ໃນຕອນເຊົ້າຂອງ ວັນທີ 11 ມັງກອນ 2019, ທີ່ ກະຊວງການຕ່າງປະເທດ, ໄດ້ຈັດພິທີລຸລ່ວງ, ໂອ້ລົມ ແລະ ຈັດພາເຂົ້າສາມັກຄີ ໃຫ້ແກ່ພະນັກງານ-ລັດຖະກອນ ກະຊວງການຕ່າງປະເທດ ເພື່ອອອກພັກການ-ຮັບອຸດໜຸນບຳນານຂຶ້ນ. ພິທີດັ່ງກ່າວ ໄດ້ໃຫ້ກຽດເຂົ້າຮ່ວມເປັນປະທານໂດຍ ທ່ານ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການຕ່າງປະເທດ. ມີຕາງໜ້າຈາກຫ້ອງການກະຊວງ, ບັນດາກົມ, ຫ້ອງການຄະນະກຳມະການຊາຍແດນແຫ່ງຊາດ, ສະຖາບັນການຕ່າງປະເທດ ແລະ ຫ້ອງການບໍລິການສະຖານທູດ ພາຍໃນກະຊວງ ເຂົ້າຮ່ວມທັງໝົດ 45 ທ່ານ. ພ້ອມດຽວກັນນີ້, ຍັງມີພະນັກງານ-ລັດຖະກອນ ອອກພັກການ-ຮັບອຸດໜູນບຳນານ ຂອງກະຊວງການຕ່າງປະເທດ ປະຈຳປີ 2019 ລວມທັງໝົດ 29 ທ່ານ, ຍິງ 1 ທ່ານ.

ໃນພິທີໄດ້ມີການມອບ-ຮັບ ເງິນອຸດໜຸນກ່ອນຮັບບຳນານ, ເງິນກອງທຶນຊ່ວຍເຫລືອເຊິ່ງກັນ ແລະ ກັນ ຂອງກະຊວງ ແລະ ຂອງທີ່ລະນຶກ ໂດຍທ່ານລັດຖະມົນຕີເປັນຜູ້ມອບ. ພິທີໄດ້ດຳເນີນໄປດ້ວຍບັນຍາກາດອັນອົບອຸ່ນ ແລະ ສະໜິດສະໜົມ, ເຊິ່ງບັນດາທ່ານທີ່ຈະຮັບອຸດໜຸນບຳນານໃໝ່ ໄດ້ສະແດງຄວາມຄິດເຫັນເປັນເອກະພາບ ແມ່ນສະແດງເຖິງຄວາມຮູ້ບຸນຄຸນຕໍ່ພັກ-ລັດ, ຕໍ່ການຈັດຕັ້ງ ກໍ່ຄື ຄະນະພັກ-ຄະນະນຳກະຊວງ ໃນຮຸ່ນກ່ອນ ແລະ ຮຸ່ນປຈຸບັນ ທີ່ໃຫ້ໂອກາດ ແລະ ກໍ່ສ້າງຊ່ວຍເຫລືອ ຈຶ່ງສາມາດຜ່ານຜ່າໄດ້ຫລາຍປະສົບການ ແລະ ນຳຜົນສຳເລັດມາຫລາຍດ້ານຈົນມາເຖິງວັນນີ້. ໃນນັ້ນ, ຜ່ານການປະກອບຄຳຄິດເຫັນ ທ່ານລັດຖະມົນຕີ ໄດ້ມີຄວາມຮູ້ສຶກໃນສອງດ້ານຄື: 1. ມີຄວາມປິຕິຍິນດີ, ຊົມເຊີຍຢ່າງສຸດອົກສຸດໃຈ ທີ່ເຫັນບັນດາທ່ານປະສົບຜົນສຳເລັດຢ່າງຈົບງາມ, 2. ມີຄວາມຄ້ອຍໃຈຍ້ອນວ່າໄດ້ຮັກແພງ, ຮ່ວມທຸກ, ຮ່ວມທຸກມາເປັນເວລາຫລາຍປີ, ແຕ່ເຖິງຢ່າງໃດກໍຕາມ ຍັງແມ່ນຄອບຄົວດຽວກັນ ແລະ ພ້ອມທີ່ໃຫ້ຄວາມຮ່ວມມືຢູ່ສະເໝີ.