ ກໍ່ຍັງເປັນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໃຫ້ປະກົດຜົນເປັນຈິງ. ພິເສດ, ການຈັດພິທີສະເຫຼີມສະຫຼອງບຸນປີ ໃໝ່ລາວປີນີ້ ກໍ່ພ້ອມພໍດີຖືກກັບປີທ່ອງທ່ຽວລາວ 2018, ພີທີດັ່ງກ່າວ ໄດ້ກາຍເປັນເວທີເຜີຍແຜ່ຮີດຄອງປະເພນີວັດທະນະທຳອັນດີງາມຂອງຊາດລາວເຮົາຕໍ່ສາກົນ. ໃນໂອກາດນີ້ ທ່ານລັດຖະມົນຕີ ກໍຫວັງວ່າບັນດາທູດ ແລະ ຜູ້ຕາງໜ້າສາກົນຢູ່ລາວ ຈະຊ່ວຍເຊີນຊວນນັກທ່ອງທ່ຽວປະເທດຂອງຕົນ ແລະ ປະເທດຕ່າງໆ ໃຫ້ມາທ່ອງທ່ຽວຢ້ຽມຢາມລາວ ນັບມື້ຫຼາຍຂຶ້ນ.
ໃນຕອນທ້າຍ ທ່ານລັດຖະມົນຕີ ກໍໄດ້ອວຍພອນໄຊອັນປະເສີດ ໃນໂອກາດສະເຫຼີມສະຫຼອງປີໃໝ່ລາວ ໃນຄັ້ງນີ້ ໃຫ້ແກ່ ຄະນະພັກ, ຄະນະນຳກະຊວງ ພ້ອມດ້ວຍຄູ່ສົມລົດ, ພະນັກງານອາວຸໂສບຳນານ, ບັນດາຄະນະກົມ ພ້ອມດ້ວຍຄູ່ສົມລົດ, ຄະນະພະແນກ, ຊາວໜຸ່ມ, ແມ່ຍິງ, ກຳມະບານກະຊວງ ແລະ ພະນັກງານວິຊາການຈາກກະຊວງການຕ່າງ ປະເທດ, ບັນດາທູຕານຸທູດ, ກົງສຸນກິດຕິມະສັກ ກໍຄື ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ພ້ອມດ້ວຍຄູ່ສົມລົດ, ລວມທັງບັນດາແຂກທີ່ຖືກເຊີນ ຈົ່ງມີສຸຂະພາບເຂັ້ມແຂງ, ມີພະລະນາໄມສົມບູນ, ມີຜົນສໍາເລັດອັນໃໝ່ໃນໜ້າທີ່ວຽກງານ ແລະ ຄວາມຜາສຸກໃນຊີວິດຂອງຕົນ ແລະ ຄອບຄົວ ທຸກປະການຕະຫຼອດປີ ພ.ສ 2561 ນີ້.
ຈາກນັ້ນ, ກໍໄດ້ມີພິທີບາສີສູ່ຂວັນ ອວຍພອນປີໃໝ່ເຊິ່ງກັນ ແລະ ກັນ, ຮ່ວມຮັບປະທານອາຫານທ່ຽງ, ຊົມການສະແດງສິນລະປະ ແລະ ປະກອບສ່ວນມ່ວນຊື່ນຮ່ວມກັນຢ່າງຄຶກຄື້ນ, ດ້ວຍໄມຕີຈິດມິດຕະພາບອັນດີ ແລະ ມີຄວາມ ໝາຍສຳຄັນ ເຊິ່ງເຮັດໃຫ້ພິທີສະຫລອງປີໃຫມ່ ພ.ສ 2561 ຄັ້ງນີ້ ມີບັນຍາກາດຟົດຟື້ນມ່ວນຊື່ນ ລະຫວ່າງ ພະນັກງານກະຊວງການຕ່າງປະເທດ, ບັນດາທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ.