ໃນວັນທີ 3 ສິງຫາ 2018, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງ-ຍີ່ປຸ່ນ ຄັ້ງທີ 11, ຂອບການຮ່ວມມື ແມ່ນໍ້າຂອງຕອນລຸ່ມ-ສ. ອາເມລິກາ ຄັ້ງທີ 11, ແລະ ຂອບການຮ່ວມມື ແມ່ນໍ້າຂອງ-ສ. ເກົາຫຼີ ຄັ້ງທີ 8 ທີ່ ປະເທດ ສິງກະໂປ, ຊຶ່ງມີບັນດາລັດຖະມົນຕີ ແລະ ຄະນະຜູ້ແທນ ຈາກປະເທດແມ່ນໍ້າຂອງ (ກໍາປູເຈຍ, ລາວ, ມຽນມາ, ໄທ, ຫວຽດນາມ) ແລະ ບັນດາຄູ່ຮ່ວມພັດທະນາ (ຍີ່ປຸ່ນ, ສ. ເກົາຫຼີ, ສ. ອາເມລິກາ) ລວມທັງກອງເລຂາອາຊຽນ ເຂົ້າຮ່ວມຢ່າງພ້ອມພຽງ.
ໃນຕອນເຊົ້າ ຂອງວັນທີ 3 ສິງຫາ 2018, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງຕ່າງປະເທດ ຂອງ ສປປລາວ ໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງ-ສ. ເກົາຫຼີ ຄັ້ງທີ 8 ຮ່ວມກັບ ທ່ານ ນາງ ຄັງ ຍັງ ວາ, ລັດຖະມົນຕີຕ່າງປະເທດ ສ.ເກົາຫຼີ. ກອງປະຊຸມ ໄດ້ທົບທວນຄືນຄວາມຄືບໜ້າ ການຈັດຕັ້ງປະຕິບັດຜັນຂະຫຍາຍ 2 ເອກະສານສໍາຄັນຄື: ຖະແຫຼງການຮ່ວມ ກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ສ. ເກົາຫຼີ ຄັ້ງທີ 7; ແລະ ແຜນປະຕິບັດງານ ແມ່ນໍ້າຂອງ-ສ. ເກົາຫຼີ 2017-2020 ໂດຍສຸມໃສ່ 3 ແຜນງານ ປະກອບມີ 6 ຂະແໜງການບູລິມະສິດ. ບັນດາປະເທດສະມາຊິກ ໄດ້ລາຍງານຄວາມຄືບໜ້າການຈັດຕັ້ງປະຕິບັດ ໂຄງການຊ່ວຍເຫຼືອຈາກກອງທຶນ ແມ່ນໍ້າຂອງ-ສ. ເກົາຫຼີ, ເຊິ່ງ ສປປ ລາວ ແມ່ນກຳລັງຈັດຕັ້ງປະຕິບັດ 2 ໂຄງການ ຄື: “ໂຄງການເພີ່ມຄວາມອາດສາມາດຂອງ ປະຊາຊົນ ແລະ ບັນດາເມືອງທຸກຍາກຂອງ ສປປ ລາວ ໃນການເຂົ້າເຖິງນິຕິກຳ ຂອງຂະແໜງການອຸດສາຫະກຳ ແລະ ການຄ້າ ເພື່ອເປັນການກະກຽມໃຫ້ແກ່ການເຊື່ອມໂຍງ, ການຮ່ວມມືທາງດ້ານເສດຖະກິດ, ສະຖາບັນຕ່າງໆ ແລະ ການເປີດກວ້າງທາງດ້ານການຄ້າ” ມີມູນຄ່າ ປະມານ 423,000 ໂດລາສະຫະລັດ; “ໂຄງການສ້າງແຜນແມ່ບົດ ແລະ ຄວາມອາດສາມາດ ເພື່ອພັດທະນາພື້ນຖານໂຄງລາງ ດ້ານອຸຕຸນິຍົມ-ອຸທົກກະສາດ ໃນອ່າງແມ່ນໍ້າຂອງ ຂອງ ສປປ ລາວໃຫ້ທັນສະໄໝ” ມູນຄ່າ 350,000 ໂດລາສະຫະລັດ. ນອກຈາກນີ້ ກອງປະຊຸມໄດ້ຮ່ວມກັນປືກສາຫາລື ແຜນການເປີດກວ້າງ ແລະ ຂະຫຍາຍການຮ່ວມມືໃນຕໍ່ໜ້າ ໃຫ້ຮັດແໜ້ນຂຶ້ນອີກ, ໂດຍສະເພາະ ການຍົກລະດັບກົນໄກການຮ່ວມມື ຈາກລະດັບກອງປະຊຸມລັດຖະມົນຕີຕ່າງປະເທດ ຂຶ້ນເປັນ ກອງປະຊຸມສຸດຍອດ ໃນຕໍ່ໜ້າ. ບັນດາລັດຖະມົນຕີຕ່າງປະເທດ ໄດ້ຮັບຮອງເອົາຖະແຫຼງການຮ່ວມ ຂອງກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງ-ສ. ເກົາຫຼີ ຄັ້ງທີ 8 ເພື່ອເປັນເອກະສານອ້າງອີງ ໃນການຈັດຕັ້ງຂອບການຮ່ວມມືດັ່ງກ່າວໃນຕໍ່ໜ້າ.
ໃນຕອນບ່າຍຂອງວັນດຽວກັນ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ກໍໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງຕອນລຸ່ມ-ສ.ອາເມລິກາ ຄັ້ງທີ 11 ຮ່ວມກັບ ທ່ານ ໄມໂຄ ປອມປີໂອ, ລັດຖະມົນຕີຕ່າງປະເທດ ສ.ອາເມລິກາ. ກອງປະຊຸມ ໄດ້ສະແດງຄວາມຊົມເຊີຍ ຕໍ່ຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານ 5 ປີ (2016-2020) ກໍຄືການຈັດຕັ້ງປະຕິບັດໂຄງການຕ່າງໆ ໃນໄລຍະໜຶ່ງປີຜ່ານມາ ເປັນຕົ້ນ, ຄວາມຄືບໜ້າ ໂຄງການຝຶກອົບຮົມ ໃຫ້ແກ່ພະນັກງານ ແລະ ຊ່ຽວຊານຂະແໜງ ສາທາລະນະສຸກ ຫຼາຍກວ່າ 182 ທ່ານ ກ່ຽວກັບ ການຕ້ານການລື້ງຢາຂອງພະຍາດ ແລະ ຫຼຸດຜ່ອນຄວາມສ່ຽງ ຕໍ່ພະຍາດລະບາດໃນສັດ ພາຍໃຕ້ໂຄງການ (One Health Networks) ແລະ ຄວາມຄືບໜ້າການຈັດຕັ້ງປະຕິບັດ ໂຄງການຮ່ວມມືກັບຄູ່ຮ່ວມພັດທະນາຂອງປະເທດ ແມ່ນ້ຳຂອງຕອນລຸ່ມ-ສ.ອາເມລິກາ ເພື່ອແລກປ່ຽນແນວທາງການສຶກສາ ແລະ ເຕັກໂນໂລຊີທີ່ທັນສະໄຫມຂອງຂະແໜງການສຶກສາ. ນອກຈາກນີ້, ກອງປະຊຸມ ໄດ້ປຶກສາຫາລື ເພື່ອປັບປຸງເສົາຄໍ້າບູລິມະສິດຂອງຂອບຮ່ວມມືດັ່ງກ່າວ ຈາກ 6 ເສົາຄ້ຳ ມາເປັນ 2 ເສົາຄ້ຳ ຄື: 1. ນໍ້າ, ພະລັງງານ, ອາຫານ ແລະ ສິ່ງແວດລ້ອມ; 2. ການພັດທະນາຊັບພະຍາກອນມະນຸດ ແລະ ການເຊື່ອມຈອດ. ພ້ອມນີ້ຍັງໄດ້ປັບປຸງແຜນປະຕິບັດງານ 5 ປີ ເພື່ອເປັນພື້ນຖານໃຫ້ແກ່ການຈັດຕັ້ງປະຕິບັດ ບັນດາວຽກງານຂອງແຕ່ລະເສົາຄໍ້າບູລິມະສິດ ໃຫ້ມີປະສິດທິພາບຂຶ້ນຕື່ມ ລວມທັງຄວາມຄືບໜ້າ ການຜັນຂະຫຍາຍຂໍ້ລິເລີ່ມການແລກປ່ຽນຂໍ້ມູນແມ່ນ້ຳຂອງ ທີ່ໄດ້ຮັບຮອງ ໃນກອງປະຊຸມລັດຖະມົນຕີຕ່າງປະເທດ ຄັ້ງທີ 10. ກອງປະຊຸມໄດ້ຮັບຮອງເອົາ 4 ເອກະສານ ຄື: 1) ຖະແຫຼງການຮ່ວມກອງປະຊຸມລັດຖະມົນຕີຕ່າງປະເທດ ຄັ້ງທີ 11; 2) ເອກະສານແນວຄວາມຄິດ ກ່ຽວກັບ ການປັບປຸງເສົາຄໍ້າບູລິມະສິດ; 3) ແຜນປະຕິບັດງານ 5 ປີ (2016-2020) ສະບັບປັບປຸງໃໝ່; ແລະ 4) ຖະແຫຼງການຮ່ວມເພື່ອສ້າງຄວາມເຂັ້ມແຂງ ດ້ານການແລກປ່ຽນຂໍ້ມູນແມ່ນໍ້າຂອງ ລະຫວ່າງ ເພື່ອນແມ່ນ້ຳຂອງຕອນລຸ່ມ ແລະ ຄະນະກຳມະການແມ່ນ້ຳຂອງສາກົນ (MRC).
ພ້ອມດຽວກັນນີ້, ທ່ານ ລັດຖະມົນຕີຕ່າງປະເທດ ຂອງ ສປປ ລາວ ຍັງໄດ້ເຂົ້າຮ່ວມ ກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ຍີ່ປຸ່ນ ຄັ້ງທີ 11 ຮ່ວມກັບ ທ່ານ ທາໂຣ ໂຄະໂນ, ລັດຖະມົນຕີຕ່າງປະເທດ ຍີ່ປຸ່ນ, ກອງປະຊຸມໄດ້ທົບທວນຄືນຄວາມຄືບໜ້າການຮ່ວມມື ລະຫວ່າງ ປະເທດແມ່ນໍ້າຂອງ ກັບ ຍີ່ປຸ່ນ ກໍຄື ການຈັດຕັ້ງປະຕິບັດ ຂອບການຮ່ວມມືດັ່ງກ່າວ ໃນໄລຍະຜ່ານມາ ເປັນຕົ້ນ: ຍຸດທະສາດໂຕກຽວ 2015 ສະບັບໃໝ່ ແລະ ແຜນປະຕິບັດງານແມ່ນໍ້າຂອງ-ຍີ່ປຸ່ນ ເພື່ອຜັນຂະຫຍາຍຍຸດທະສາດໂຕກຽວ 2015 ສະບັບໃໝ່. ກອງປະຊຸມໄດ້ສະແດງຄວາມຊົມເຊີຍ ຕໍ່ການທົບທວນຄືນຂໍ້ລິເລີ່ມການເຊື່ອມຈອດ ແມ່ນໍ້າຂອງ-ຍີ່ປຸ່ນ ໃນການຈັດຕັ້ງປະຕິບັດບັນດາໂຄງການ ພື້ນຖານໂຄງລ່າງ ແລະ ໂຄງບົນ ເຊັ່ນ: ການພັດທະນາຊັບພະຍາກອນມະນຸດ, ການພັດທະນາແລວເສດຖະກິດ ຕາເວັນອອກ-ຕາເວັນຕົກ ແລະ ແລວເສດຖະກິດພາກໃຕ້. ນອກຈາກນີ້ ກອງປະຊຸມຍັງໄດ້ ກໍານົດຂົງເຂດບູລິມະສິດຂອງຂອບການຮ່ວມມື ແມ່ນໍ້າຂອງ-ຍີ່ປຸ່ນ ເພື່ອຮັດແຄບຊ່ອງວ່າງການພັດທະນາ, ເສີມຂະຫຍາຍນເຊື່ອມໂຍງພາກພື້ນ ໂດຍສະເພາະ ການເຊື່ອມຈອດ, ການແລກປ່ຽນລະຫວ່າງ ປະຊາຊົນກັບປະຊາຊົນ, ການພັດທະນາແບບຍືນຍົງ ແລະ ສົ່ງເສີມການລົງທຶນ ເພື່ອພັດທະນາພື້ນຖານໂຄງລ່າງ ໃຫ້ມີຄຸນນະພາບ. ບັນດາລັດຖະມົນຕີຕ່າງປະເທດ ໄດ້ຮ່ວມກັນຮັບຮອງເອົາ ຖະແຫຼງການປະທານກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນ້ຳຂອງ-ຍີ່ປຸ່ນ ຄັ້ງທີ 11 ເພື່ອເປັນບ່ອນອີງ ໃນການຈັດຕັ້ງປະຕິບັດ ຂອບການຮ່ວມມືດັ່ງກ່າວ ທັງເປັນການກະກຽມໃຫ້ແກ່ ກອງປະຊຸມສຸດຍອດ ແມ່ນ້ຳຂອງ-ຍີ່ປຸ່ນ ຄັ້ງທີ 10, ຊຶ່ງຈະຈັດຂຶ້ນຢູ່ ນະຄອນຫຼວງໂຕກຽວ, ຍີ່ປຸ່ນ ໃນວັນທີ 8-9 ຕຸລາ 2018.