ໃນຕອນເຊົ້າວັນທີ 6 ຕຸລາ 2018, ການນຳຂັ້ນສູງພັກ-ລັດ ລາວ ນຳໂດຍສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ໄດ້ເຂົ້າວາງພວງມາລາ ແລະ ເຊັນປື້ມໄວ້ອາໄລເຖິງດວງວິນຍານ ສະຫາຍ ໂດ໊ ເມື່ອຍ, ອະດີດເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ທີ່ ສະຖານເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ.
ສະຫາຍ ໂດ໊ ເມື່ອຍ ໄດ້ເຖິງແກ່ມໍລະນະກຳໃນວັນທີ 1 ຕຸລາ 2018 ຜ່ານມານີ້, ລວມອາຍຸໄດ້ 101 ປີ. ໃນປື້ມໄວ້ອາໄລ, ໄດ້ມີເນື້ອໃນວ່າ: “ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ສະພາແຫ່ງຊາດ, ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສູນກາງແນວລາວສ້າງຊາດ ຮູ້ສຶກເສົ້າໂສກເສຍດາຍເປັນຢ່າງຍິ່ງ ເມື່ອໄດ້ຮັບຂ່າວການຈາກໄປໂດຍບໍ່ມີວັນກັບຄືນມາຂອງ ສະຫາຍ ໂດ໊ ເມື່ອຍ, ອະດີດເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ. ການຈາກໄປຂອງສະຫາຍບໍ່ພຽງແຕ່ເປັນການສູນເສຍຜູ້ນຳທີ່ເຄົາລົບຮັກຂອງພັກ-ລັດ ແລະ ປະຊາຊົນຫວຽດນາມ ແຕ່ຍັງເປັນການສູນເສຍເພື່ອນມິດສະຫາຍທີ່ໃກ້ຊິດ ແລະ ສະໜິດສະໜົມທີ່ສຸດຂອງພັກ, ລັດ ແລະ ປະຊາຊົນລາວພວກຂ້າພະເຈົ້າອີກດ້ວຍ.
ສະຫາຍ ໂດ໊ ເມື່ອຍ ເປັນນັກປະຕິວັດທີ່ກ້າແກ່ນ, ເດັດດ່ຽວຜູ້ໜຶ່ງ ທີ່ມີຜົນງານ ແລະ ມີການປະກອບສ່ວນອັນໃຫຍ່ຫລວງເຂົ້າໃນພາລະກິດຕໍ່ສູ້ເພື່ອຄວາມເປັນເອກະລາດແຫ່ງຊາດຂອງປະຊາຊົນຫວຽດນາມໃນເມື່ອກ່ອນ ກໍ່ຄືພາລະກິດສ້າງສາພັດທະນາ ແລະ ປົກປັກຮັກສາ ປະເທດຊາດ ຂອງ ສສ ຫວຽດນາມ ຕະຫຼອດໄລຍະເວລາ 80 ກວ່າປີຜ່ານມາ. ພ້ອມດຽວກັນນັ້ນ, ສະຫາຍ ໂດ໊ ເມື່ອຍ ກໍ່ເປັນໜຶ່ງໃນການນຳລຸ້ນອາວຸໂສຂອງຫວຽດນາມ ທີ່ໄດ້ມີການປະກອບສ່ວນອັນໃຫຍ່ຫລວງ ເຂົ້າໃນການເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ຕະຫຼອດມາ.
ໃນຊ່ວງເວລາໂສກເສົ້າອາໄລຢ່າງສຸດຊຶ້ງນີ້, ຄະນະບໍລິຫານງານສູນກາງພັກປະຊາຊົນປະຕິວັດລາວ, ສະພາແຫ່ງຊາດ, ລັດຖະບານ ແຫ່ງ ສາທາລະນະລັດປະຊາທິປະໄຕ ປະຊາຊົນລາວ, ສູນກາງແນວລາວສ້າງຊາດ ແລະ ປະຊາຊົນລາວຂໍສະແດງຄວາມອາໄລອາວອນຢ່າງສຸດຊຶ້ງ ແລະ ແບ່ງເບົາຄວາມເສົ້າໂສກເສຍດາຍມາຍັງຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດ, ລັດຖະບານແຫ່ງ ສສ ຫວຽນາມ, ສູນກາງແນວໂຮມປະເທດຊາດຫວຽດນາມ ແລະ ປະຊາຊົນຫວຽດນາມອ້າຍນ້ອງ ໂດຍສະເພາະຕໍ່ຄອບຄົວ, ຍາດຕິພີ່ນ້ອງຂອງສະຫາຍ ໂດ໊ ເມື່ອຍ ມານະໂອກາດນີ້ດ້ວຍ.
ຂໍໃຫ້ດວງວິນຍານ ຂອງ ສະຫາຍ ໂດ໊ ເມື່ອຍ ຈົ່ງໄປສູ່ສຸຂະຕິເຖີ້ນ”.
ໃນຕະຫລອດໄລຍະ 3 ວັນ ເປີດປຶ້ມໄວ້ອາໄລຢູ່ສະຖານເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ ໄດ້ມີການນຳຂັ້ນສູງຂອງຂະແໜງການພັກ, ລັດ, ອົງການຈັດຕັ້ງມະຫາຊົນຂັ້ນສູນກາງ ເປັນຈຳນວນຫລວງຫລາຍ ໄດ້ໄປວາງພວງມາລາ ແລະ ຂຽນປຶ້ມໄວ້ອາໄລເຖິງດວງວິນຍານຂອງອາດີດເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ.