ທ່ານ ທາຮາໂມອານາ ໄອຊີ ຄລູນນີ ແມັກເພີຊັນ (Tahamoana Aisea Cluny MACPHERSON)

ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ນູແວນເຊລັັງ ປະຈຳ ສປປ ລາວ ຄົນໃໝ່

ທ່ານ Kim Hojlund Christensen

ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງຣາຊະອານາຈັກ ເດັນມາກ ປະຈຳ ສປປ ລາວ ຄົນໃໝ່

ທ່ານ Lorenzo Galanti

ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສາທາລະນະລັດ ອີຕາລີ ປະຈຳ ສປປ ລາວ ຄົນໃໝ່

ທ່ານ ນິໂກລົດສ ອັບຄາຊາວາ (Nikoloz Apkhazava)

ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ຊອກຊີ ປະຈຳ ສປປ ລາວ ຄົນໃໝ່

ໃນວັນທີ 14 ກັນຍາ 2018, ທີ່ ກະຊວງ​ການ​ຕ່າງປະ​ເທດ, ທ່ານສະ​ເຫຼີ​ມ​ໄຊ ກົມມະ​ສິດ, ລັດຖະມົນຕີ​ກະຊວງ​ການ​ຕ່າງປະ​ເທດ ແຫ່ງ ສປປ ລາວ, ໄດ້ຕ້ອນຮັບການຢ້ຽມຂໍ່ານັບ ຂອງທ່ານ ທາຮາໂມອານາ ໄອຊີ ຄລູນນີ ແມັກເພີຊັນ (Tahamoana Aisea Cluny MACPHERSON), ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ນູແວນເຊລັັງ ປະຈໍາ ສປປ ລາວ ຄົນໃໝ່, ຊຶ່ງມີສຳນັກງານຕັ້ງຢູ່ ບາງກອກ, ປະເທດໄທ; ທ່ານ Kim Hojlund Christensen, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງຣາຊະອານາຈັກ ເດັນມາກ ປະຈໍາ ສປປ ລາວ ຄົນໃໝ່, ເຊິ່ງມີສຳນັກງານຕັ້ງຢູ່ຮ່າໂນ້ຍ, ສສ.ຫວຽດນາມ; ທ່ານ Lorenzo Galanti, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສາທາລະນະລັດ ອີຕາລີ ປະຈໍາ ສປປ ລາວ ຄົນໃໝ່, ຊຶ່ງມີສຳນັກງານຕັ້ງຢູ່ ບາງກອກ, ປະເທດໄທແລະ ທ່ານ ນິໂກລົດສ ອັບຄາຊາວາ (Nikoloz Apkhazava), ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ຊອກຊີ ປະຈໍາ ສປປ ລາວ ຄົນໃໝ່,ເຊິ່ງມີສໍານັກງານຕັ້ງຢູ່ກົວລາລຳເປີ, ມາເລເຊຍ.

ໃນໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ບັນດາທ່ານເອກອັກຄະລັດຖະທູດ ທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດ ປະຈໍາ ສປປ ລາວ, ພ້ອມທັງໄດ້ສະແດງຄວາມເຊື່ອໝັ້ນວ່າ ໃນໄລຍະດໍາລົງຕໍາແໜ່ງນີ້ ທ່ານເອກອັກຄະລັດຖະທູດ ຈະເຮັດສຸດຄວາມສາມາດເພື່ອ ສືບຕໍ່ເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສປປ ລາວ - ນູແວນເຊລັງ, ສປປ ລາວ-ສ.ອີຕາລີ, ສປປ ລາວ-ເດັນມາກ ແລະ ສປປ ລາວ-ຊອກຊີ ໃຫ້ໄດ້ຮັບການພັດທະນາຍິ່ງໆຂຶ້ນ. ພ້ອມນັ້ນ, ທ່ານລັດຖະມົນຕີກໍໄດ້ອວຍພອນໄຊແກ່ບັນດາທ່ານເອກອັກຄະລັດຖະທູດຈົ່ງປະສົບຜົນສໍາເລັດໃນການປະຕິບັດໜ້າທີ່ການທູດຂອງຕົນ ຢູ່ ສປປ ລາວ.

ໃນໂອກາດດຽວກັນ, ບັນດາທ່ານເອກອັກຄະລັດຖະທູດໄດ້ສະແດງຄວາມຂອບໃຈຕໍ່ທ່ານລັດຖະມົນຕີຕ່າງປະເທດທີ່ໄດ້ໃຫ້ການຕ້ອນຮັບອັນອົບອຸ່ນ ແລະໃຫ້ຄໍາໝັ້ນສັນຍາວ່າ ຕະຫຼອດໄລຍະການປະຕິບັດໜ້າທີ່ຂອງຕົນ ຢູ່ ສປປ ລາວຈະເຮັດສຸດຄວາມສາມາດ ເພື່ອເຮັດໃຫ້ການພົວພັນຮ່ວມມືຂອງສອງຝ່າຍ ໃຫ້ໄດ້ຮັບການພັດທະນາຍິ່ງໆຂຶ້ນ.

-          ສປປ ລາວ ແລະ ນູແວນເຊລັງ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 07 ກຸມພາ 1963.

-          ສປປ ລາວ ແລະ ສ.ອີຕາລີ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ07 ທັນວາ 1965

-          ສປປ ລາວ ແລະ ຣາຊະອານາຈັກເດັນມາກ ສ້າງຕັ້ງສາຍພົວພັນການທູດນຳກັນໃນວັນທີ 01 ພະຈິກ 1956.

-          ສປປ ລາວ ແລະ ຊອກຊີ ສ້າງຕັ້ງສາຍພົວພັນການທູດນຳກັນ ໃນວັນທີ 06 ພະຈິກ 1998. ເຊິ່ງວ່າປີນີ້ຄົບຮອບ 20ປີ.