ໃນຕອນແລງວັນທີ 30 ເມສາ 2019, ໃນໂອກາດຢ້ຽມຢາມລັດຖະກິດ ສປຈີນ, ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ ໄດ້ເຂົ້້າຮ່ວມພິທີຕ້ອນຮັບຢ່າງເປັນທາງການ ຈັດຂຶ້ນໃນລະດັບສູງສຸດ ແລະ ສົມກຽດ ທີ່ຫໍສະພາປະຊາຊົນຈີນ ໂດຍມີການນຳຂັ້ນສູງຂອງສອງພັກ, ສອງລັດ ເຂົ້າຮ່ວມ.

ພາຍຫລັງພິທີຕ້ອນຮັບຢ່າງເປັນທາງການແລ້ວ, ສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ໄດ້ພົບປະກັບ ສະຫາຍເລຂາທິການໃຫຍ່, ປະທານປະເທດ ສີຈິ້ນຜິງ. ໃນການພົບປະ, ສະຫາຍ ບຸນຍັງ ວໍລະຈິດ ໄດ້ສະແດງຄວາມຂອບໃຈຕໍ່ການເຊື້ອເຊີນ ແລະ ການຕ້ອນຮັບອັນອົບອຸ່ນ ສະໜິດສະໜົມ ຂອງ ສະຫາຍ ສີຈິ້ນຜິງ, ບັນດາການນໍາຂັ້ນສູງຂອງພັກ, ລັດຈີນ ທັງຢູ່ສູນກາງ ແລະ ແຂວງຟູຈ້ຽນ ທີ່ຄະນະໄດ້ໄປຢ້ຽມຢາມ ເຊິ່ງສະແດງໃຫ້ເຫັນເຖິງມູນເຊື້ອອັນດີງາມແຫ່ງສາຍພົວພັນແບບຄູ່ຮ່ວມຍຸດທະສາດຮອບດ້ານ ຕາມທິດ 4 ດີ ລະຫວ່າງ ສອງປະເທດ ລາວ-ຈີນ. ສະຫາຍ ບຸນຍັງ ວໍລະຈິດ ສະແດງຄວາມຊົມເຊີຍຕໍ່ຜົນສໍາເລັດອັນຈົບງາມຂອງກອງປະຊຸມເວທີປາໄສການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ຄັ້ງທີ 2 ທີ່ ສປ ຈີນ. ພ້ອມນັ້ນ ຍັງໄດ້ຕີລາຄາສູງຕໍ່ຜົນສຳເລັດອັນສໍາຄັນ ຮອບດ້ານ ຂອງປະຊາຊົນຈີນ ໃນພາລະກິດສ້າງສາສັງຄົມນິຍົມຕາມສີສັນພິເສດຂອງຈີນ, ໂດຍສະເພາະແມ່ນຜ່ານການຢ້ຽມຢາມຄັ້ງນີ້ ໄດ້ຮັບຮູ້ຢ່າງເລິກເຊິ່ງຕໍ່ບົດຮຽນ ແລະ ຜົນສຳເລັດອັນໂດດເດັ່ນໃນການແກ້ໄຂຄວາມທຸກຍາກຂອງ ສປ ຈີນ, ເຊິ່ງໄດ້ເປັນບົດຮຽນອັນປະເສີດ, ສຳຄັນໃຫ້ແກ່ຝ່າຍລາວ. ສະຫາຍ ບຸນຍັງ ວໍລະຈິດ ໄດ້ອວຍພອນໃຫ້ປະຊາຊົນຈີນ ພາຍໃຕ້ການນໍາພາອັນໜັກແໜ້ນ ຂອງພັກກອມມູນິດຈີນ ອັນມີ ສະຫາຍ ສີຈິ້ນຜິງ ເປັນແກນກາງ ຈະສືບຕໍ່ບັນລຸຜົນສໍາເລັດ ໃໝ່ ໃຫຍ່ຫຼວງກວ່າເກົ່າ ໃນການສ້າງສັງຄົມອີ່ມໜຳສຳລານຢ່າງຮອບດ້ານໃນປີ 2020 ກໍຄື ການບັນລຸເປົ້າ  ໝາຍ “100 ປີສອງເຫດການ” ທີ່ກອງປະຊຸມໃຫຍ່ ຄັ້ງທີ 19 ຂອງພັກກອມມູນິດຈີນ ວາງອອກ ທັງເປັນການຂໍ່ານັບຮັບຕ້ອນ ວັນຄົບຮອບ 70 ປີ ແຫ່ງການສະຖາປະນາ ສປ ຈີນ ໃນເດືອນຕຸລາ 2019.

ສະຫາຍ ບຸນຍັງ ວໍລະຈິດ ຢືນຢັນຄືນເຖິງທັດສະນະສະເໝີຕົ້ນສະເໝີປາຍໃນການເສີມຂະຫຍາຍມິດຕະພາບອັນເປັນມູນເຊື້ອ ລາວ-ຈີນ, ການຮ່ວມມືແບບຄູ່ຮ່ວມຍຸດທະສາດຮອບດ້ານ ຕາມທິດ 4 ດີ ທີ່ພວມນໍາເອົາຜົນປະໂຫຍດມາໃຫ້ແກ່ປະຊາຊົນທັງສອງປະເທດ, ສະແດງຄວາມຂອບໃຈຕໍ່ຝ່າຍຈີນ ທີ່ໄດ້ໃຫ້ການສະໜັບສະໜູນຊ່ວຍເຫຼືອອັນໃຫຍ່ຫຼວງໃຫ້ແກ່ພາລະກິດຕໍ່ສູ້ເພື່ອເອກະລາດແຫ່ງຊາດໃນເມື່ອກ່ອນ ກໍ່ຄືພາລະກິດສ້າງສາພັດທະນາະເທດຊາດໃນປັດຈຸບັນຂອງປະຊາຊົນລາວ, ສະແດງຄວາມເປັນເອກະພາບຕໍ່ທິດທາງການຮ່ວມມືໃນຂະແໜງການຕ່າງໆໃນຕໍ່ໜ້າ ໃຫ້ນັບມື້ນັບມີປະສິດທິຜົນ, ພ້ອມກັນຈັດຕັ້ງປະຕິບັດເນື້ອໃນຈິດໃຈແຫ່ງການເປັນຄູ່ຮ່ວມຊາຕາກຳ ລາວ-ຈີນ ທີ່ສອງຝ່າຍໄດ້ລົງນາມກັນໃນຄັ້ງນີ້ໃຫ້ເປັນຮູບປະທໍາ, ສືບຕໍ່ປະຕິບັດບັນດາໂຄງການຮ່ວມມືສຳຄັນຂອງສອງຝ່າຍໃຫ້ບັນລຸຕາມຄາດໝາຍທີ່ວາງໄວ້; ຍິນດີຊຸກຍູ້ເຮັດໃຫ້ຍຸດທະສາດ “ການຫັນປະເທດບໍ່ມີຊາຍແດນຕິດກັບທະເລ ເປັນປະເທດເຊື່ອມໂຍງເຊື່ອມຈອດ” ຂອງລາວ ເຊື່ອມຈອດເຂົ້າກັບ ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ.

ໃນໂອກາດນີ້, ສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ໄດ້ເຊື້ອເຊີນ ສະຫາຍເລຂາທິການໃຫຍ່, ປະທານປະເທດ ສີຈິ້ນຜິງ ຢ້ຽມຢາມ ສປປ ລາວ.

ໃນການພົບປະດັ່ງກ່າວ, ສະຫາຍ ສີຈິ້ນຜິງ ສະແດງຄວາມຍິນດີຕ້ອນຮັບ ສະຫາຍ ບຸນຍັງ ວໍລະຈິດ ພ້ອມດ້ວຍຄະນະ ທີ່ຢ້ຽມຢາມລັດຖະກິດ ຢູ່ ສປ ຈີນ ແລະ ສະແດງຄວາມຂອບໃຈຕໍ່ການເຂົ້າຮ່ວມກອງປະຊຸມເວທີປາໄສການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ຄັ້ງທີ 2; ຕີລາຄາສູງຕໍ່ຜົນຂອງການພົບປະກັບການນໍາຂັ້ນສູງຂອງຈີນ ແລະ ຜົນການຢ້ຽມຢາມ ແຂວງຟູຈ້ຽນ ຂອງ ສະຫາຍ ບຸນຍັງ ວໍລະຈິດ ພ້ອມດ້ວຍຄະນະ, ເຊິ່ງແຂວງຟູຈ້ຽນ ເປັນແຂວງທີ່ ສະຫາຍ ສີຈິ້ນຜິງ ເຄີຍຊີ້ນໍານໍາພາຢູ່ແຂວງດັ່ງກ່າວ ເປັນເວລາເກືອບ 18 ປີ. ສະຫາຍ ສີຈິ້ນຜິງ ຍັງໄດ້ແລກປ່ຽນທັດສະນະກ່ຽວກັບສະພາບການພາກພື້ນ ແລະ ສາກົນ, ການກໍ່ສ້າງສັງຄົມນິຍົມ ກໍ່ຄືບົດຮຽນ ຂອງ ສປ ຈີນ ໃນການສ້າງສັງຄົມນິຍົມທີ່ມີສີສັນພິເສດຂອງຈີນ, ໄດ້ເນັ້ນໜັກເຖິງຄວາມສໍາຄັນຂອງການນໍາພາຂອງພັກ ໃນພາລະກິດກໍ່ສ້າງສັງຄົມນິຍົມ. ສອງປະເທດ ລາວ-ຈີນ ຕ້ອງຮ່ວມມືກັນໃຫ້ແໜ້ນແຟ້ນກວ່າເກົ່າ, ມີການແລກປ່ຽນບົດຮຽນບົດຮຽນໃນດ້ານທິດສະດີ, ວຽກງານກໍ່ສ້າງພັກ-ພະນັກງານ, ການປົກຄອງລັດ-ບໍລິຫານປະເທດ, ວຽກງານສຶກສາຄົນຮຸ່ນໜຸ່ມ ໃຫ້ເປັນຜູ້ສືບທອດມິດຕະພາບ ລາວ-ຈີນ ຕໍ່ໄປ.

ສະຫາຍເລຂາທິການໃຫຍ່, ປະທານປະເທດ ສີຈິ້ນຜິງ ໄດ້ສະແດງຄວາມຂອບໃຈ ແລະ ຕອບຮັບການເຊື້ອເຊີນໄປຢ້ຽມຢາມ ສປປ ລາວ ຂອງ ສະຫາຍເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ໃນເວລາທີ່ເໝາະສົມ.

ພາຍຫຼັງການພົບປະ, ສະຫາຍເລຂາທິການໃຫຍ່ ຂອງສອງພັກ ໄດ້ຮ່ວມກັນລົງນາມ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ, ເຊິ່ງເປັນເອກະສານທີ່ເປັນທິດທາງໃຫ້ແກ່ການຮ່ວມມືສອງຝ່າຍໃນຕໍ່ໜ້າ. ນອກນັ້ນ, ສອງເລຂາທິການໃຫຍ່ ຍັງໄດ້ຮ່ວມເປັນສັກຂີພິຍານໃນພິທີເຊັນເອກະສານສັນຍາການຮ່ວມມືສອງຝ່າຍ ໃນຂະແໜງ ເສດຖະກິດ, ການຄ້າ, ການລົງທຶນ, ໄຟຟ້າ, ດ້ານກະສິກຳ ແລະ ອື່ນໆ ຈຳນວນ 10 ສະບັບ.