ໂດຍຕອບສະໜອງຕາມຄໍາເຊີນຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດປະຊາທິປະໄຕ ປະຊາຊົນລາວ, ທ່ານ ເມຣຸດ ຄາວູໂຊລູ (Mevlut Cavusoglu), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ຕວັກກີ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນລະຫວ່າງວັນທີ 07-08ພະຈິກ 2018, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປລາວ ແລະ ສ.ຕວັກກີ.
ໃນວັນທີ 08 ພະຈິກ 2018, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ແລະ ພົບປະສອງຝ່າຍກັບທ່ານ ເມຣຸດ ຄາວູໂຊລູ, ລັດຖະມົນຕີກະຊວງການຕ່າງປະເທດ ແຫ່ງ ສ.ຕວັກກີ. ໃນການພົບປະຄັ້ງນີ້, ສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມື ແລະ ການສະໜັບສະໜູນເຫຼືອເຊິ່ງກັນ ແລະ ກັນ ໃນໄລຍະຜ່ານມາ, ຊຶ່ງນັບແຕ່ ສປປລາວ ແລະ ສ.ຕວັກກີ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 26 ມິຖຸນາ 1958, ສອງປະເທດ ກໍໄດ້ມີການພົວພັນທີ່ດີນໍາກັນຕະຫຼອດມາ, ຊຶ່ງເຫັນໄດ້ຈາກການແລກປ່ຽນການສະໜັບສະໜູນ ເຊິ່ງກັນ ແລະ ກັນ ໃນເວທີສາກົນ, ການແລກປ່ຽນການຢ້ຽມຢາມ ລະຫວ່າງຄະນະຜູ້ແທນຂອງສອງປະເທດ. ພ້ອມກັນນີ້, ສອງຝ່າຍ ຍັງໄດ້ສະແດງຄວາມຊົມເຊີຍຕໍ່ການສ້າງຕັ້ງສາຍພົວພັນການທູດ ລາວ-ຕວັກກີ ຄົບຮອບ 60 ປີ ພ້ອມທັງ ໄດ້ມີການເປີດສະຖານເອກອັກຄະລັດຖະທູດ ແຫ່ງ ສ.ຕວັກກີ ປະຈໍາ ສປປ ລາວ ຂຶ້ນຢ່າງເປັນທາງການ ເພື່ອເປັນນິມິດໝາຍອັນສໍາຄັນໃຫ້ແກ່ການຊຸກຍູ້ການພົວພັນຮ່ວມມືຂອງສອງປະເທດ ໃຫ້ກ້າວຂື້ນສູ່ລະດັບໃໝ່. ນອກຈາກນັ້ນ, ສອງຝ່າຍ ຍັງໄດ້ປຶກສາຫາລື ກ່ຽວກັບ ການເສີມຂະຫຍາຍການພົວພັນຮ່ວມມືສອງຝ່າຍ ແລະ ຫຼາຍຝ່າຍ ໃນຕໍ່ໜ້າ ແລະ ທັງໄດ້ແລກປ່ຽນຄຳຄິດເຫັນ ຕໍ່ກັບບັນຫາທີ່ພົ້ນເດັ່ນ ໃນພາກພື້ນ ແລະ ສາກົນ. ພາຍຫລັງສຳເລັດການພົບປະສອງຝ່າຍ, ທັງສອງລັດຖະມົນຕີ ກໍ່ໄດ້ລົງນາມຮ່ວມກັນ ໃນສັນຍາວ່າດ້ວຍ ການຍົກເວັ້ນວີຊາ ສໍາລັບຜູ້ຖືໜັງສືຜ່ານແດນການທູດ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສາທາລະນະລັດ ຕວັກກີ.
ໃນໂອກາດຢ້ຽມຢາມ ສປປ ລາວ ໃນຄັ້ງນີ້, ທ່ານ ເມຣຸດ ຄາວູໂຊລູ ພ້ອມດ້ວຍຄະນະ ຍັງໄດ້ເຂົ້າຢ້ຽມຂ່ຳນັບ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ. ນອກຈາກນັ້ນ, ກໍ່ຍັງໄດ້ໄປຢ້ຽມຊົມສະຖານທີ່ທ່ອງທ່ຽວວັດທະນະທໍາທີ່ສໍາຄັນ ຢູ່ ນະຄອນຫຼວງວຽງຈັນ.