ໃນຕອນເຊົ້າວັນທີ 26 ເມສາ 2019, ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມຄະນະຜູ້ແທນຂັ້ນສູງຂອງລາວ ເຂົ້າຮ່ວມພິທີເປີດກອງປະຊຸມເວທີປຶກສາຫາລື “ ໜຶ່ງແລວ ໜຶງເສັ້ນທາງ ” ເພື່ອການຮ່ວມມືສາກົນ ຄັ້ງທີ່ 2 ທີ່ນະຄອນຫຼວງ ປັກກີ່ງ, ສປ ຈີນ, ພາຍໃຕ້ຫົວຂໍ້: “ການຮ່ວມມືໜຶ່ງແລວ ໜຶ່ງເສັ້ນທາງ, ສ້າງອານາຄົດທີ່ສົດໃສດ້ວຍກັນ” ໂດຍການເປັນປະທານເປີດຂອງພະນະທ່ານ ສີ ຈີ້ນຜີງ, ປະທານປະເທດ ແຫ່ງ ສປ ຈີນ ແລະ ມີບັນດາປະມຸກລັດ, ຫົວໜ້າລັດຖະບານ, ເລຂາທິການໃຫຍ່ ສປຊ ລວມທັງອົງການຈັດຕັ້ງສາກົນຕ່າງໆ ເຂົ້າຮ່ວມຢ່າງຫຼວງຫຼາຍທີ່ມາຈາກທະວິບ ອາຊີ, ເອີຣົບ, ອາເມລິກາ ແລະ ອາຟຣິກາ. ໃນພິທີເປີດດັ່ງກ່າວ, ປະທານ ສີ ຈີ້ນຜີງ ໄດ້ຕີລາຄາສູງຕໍ່ຫມາກຜົນສຳເລັດໃນ 5 ຂົງເຂດບູລິມະສິດການຮ່ວມມືທີ່ ສປ ຈີນ ແລະ ບັນດາປະເທດລຽບຕາມ ຫນຶ່ງແລວ ຫນຶ່ງເສັ້ນທາງໄດ້ຮ່ວມກັນຂຈັດຕັ້ງປະຕິບັດ ຂໍ້ລິເລີ່ມດັ່ງກ່າວໃນໄລຍະ 2 ປີຜ່ານມາ, ນັບຕັ້ງແຕ່ກອງປະຊຸມ ຫນຶ່ງແລວ ຫນຶ່ງເສັ້ນທາງ ເພື່ອການຮ່ວມມືສາກົນໄດ້ຈັດຂຶ້ນເປັນຄັ້ງທຳອິດໃນປີ 2017. ພ້ອມດຽວກັນນີ້, ປະທານ ສີ ຈິ້ນຜິງ ຍັງໄດ້ກ່າວຕື່ມວ່າ ສປ ຈີນ ໃຫ້ຄວາມສຳຄັນ ແລະ ຈະສືບຕໍ່ສະຫນັບສະຫນູນ 6 ແລວເສດຖະກິດຫລັກທີ່ເນັ້ນໃສ່ສ້າງ ແລະ ພັດທະນາພື້ນຖານໂຄງລ່າງຂອງບັນດາປະເທດລຽບຕາມຫນຶ່ງແລວ ຫນຶ່ງເສັ້ນທາງ ໃຫ້ສາມາດເຊື່ອມຈອດກັນຕາມທ່າແຮງ ແລະ ຈຸດພິເສດຂອງແຕ່ລະປະເທດ ແລະ ແຕ່ລະຂົງເຂດ ອັນເປັນປັດໃຈສຳຄັນຫນຶ່ງໃນການພັດທະນາເສດຖະກິດ-ສັງຄົມ ຂອງແຕ່ລະປະເທດບົນພື້ນຖານຕ່າງຝ່າຍຕ່າງມີຜົນປະໂຫຍດ.

ໃນຕອນບ່າຍຂອງວັນດຽວກັນ, ພະນະທ່ານ ປະທານປະເທດ ບຸນຍັງ ວໍລະຈິດ ໄດ້ສືບຕໍ່ເຂົ້າກອງປະຊຸມຂອງຜູ້ນຳລະດັບສູງ ຊຶ່ງໃນໂອກາດດັ່ງກ່າວ ພະນະທ່ານປະທານປະເທດ ໄດ້ກ່າວຄຳເຫັນວ່າ ນັບຕັ້ງແຕ່ປະທານປະເທດ ສີ ຈີ້ນຜີງ ໄດ້ປະກາດຂໍ້ລິເລີ່ມ ໜຶ່ງແລວ ໜຶງເສັ້ນທາງ ໃນປີ 2013 ເປັນຕົ້ນມາ, ຂໍ້ລິເລີ່ມດັ່ງກ່າວໄດ້ສ້າງຄວາມສົນໃຈຢ່າງກ້ວາງຂວາງຢູ່ໃນເວທີສາກົນ. ກອງປະຊຸມໜຶ່ງແລວ ໜຶ່ງເສັ້ນທາງ ເພື່ອການຮ່ວມມືສາກົນ ຄັ້ງທີ່ ໜຶ່ງທີ່ຜ່ານມາ ແລະ ກອງປະຊຸມປິ່ນອ້ອມສຳຄັນຂອງຂະແໜງການທີ່ກ່ຽວຂ້ອງຕ່າງໆໃນປີ 2017 ໄດ້ສະແດງໃຫ້ເຫັນຜົນສໍາເລັດທີ່ເປັນຮູບປະທໍາຕົວຈິງໃນເບື້ອງຕົ້ນ ແລະ ໄດ້ເປີດສັງກາດໃໝ່ໃຫ້ແກ່ການເປີດກ້ວາງ ແລະ ເພີ່ມທະວີການຮ່ວມມືການພັດທະນາເສດຖະກິດ-ສັງຄົມຂອງອານຸພາກພື້ນ, ພາກພື້ນ ແລະ ສາກົນ. ສປປ ລາວ ຕີລາຄາສູງຕໍ່ໝາກຜົນຂອງການຮ່ວມມືພາຍໃຕ້ກອບ ໜຶ່ງແລວ ໜຶ່ງເສັ້ນທາງ ແລະ ໄດ້ປະກອບສ່ວນຢ່າງຕັ້ງໜ້າຕາມພາລະບົດບາດ ແລະ ຄວາມສາມາດຂອງຕົນເຂົ້າໃນການຈັດຕັ້ງປະຕິບັດຕໍ່ຂໍ້ລິເລີ່ມດັ່ງກ່າວ. ສປປ ລາວ ໄດ້ຢືນຢັນວ່າຈະສືບຕໍ່ຮ່ວມມື ແລະ ສະໜັບສະໜູນຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ແລະ ການຈັດຕັ້ງປະຕິບັດບັນດາໂຄງການຂອງຂໍ້ລິເລີ່ມດັ່ງກ່າວເພື່ອຮ່ວມກັນສ້າງສັນຕິພາບ ເພື່ອນຳເອົາຄວາມຈະເລີນສີວິໄລ ແລະ ການພັດທະນາແບບຢືນຍົງມາສູ່ທຸກປະເທດລຽບຕາມໜຶ່ງແລວ ໜຶ່ງເສັ້ນທາງ ຄືດັ່ງຈິດໃຈຂອງຫົວຂໍ້ກອງປະຊຸມມື້ນີ້ “ ການຮ່ວມມືໜຶ່ງແລວໜື່ງເສັ້ນທາງ, ສ້າງອານາຄົດທີ່ສົດໃສຮ່ວມກັນ”.