ໃນວັນທີ 19 ມິຖຸນາ 2018, ທີ່ ທໍານຽບປະທານປະເທດ, ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ນາງ ດັ້ງ ຖິ ຫງ໋ອກ ທິ້ງ, ກຳມະການຄະນະບໍລິຫານງານສູນກາງພັກກອມມູນິດຫວຽດນາມ, ຮອງປະທານປະເທດ ແຫ່ງ ສສ. ຫວຽດນາມ ແລະ ຄະນະ, ພາຍຫຼັງສໍາເລັດການພົບປະສອງຝ່າຍກັບ ສະຫາຍ ພັນຄໍາ ວິພາວັນ, ຮອງປະທານປະເທດ ແຫ່ງ ສປປ ລາວ.

ໃນໂອກາດນີ້, ສະຫາຍ ປະທານປະເທດ ບຸນຍັງ ວໍລະຈິດ ໄດ້ສະ​ແດງ​ຄວາມປິຕິຍິນດີຕ້ອນຮັບ ແລະ ຕີລາຄາສູງຕໍ່​ການຢ້ຽມຢາມ ສປປ ລາວ ຢ່າງເປັນທາງການ ຂອງ ສະ​ຫາຍ ຮອງປະທານປະເທດ ດັ້ງ ຖິ ຫງ໋ອກ ທິ້ງ, ຊຶ່ງເປັນຄັ້ງທຳອິດນັບແຕ່ ສະຫາຍ ເຂົ້າຮັບຕໍາແໜ່ງເປັນຮອງປະທານປະເທດ ສສ. ຫວຽດນາມ. ການຢ້ຽມຢາມນີ້ ກໍເປັນປະເພນີປະຕິບັດອັນເປັນປົກກະຕິ ຂອງສອງປະເທດ ລາວ-ຫວຽດນາມ, ຊຶ່ງຈະເປັນການປະກອບສ່ວນສໍາຄັນເຂົ້າໃນການສົ່ງເສີມ ແລະ ຮັດແໜ້ນສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ມີມາແຕ່ດົນນານແລ້ວນັ້ນ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ລວມທັງເປັນການກະຕຸກຊຸກຍູ້ໃຫ້ແກ່ການຮ່ວມມື ລະຫວ່າງ ສອງປະເທດ ໃຫ້ເຂົ້າສູ່ລວງເລິກອີກບາດກ້າວໜຶ່ງ. ພ້ອມກັນນີ້, ສະຫາຍ ບຸນຍັງ ວໍລະຈິດ ກໍໄດ້ສະແດງຄວາມຊົມເຊີຍຕໍ່​ບັນດາ​ຜົນສຳ​ເລັດ​ອັນ​ສຳຄັນ,ຮອບດ້ານທີ່​ປະຊາຊົນ​ຫວຽດນາມ​ອ້າຍ​ນ້ອງຍາດ​ມາ​ໄດ້ພາຍໃຕ້ການນໍາພາອັນຖືກຕ້ອງຂອງພັກກອມມູນິດຫວຽດນາມໃນໄລຍະຜ່ານມາແລະ ສະແດງຄວາມຂອບອົກຂອບໃຈຢ່າງສູງ ຕໍ່ການເອົາໃຈໃສ່ຊຸກຍູ້ຊ່ວຍເຫລືອແບບພິເສດແລະລ້ຳຄ່າຂອງພັກ, ລັດຖະບານ ກໍຄືປະຊາຊົນຫວຽດນາມອ້າຍນ້ອງ ທີ່ມີຕໍ່ປະຊາຊົນລາວ ໃນການປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນຕະຫລອດມາ, ໂດຍສະເພາະ ໂຄງການປຸກສ້າງໂຮງຮຽນຢູ່ແຂວງບໍລິຄໍາໄຊທີ່ເປັນຂອງຂວັນຂອງເລຂາທິການໃຫຍ່ຫງວຽນຝູຈ໋ອງ ແລະ ໂຄງການປຸກສ້າງໂຮງຮຽນຢູ່ແຂວງເຊກອງທີ່ເປັນຂອງຂວັນຂອງປະທານປະເທດເຈີນດ໋າຍກວາງ. ພ້ອມທັງໄດ້ຖືໂອກາດນີ້ ຝາກຄວາມຢື້ຢາມຖາມ​ຂ່າວ​ເຖິງ ສະຫາຍເລ​ຂາ​ທິ​ການ​ໃຫຍ່ຫງວຽນ ຝູ ຈ໋ອງ ແລະ ສະ​ຫາຍ​ ປະ​ທານ​ປະ​ເທດເຈີນ ດ໋າຍ ກວາງ ອີກດ້ວຍ. ນອກນີ້, ສະຫາຍ ປະທານປະເທດ ບຸນຍັງ ວໍລະຈິດ ຍັງໄດ້ຕີລາຄາສູງ ຕໍ່ໝາກຜົນຂອງການພົບປະສອງຝ່າຍ ລະຫວ່າງ ສະຫາຍ ຮອງປະທານປະເທດ ດັ້ງ ຖິ ຫງ໋ອກ ທິ້ງ ກັບ ສະຫາຍ ພັນຄໍາ ວິພາວັນ, ຮອງປະທານປະເທດ ແຫ່ງ ສປປ ລາວ ໃນໂອກາດຢ້ຽມຢາມຄັ້ງນີ້.

ໃນຕອນທ້າຍ, ສະຫາຍ ປະທານປະເທດ ບຸນຍັງ ວໍລະຈິດ ໄດ້ອວຍພອນໃຫ້ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ຈົ່ງໜັ້ນຄົງທະນົງແກ່ນຕະຫລອດກາລະນານ. ພ້ອມທັງອວຍພອນໃຫ້ ສະຫາຍຮອງ​ປະ​ທານ​ປະ​ເທດ ດັ້ງ ຖິ ຫງ໋ອກ ທິ້ງ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ສືບຕໍ່ຊີ້ນຳນຳພາປະເທດຫວຽດນາມ ກ້າວຂື້ນຕາມເປົ້າໜາຍທີ່ວາງໄວ້ ແລະ ໄດ້​ຮັບ​ຜົນສໍາ​ເລັດ​ຢ່າງ​ຈົບງາມ​ໃນ​ການເດີນທາງມາຢ້ຽມຢາມ ສປປ ລາວ ໃນຄັ້ງນີ້.

ໃນໂອກາດດຽວກັນ, ສະຫາຍ ຮອງປະທານປະເທດ ດັ້ງ ຖິ ຫງ໋ອກ ທິ້ງ ກໍໄດ້ສະແດງຄວາມຂອບໃຈເປັນຢ່າງສູງຕໍ່ການຕ້ອນຮັບອັນອົບອຸ່ນຂອງ ສະຫາຍ ປະທານປະເທດ ໃນຄັ້ງນີ້, ພ້ອມທັງໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ໃນໄລຍະຜ່ານມາ, ທີ່ໄດ້ຮັບການເສີມຂະຫຍາຍໃຫ້ແໜ້ນແຟ້ນຍິ່ງໆຂຶ້ນ ​ແລະ ສືບ​ຕໍ່ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ໂດຍສະເພາະໃນສະພາບໃຫມ່ ແລະ ຍຸກສະໄຫມໃຫມ່ນີ້. ພ້ອມນີ້, ສະຫາຍ ຮອງປະທານປະເທດ ດັ້ງ ຖິ ຫງ໋ອກ ທິ້ງ ຍັງໄດ້ນໍາເອົາຄວາມຢື້ຢາມຖາມຂ່າວຂອງ ສະຫາຍເລ​ຂາ​ທິ​ການ​ໃຫຍ່ ຫງວຽນ ຝູ ຈ໋ອງ ແລະ ສະ​ຫາຍ ​ປະ​ທານ​ປະ​ເທດ ເຈີນ ດ໋າຍ ກວາງ ສົ່ງເຖິງ ສະຫາຍ ປະທານປະເທດ ບຸນຍັງ ວໍລະຈິດ ອີກດ້ວຍ.