ໃນຕອນບ່າຍຂອງວັນທີ 1 ສິງຫາ 2018, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມພົບປະລະຫວ່າງ ລັດຖະມົນຕີຕ່າງປະເທດອາຊຽນ ແລະ ຄະນະກໍາມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ (ໄອຈາ) ແລະ ກອງປະຊຸມຄະນະກໍາມາທິການ ເຂດປອດອາວຸດນິວເຄລຍ ໃນອາຊີຕາເວັນອອກສ່ຽງໃຕ້.
ໃນກອງປະຊຸມພົບປະລະຫວ່າງ ລັດຖະມົນຕີຕ່າງປະເທດອາຊຽນ ແລະ ໄອຈາ, ລັດຖະມົນຕີຕ່າງປະເທດອາຊຽນ ໄດ້ຮັບຊາບບົດລາຍງານ ປະຈໍາປີ 2018 ຂອງ ໄອຈາ ແລະ ຮັບຊາບແຜນກິດຈະກໍາບູລິມະສິດ ແລະ ງົບປະມານ ສໍາລັບປີ 2019 ເພື່ອຈັດຕັ້ງປະຕິບັດບັນດາກິດຈະກໍາບູລິມະສິດ ເພື່ອສົ່ງເສີມ ແລະ ປົກປ້ອງສິດທິມະນຸດ. ໃນນີ້, ສປປ ລາວ ມີແຜນຈະຈັດ 1 ກິດຈະກໍາ ຄື: ກອງປະຊຸມສໍາມະນາຂອງໄອຈາ ກ່ຽວກັບ ສິດທິມະນຸດ ແລະການລຶບລ້າງຄວາມ ທຸກຍາກ ອີງໃສ່ຖະແຫລງການອາຊຽນ ວ່າດ້ວຍ ສິດທິມະນຸດ ແລະ ເປົ້າຫມາຍການພັດທະນາແບບຍືນຍົງ.
ສຳລັບ ກອງປະຊຸມຄະນະກໍາມາທິການເຂດປອດອາວຸດນິວເຄລຍ ໃນອາຊີຕາເວັນອອກສ່ຽງໃຕ້, ກອງປະຊຸມ ໄດ້ຮັບຊາບຄວາມຄືບໜ້າ ການຈັດຕັ້ງປະຕິບັດແຜນປະຕິບັດງານ ເພື່ອສົ່ງເສີມການຈັດຕັ້ງປະຕິບັດສົນທິສັນຍາ ວ່າດ້ວຍ ການຮັກສາອາຊຽນໃຫ້ເປັນເຂດປອດອາວຸດນິວເຄລຍ ປີ 2018-2022. ນອກຈາກນັ້ນ, ຍັງໄດ້ປຶກສາຫາລື ກ່ຽວກັບ ຄວາມຄືບໜ້າການລົງນາມ ແລະ ການໃຫ້ສັດຕະຍາບັນແກ່ອະນຸສັນຍາຂອງສົນທິສັນຍາ ວ່າດ້ວຍ ເຂດປອດອາວຸດນິວເຄລຍ ອາຊີຕາເວັນອອກສ່ຽງໃຕ້ (SEANWFZ) ໂດຍບັນດາປະເທດມະຫາອໍານາດ ທີ່ມີນິວເຄລຍຄອບຄອງ ເຊັ່ນ: ຝຣັ່ງ, ອັງກິດ, ລັດເຊຍ, ຈີນ ແລະ ອາເມລິກາ ແນໃສ່ຮັກສາພາກພື້ນອາຊີຕາເວັນອອກສ່ຽງໃຕ້ ໃຫ້ເປັນເຂດປອດອາວຸດນິວເຄລຍ ແລະ ອາວຸດທໍາລາຍລ້າງອື່ນໆ.