ໃນ​ຕອນ​ເຊົ້າ​ຂອງ​ວັນ​ທີ 11 ພຶດສະພາ 2018, ທີ່ກະຊວງ​ການ​ຕ່າງປະ​ເທດ,​ ທ່ານ ​ສະເຫຼີມໄຊ ກົມມະສິດ, ລັດຖະມົນຕີ​ກະຊວງ​ການ​ຕ່າງປະ​ເທດ, ​​ໄດ້ຕ້ອນຮັບ​ການ​ເຂົ້າ​ຢ້ຽມ​ອຳ​ລາ​ຂອງ​ ທ່ານ Francesco Saverio NISIO, ເອກອັກຄະລັດຖະທູດ ແຫ່ງ ສາທາລະນະລັດ ອິຕາລີ, ​​ໃນ​ໂອກາດ​ທີ່​ ທ່ານ ສໍາ​ເລັດ​ການ​ປະຕິບັດ​ໜ້າ​ທີ່​ເປັນ​ເອກ​ອັກຄະ​ລັດຖະທູດວິສາມັນຜູ້ມີອຳນາດເຕັມ ແຫ່ງ ​ສາທາລະນະລັດ ອິຕາລີ ປະຈໍາ    ສປປ ລາວ, ທີ່​ມີ​ສຳນັກງານ​ຕັ້ງ​ຢູ່ ​ບາງກອກ, ປະເທດໄທ.

ໃນ​ໂອກາດດັ່ງກ່າວ​, ​ທ່ານລັດ​ຖະມົນຕີກະຊວງ​ການ​ຕ່າງປະ​ເທດ ​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ ​ແລະ ຊົມ​ເຊີຍ​ຕໍ່​ຜົນສຳ​ເລັດ​ຂອງ​ ທ່ານ​ທູດ ​ຕະຫຼອດ​ໄລຍະການດຳລົງ​ຕຳ​ແໜ່​ງ​ເປັນເອກ​ອັກຄະ​ລັດຖະທູດ ແຫ່ງ ສາທາລະນະລັດ ອິຕາລີ ປະຈຳ ສປປ ລາວ, ພ້ອມ​ທັງ​ສະ​ແດງ​ຄວາມ​ຂອບ​ໃຈ​ ຕໍ່​ຄວາມ​ພະຍາຍາມເຄື່ອນໄຫວ​ຂອງ​ທ່ານ ​ໃນ​ການ​ຊຸກຍູ້ ​ແລະ ​ເສີມ​ຂະຫຍາຍ​ສາຍ​ພົວພັນ ​ແລະ ການ​ຮ່ວມ​ມື​ ລະຫວ່າງ​ສອງ​ປະ​ເທດ​ ລາວ-ອິຕາລີ ​ໃຫ້​ນັບ​ມື້​ນັບ​ດີ​ຂຶ້ນ​ເລື້ອຍໆ. ທ່ານລັດຖະມົນຕີ ໄດ້​ຕີລາຄາສູງຕໍ່ການຊ່ວຍເຫຼືອຂອງ ລັດຖະບານ ແລະ ປະຊາຊົນ ອິຕາລີ ທີ່ມີຕໍ່ ສປປ ລາວ ໃນໄລຍະຜ່ານມາ ໃນຂອບສອງຝ່າຍ ແລະ ຫຼາຍຝ່າຍ, ເປັນຕົ້ນແມ່ນໂຄງ​ການປະຕິສັງຂອນ​ມໍ​ລະ​ດົກ​ໂລກວັດ​ພູຈຳປາ​ສັກ ແລະ ມໍ​ລະ​ດົກ​ໂລກຫຼວງພະ​ບາງ, ດ້ານ​ສະ​ບຽງ​ອາ​ຫານ​, ໂຄງການສູນຊີວະນາໆພັນທີ່ແຂວງບໍລິຄຳໄຊ.

          ໃນຕອນທ້າຍ​, ທ່ານ​ລັດຖະມົນຕີກະຊວງ​ການ​ຕ່າງປະ​ເທດ ​ໄດ້​ອວຍພອນໃຊອັນປະເສີດ​ໃຫ້ແກ່ ​ທ່ານ​ທູດ​ ຈົ່ງ​ມີ​ສຸຂະພາບ​ເຂັ້ມ​ແຂງ, ປະສົບ​ຜົນສຳ​ເລັດ​ໃນ​ໜ້າ​ທີ່ການງານ​​ໃໝ່ຂອງທ່ານ ​ແລະ ​ເດີນທາງ​ກັບ​ຄືນ​ປະ​ເທດ​ດ້ວຍ​ຄວາມ​ສະຫວັດດີ​ພາບທຸກປະການ.