ໃນວັນທີ 06 ເມສາ 2019, ກະຊວງການຕ່າງປະເທດ ຮ່ວມກັບ ບັນດາທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວ ໄດ້ຈັດພິທີບາສີສູ່ຂວັນສະເຫຼີມສະຫຼອງບຸນປີໃໝ່ລາວ ທີ່ ສວນພຶກສາ, ບ້ານໃໝ່ດ່ານຊີ, ເມືອງນາຊາຍທອງ, ນະຄອນຫຼວງວຽງຈັນ, ເພື່ອເປັນການສົ່ງທ້າຍປີເກົ່າ ພ.ສ 2561 ແລະ ຕ້ອນຮັບປີໃໝ່ ພ.ສ 2562. ໃນພິທີສະເຫຼີມສະຫຼອງບຸນປະເພນີປີໃໝ່ລາວໃນຄັ້ງນີ້ ເປັນກຽດເຂົ້າຮ່ວມໂດຍ ທ່ານ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ, ຄະນະພັກ-ຄະນະນໍາກະຊວງ ພ້ອມດ້ວຍຄອບຄົວ, ພະນັກງານອາວຸໂສບໍານານ, ບັນດາຄະນະຫ້ອງການ-ຄະນະກົມ, ຄະນະພະແນກ, ອົງການຈັດຕັ້ງມະຫາຊົນ ແລະ ພະນັກງານ ກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ. ພ້ອມດຽວກັນນັ້ນ ບັນດາທູຕານຸທູດ, ກົງສູນ-ກົງສູນກິດຕິມະສັກ, ຜູ້ຕາງໜ້າອົງການຈັດຕັ້ງສາກົນ ປະຈໍາ ສປປ ລາວ ພ້ອມດ້ວຍຄອບຄົວ ແລະ ແຂກ ກໍໄດ້ຮັບກຽດເຊື້ອເຊີນເຂົ້າຮ່ວມ.

ໃນໂອກາດສະເຫຼີມສະຫຼອງສົ່ງທ້າຍປີເກົ່າ ແລະ ຕ້ອນຮັບປີໃໝ່ ໃນຄັ້ງນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຕາງໜ້າໃຫ້ຄະນະພັກ-ຄະນະນໍາກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ ແລະ ອວຍພອນປີໃໝ່ລາວ ຕໍ່ບັນດາພະນັກງານ, ທູຕານຸທູດ ແລະ ແຂກທີ່ເຂົ້າຮ່ວມ ດ້ວຍຄວາມອົບອຸ່ນ ແລະ ສະໜິດສະໜົມ. ພ້ອມນີ້, ທ່ານລັດຖະມົນຕີ ຍັງໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນຂອງບຸນປີໃໝ່ລາວ, ຊຶ່ງແມ່ນບຸນປະເພນີທີ່ສໍາຄັນຂອງລາວ ແລະ ເປັນຮີດຄອງປະເພນີອັນດີງາມຂອງຊາດ ທີ່ໄດ້ສືບສານກັນມາຕັ້ງແຕ່ບູຮານນະການ; ບັນດາ​ສຳນັກງານ​ອົງການ​ຕ່າງໆ​ທັງ​ພາກ​ລັດ ແລະ ເອກະ​ຊົນ, ຫົວໜ່ວຍ​ທຸລະ​ກິດຕະຫຼອດ​ຮອດ​ພໍ່​ແມ່​ປະຊາຊົນ ກໍ​ໄດ້​ຈັດ​ພິທີ​ບາສີສູ່ຂວັນ  ແລະຫົດສົງ​ນ້ຳ​ໃຫ້ການ​ນຳ​ພັກ-ລັດ, ຜູ້​ອາວຸໂສ, ຜູ້​ເຖົ້າ​ຜູ້​ແກ່ ແລະຜູ້​ເປັນ​ພໍ່​ເປັນ​ແມ່ ກໍ​ຄື​ຜູ້​ທີ່​ມີ​ບຸນຄຸນເພື່ອ​ເປັນ​ການ​ປັດ​ເປົ່າ​ສິ່ງ​ທີ່​ບໍ່​ດີ​ບໍ່​ງາມ​ໃຫ້​ໄປ​ຕາມ​ປີ​ເກົ່າແລະ ອວຍພອນ​ປີ​ໃໝ່​ໃຫ້ມີ​ແຕ່​ໂຊກ​ແຕ່​ໄຊ.

ພ້ອມດຽວກັນນັ້ນ, ໃນໂອກາດສະເຫຼີມສະຫຼອງປີໃໝ່ລາວ ໃນຄັ້ງນີ້ ຍັງເປັນໂອກາດທີ່ສໍາຄັນໃນການເຜີຍແຜ່ວັດທະນະທໍາ ແລະ ຮີດຄອງປະເພນີອັນດີງາມຂອງລາວ ໃຫ້ແກ່ ບັນດາທູຕານຸທູດ ແລະ ອົງການຈັດຕັ້ງສາກົນປະຈໍາ ສປປ ລາວ ກໍຄືຊາວຕ່າງຊາດໃຫ້ໄດ້ຮັບຮູ້, ໄດ້ສໍາພັດ ແລະ ເຂົ້າໃຈຢ່າງເລິກເຊິ່ງ ກ່ຽວກັບ ບຸນປະເພນີປີໃໝ່ຂອງລາວເຮົາ. ພ້ອມດຽວກັນນີ້, ຍັງເປັນການສົ່ງເສີມຄວາມເຂົ້າອົກເຂົ້າໃຈ ແລະ ຮັດແໜ້ນການພົວພັນຮ່ວມມືອັນດີງາມ ລະຫວ່າງ ພະນັກງານກະຊວງການຕ່າງປະເທດ ກໍຄືນັກການທູດລາວ ກັບບັນດາທູຕານຸທູດ ແລະ ອົງການຈັດຕັ້ງສາກົນ ປະຈໍາ ສປປ ລາວ ກໍຄືບັນດາປະເທດເພື່ອນມິດໃນພາກພື້ນ ແລະສາກົນ.

ໃນຕອນທ້າຍ, ທ່ານລັດຖະມົນຕີ ກໍໄດ້ອວຍພອນໄຊອັນປະເສີດ ໃນໂອກາດສະເຫຼີມສະຫຼອງປີໃໝ່ລາວ ໃນຄັ້ງນີ້ ໃຫ້ແກ່ ທຸກໆທ່ານທີ່ໄດ້ມາຮ່ວມງານ ຈົ່ງມີສຸຂະພາບແຂງແຮງ, ມີພະລານາໄມທີ່ສົມບູນ, ມີ​ຄວາມ​ເບີກບານ​ມ່ວນຊື່ນ, ປະສົບຜົນສໍາເລັດໃນໜ້າທີ່ວຽກງານ ແລະ ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ທຸກປະການ ຕະຫຼອດປີ ພ.ສ 2562 ແລະ ຕະຫຼອດໄປ.

ຈາກນັ້ນ, ກໍໄດ້ມີພິທີບາສີສູ່ຂວັນ ອວຍພອນປີໃໝ່ ຊຶ່ງກັນ ແລະ ກັນ, ຮ່ວມຮັບປະທານອາຫານທ່ຽງ, ຊົມການສະແດງສີລະປະ ແລະ ປະກອບສ່ວນມ່ວນຊື່ນຮ່ວມກັນຢ່າງຄຶກຄື້ນ ດ້ວຍໄມຕີຈິດມິດຕະພາບອັນດີ ແລະ ມີຄວາມໝາຍສໍາຄັນ, ຊຶ່ງເຮັດໃຫ້ພິທີສະເຫຼີມສະຫຼອງປີໃໝ່ລາວ ພ.ສ 2562 ຄັ້ງນີ້ ມີບັນຍາກາດຟົດຟື້ນມ່ວນຊື່ນ ລະຫວ່າງ ພະນັກງານກະຊວງການຕ່າງປະເທດ, ບັນດາທູຕານຸທູດ, ອົງການຈັດຕັ້ງສາກົນ ປະຈໍາ ສປປ ລາວ ແລະ ແຂກຖືກເຊີນເຂົ້າຮ່ວມ.