ໃນຕອນເຊົ້າຂອງ ວັນທີ 25 ພຶດສະພາ 2018 ທີ່ກະຊວງການຕ່າງປະເທດຈັດພິທີມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານ ປະຈຳ ປີ 2017 ຈຳນວນ 04 ໜ່ວຍພັກ ແລະ ປາຖະກະຖາ ເອກະສານສະພາບການຊາຍແດນລາວ-ກຳປູເຈຍ, ໂດຍໃຫ້ກຽດເປັນປະທານ ຂອງສະຫາຍ ສະເຫລີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການຕ່າງປະເທດ. ມີບັນດາຄະນະພັກ, ຄະນະນຳ, ສະມາຊິກພັກ, ພະນັກງານ - ລັດຖະກອນ ທົ່ວກະຊວງເຂົ້າຮ່ວມຢ່າງພ້ອມພຽງ.
ໃນພິທີໄດ້ຮັບຟັງການລາຍງານຜົນສຳເລັດການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ແລະ ທິດທາງແຜນການໃນຕໍ່ໜ້າຂອງໜ່ວຍພັກຫ້ອງການກະຊວງການຕ່າງປະເທດ ແລະ ກົມພົວພັນຄົນເຊື້ອຊາດລາວຢູ່ຕ່າງປະເທດ. ເຊິ່ງການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ແມ່ນຄວາມຮຽກຮ້ອງຕ້ອງການທີ່ຈຳເປັນພາວະວິໄສ ແລະ ທັງສ່ອງແສງໃຫ້ເຫັນເຖິງການຄົງຕົວ ແລະ ການຂະຫຍາຍຕົວຂອງພັກ, ເຊີດຊູບົດບາດການນຳພາຂອງພັກໃຫ້ມີຜົນສັກສິດ ແລະ ທັງເປັນການເພີ່ມທະວີບົດບາດກຳລັງແຮງຂອງການຈັດຕັ້ງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ເພື່ອຍົກສູງຄຸນນະພາບການຈັດຕັ້ງພັກ ແລະ ໜ່ວຍພັກໃນການຊີ້ນຳ-ນຳພາ ໃຫ້ເຄື່ອນໄຫວຕາມພາລະບົດບາດຂອງຕົນ, ກໍ່ສ້າງຖັນແຖວສະມາ ຊິກພັກໃຫ້ມີຄວາມໜັກແໜ້ນ ແລະ ເປັນຫຼັກແຫຼ່ງໃນການຈັດຕັ້ງປະຕິບັດໜ້າທີ່ການເມືອງຢູ່ໃນໜ່ວຍພັກຂອງຕົນ, ເຊິ່ງແຕ່ລະໜ່ວຍພັກ ໄດ້ມີຄວາມເຂັ້ມແຂງດ້ານການເມືອງແນວຄິດ, ການຈັດຕັ້ງ ແລະ ແບບແຜນການນຳພາດ້ານວຽກງານວິຊາສະເພາະ ລວມທັງອົງການຈັດຕັ້ງມະຫາຊົນ, ຮູ້ນຳພາວຽກງານປ້ອງກັນພັກໃຫ້ມີຄວາມສະຫງົບຮຽບຮ້ອຍ, ນຳພາການປັງປຸງກໍ່ສ້າງຂະຫຍາຍສະມາຊິກພັກ ແລະ ກໍ່ສ້າງພະນັກງານຢ່າງຕໍ່ເນື່ອງ. ຈາກນັ້ນ ສະຫາຍ ສະເຫລີມໄຊ ກົມມະສິດ ກໍໄດ້ໃຫ້ກຽດຂຶ້ນມອບໃບຢັ້ງຢືນໜ່ວຍພັກເຂັ້ມແຂງ-ຮູ້ນຳພາຮອບດ້ານໃຫ້ແກ່ ໜ່ວຍພັກຫ້ອງການກະຊວງການຕ່າງປະເທດ ສະໄໝທີ II ແລະ ໜ່ວຍພັກກົມພົວພັນຄົນເຊື້ອຊາດລາວຢູ່ຕ່າງປະເທດ. ນອກຈາກນີ້, ຍັງມີ 02 ໜ່ວຍພັກຢູ່ຕ່າງປະເທດຄື: ໜ່ວຍພັກສະຖານທູດລາວ ທີ່ ພຽງຍາງ, ສປປ. ເກົາຫລີ ສະໄໝທີ II ແລະ ໜ່ວຍພັກສະຖານທູດລາວ ທີ່ ປັກກິ່ງ, ສປ. ຈີນ. ຊຶ່ງຈະໄດ້ຈັດພິທີມອບພາຍຫຼັງ. ໃນພິທີຍັງໄດ້ຮັບຟັງການໂອ້ລົມຈາກ ສະຫາຍເລຂາຄະນະບໍລິຫານງານພັກ, ທ່ານໄດ້ສະແດງຄວາມຍ້ອງຍໍຊົມເຊີຍມາຍັງ ບັນດາໜ່ວຍພັກທີ່ໄດ້ເອົາໃຈໃສ່ກໍ່ສ້າງໜ່ວຍພັກຂອງຕົນໃຫ້ໄດ້ຮັບນາມມະຍົດເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ແລະ ຍັງມີຫລາຍໜ່ວຍພັກ ທີ່ຈະຕ້ອງໄດ້ເອົາໃຈໃສ່ສືບຕໍ່ປັບປຸງກໍ່ສ້າງໜ່ວຍພັກຂອງຕົນ ເພື່ອໃຫ້ໄດ້ຮັບນາມມະຍົດໃນປີຕໍ່ໄປ. ພ້ອມກັນນີ້, ຍັງໄດ້ເນັ້ນໜັກຫຼາຍບັນຫາໃນການເພີ່ມທະວີການກໍ່ສ້າງໜ່ວຍພັກໃຫ້ປອດໃສ, ເຂັ້ມ ແຂງ, ໜັກແໜ້ນ ຕາມທິດຂອງພັກເຮົາໃນຕໍ່ໜ້າ.
ໃນໂອກາດດຽວກັນນີ້ ສະຫາຍ ສະເຫລີມໄຊ ກົມມະສິດ, ຍັງໄດ້ເຜີຍແຜ່ເອກະສານສະພາບການຊາຍແດນລາວ -ກຳປູເຈຍ ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ທົ່ວກະຊວງການຕ່າງປະເທດ ໄດ້ຮັບຮູ້, ເຂົ້າໃຈແຈ້ງ ແລະ ກຳແໜ້ນ ຕໍ່ບັນຫາ ແລະ ສະພາບການທີ່ເກີດຂື້ນ ລະຫວ່າງ ຊາຍແດນລາວ - ກຳປູເຈຍ. ພ້ອມກັນນີ້, ຈົ່ງເພີ່ມທະວີເປັນເຈົ້າ ການສືບຕໍ່ຮັກສາການພົວພັນຮ່ວມມືກັນແບບບ້ານໃກ້ເຮືອນຄຽງທີ່ດີ ຕາມແນວທາງນະໂຍບາຍຂອງພັກ-ລັດເຮົາ, ມີສະຕິ ລະວັງຕົວຕໍ່ການໂຄສະນາແບ່ງແຍກຄວາມສາມັກຄີ, ເດັດດຽວປົກປັກຮັກສາເຂດນ້ຳແດນດິນຂອງພວກເຮົາໄວ້ໃຫ້ໝັ້ນຄົງ ຕະຫຼອດໄປ.