ໃນວັນທີ 05 ມິຖຸນາ 2018, ທີ່ ສຳນັກງານນາຍົກລັດຖະມົນຕີ, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ດາໂຕະ ເອຣິວັນ ປິຮິນ ຢູໂຊບຟ໌ (Dato Erywan Pehin Yusof), ລັດຖະມົນຕີກະຊວງການຕ່າງປະເທດ ແລະ ການຄ້າ ຜູ້ທີ II ແຫ່ງ ບຣູໄນ ດາຣູຊາລາມ ພ້ອມດ້ວຍຄະນະ, ໃນໂອກາດທີ່ເດີນທາງມາຢ້ຽມຢາມສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມື ລາວ-ບຣູໄນ ຄັ້ງທີ 2, ໃນລະຫວ່າງວັນທີ 04-07ມິຖຸນາ 2018.
ການພົບປະຄັ້ງນີ້, ສອງຝ່າຍ ໄດ້ສະແດງຄວາມຍິນດີ ແລະ ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີງາມ ລະຫວ່າງສອງປະເທດ ທີ່ໄດ້ຮັບການພັດທະນາ ແລະ ຮັດແໜ້ນໃຫ້ເຂັ້ມແຂງຕະຫລອດ 25 ປີ ແຫ່ງການສ້າງຕັ້ງສາຍພົວພັນການທູດນຳກັນ (ວັນທີ 27 ກໍລະກົດ 1993), ຊຶ່ງເຫັນໄດ້ຈາກ ການແລກປ່ຽນຢ້ຽມຢາມຂອງການນຳຂັ້ນສູງ ລະຫວ່າງສອງປະເທດ ຢ່າງເປັນປົກກະຕິ, ພ້ອມທັງສະແດງຄວາມຊົມເຊີຍທີ່ສອງຝ່າຍ ມີແຜນຈະຈັດກິດຈະກຳຮ່ວມກັນ ເພື່ອສະເຫຼີມສະຫຼອງວັນສຳຄັນດັ່ງກ່າວ.
ໃນໂອກາດນີ້, ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ຕໍ່ການເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນຄັ້ງນີ້, ພ້ອມທັງສະແດງຄວາມຊົມເຊີຍທີ່ທ່ານ ດາໂຕະ ເອຣິວັນ ປິຮິນ ຢູໂຊບຟ໌ ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນ ລັດຖະມົນຕີກະຊວງການຕ່າງປະເທດ ແລະ ການຄ້າ ຜູ້ທີ II ແຫ່ງ ບຣູໄນ ດາຣູຊາລາມ ຄົນໃໝ່. ພ້ອມກັນນີ້, ພະນະທ່ານ ນາຍົກລັດຖະມົນຕີ ຍັງໄດ້ຝາກຄວາມຢື້ຢາມຖາມຂ່າວ ເຖິງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ແລະ ສະແດງຄວາມຍິນດີ ທີ່ຈະໄດ້ເດີນທາງໄປຢ້ຽມຢາມ ຢ່າງເປັນທາງການ ທີ່ ປະເທດ ບຣູໄນ ດາຣູຊາລາມ, ຊຶ່ງຈະເປັນຄັ້ງທຳອິດ ພາຍຫຼັງດຳລົງຕຳແໜ່ງເປັນ ນາຍົກລັດຖະມົນຕີ ແຫ່ງ ສປປ ລາວ. ໃນໂອກາດດັ່ງກ່າວນີ້, ພະນະທ່ານ ທອງລຸນ ສີສຸລິດ ຍັງໄດ້ສະແດງຄວາມຂອບໃຈ ຕໍ່ລັດຖະບານ ບຣູໄນ ທີ່ໄດ້ປະກອບສ່ວນຊ່ວຍເຫຼືອ ສປປ ລາວ ໃນດ້ານຕ່າງໆ ເຊັ່ນ: ການຊ່ວຍເຫຼືອດ້ານການເງິນ ແກ່ ສປປ ລາວ ໃນການເປັນເຈົ້າພາບຈັດກອງປະຊຸມສຸດຍອດອາເຊັມ ຄັ້ງທີ 9 ໃນປີ 2012 ແລະ ກອງປະຊຸມສຸດຍອດອາຊຽນ ໃນປີ 2016, ການຊ່ວຍເຫຼືອກໍ່ສ້າງອາຄານ ສະຫະພັນແມ່ຍິງ, ສູນຟື້ນຟູຄົນພິການ, ໂຮງຮຽນເດັກກຳພ້າ, ໂຮງຮຽນມັດທະຍົມ, ສູນປິ່ນປົວ ແລະ ຟື້ນຟູບຳບັດຜູ້ຕິດຢາເສບຕິດ, ກໍ່ສ້າງສະໜາມກິລາໃນຮົ່ມຄົບວົງຈອນສີເກີດ ແລະ ການຊ່ວຍເຫຼືອດ້ານການພັດທະນາຊັບພະຍາກອນມະນຸດ. ໃນຕອນທ້າຍ ພະນະທ່ານ ທອງລຸນ ສີສຸລິດ ໄດ້ອວຍພອນໃຫ້ການຢ້ຽມຢາມທາງການ ທີ່ ສປປ ລາວ ຄັ້ງນີ້ ກໍຄື ກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມື ລາວ-ບຣູໄນ ຄັ້ງທີ 2 ຈົ່ງປະສົບຜົນສຳເລັດຢ່າງຈົບງາມ.
ໃນໂອກາດດຽວກັນ, ທ່ານລັດຖະມົນຕີ ດາໂຕະ ເອຣິວັນ ປິຮິນ ຢູໂຊບຟ ກໍໄດ້ສະແດງຄວາມຂອບໃຈ ລັດຖະບານ ແຫ່ງ ສປປ ລາວ ຕໍ່ການຕ້ອນຮັບອັນອົບອຸ່ນ ໃນການມາຢ້ຽມຢາມທາງການ ສປປ ລາວ ໃນຄັ້ງນີ້ ແລະ ສະແດງຄວາມຍິນດີ ຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ໃຫ້ແໜ້ນແຟ້ນຍິ່ງໆຂຶ້ນ.
ໃນໂອກາດການຢ້ຽມຢາມ ສປປ ລາວ ຄັ້ງນີ້, ທ່ານ ດາໂຕະ ເອຣິວັນ ປິຮິນ ຢູໂຊບຟ໌ ພ້ອມດ້ວຍຄະນະ ຍັງໄດ້ພົບປະກັບບັນດາລັດຖະມົນຕີ ຂອງຂະແໜງການຕ່າງໆ ແຫ່ງ ສປປ ລາວ ແລະ ເຂົ້າຮ່ວມກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມື ລາວ-ບຣູໄນ ຄັ້ງທີ 2, ທີ່ ແຂວງຫລວງພະບາງ.