ໃນວັນທີ 17 ກໍລະກົດ 2019, ທີ່ກະຊວງການຕ່າງປະເທດ, ທ່ານສະເຫຼີມໄຊກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການເຂົ້າຢ້ຽມອຳລາຂອງທ່ານDavid Hugh Evans, ເອກອັກຄະຣາຊະທູດແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ ປະຈໍາ ສປປ ລາວ.
ຊຶ່ງໃນໂອກາດນີ້, ທ່ານລັດຖະມົນຕີ ໄດ້ສະແດງຄວາມຊົມເຊີຍທ່ານທູດທີ່ໄດ້ປະຕິບັດໜ້າທີ່ການທູດຂອງຕົນດ້ວຍຜົນສຳເລັດອັນຈົບງາມຢູ່ ສປປ ລາວ ໂດຍໄດ້ປະກອບສ່ວນເຂົ້າໃນການຮັກສາ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນມີໝາກຜົນລະຫວ່າງ ສປປ ລາວ ແລະ ສະຫະຣາຊະອານາຈັກອັງກິດ ແລະ ອຽກລັງເໜືອ. ນອກຈາກນັ້ນ, ທ່ານລັດຖະມົນຕີກໍ່ໄດ້ສະແດງຄວາມຂອບໃຈຕໍ່ການຊ່ວຍເຫຼືອອັນມີຄ່າຂອງລັດຖະບານ ແລະ ປະຊາຊົນອັງກິດໃຫ້ແກ່ ສປປ ລາວ ໃນໄລຍະຜ່ານມາຈົນເຖິງປັດຈຸບັນ, ທັງໃນຂອບສອງຝ່າຍ ແລະ ຫຼາຍຝ່າຍ, ເປັນຕົ້ນແມ່ນວຽກງານການສຶກສາ, ສາທາລະນະສຸກ, ການອະນຸລັກສັດປ່າ ແລະ ສິ່ງແວດລ້ອມ, ດ້ານເສດຖະກິດ ແລະ ການເກັບກູ້ລະເບີດທີ່ຍັງບໍ່ທັນແຕກ ລວມມູນຄ່າຫຼາຍກວ່າ 10 ລ້ານໂດລາສະຫະລັດ. ພ້ອມກັນນັ້ນ, ກໍ່ໄດ້ສະແດງຄວາມຊົມເຊີຍຕໍ່ຜົນສຳເລັດໃນການເຊັນ MoU ດ້ານການສຶກສາລະຫວ່າງລັດຖະບານ ແຫ່ງ ສປປ ລາວ ກັບລັດຖະບານແຫ່ງສະຫະຣາຊະອານາຈັກອັງກິດ ແລະ ອຽກລັງເໜືອ, ເຊິ່ງເປັນການເພີ່ມທະວີການພົວພັນຮ່ວມມືທາງດ້ານການສຶກສາ ລະຫວ່າງ ສອງປະເທດ. ນອກຈາກນັ້ນ, ທັງສອງຝ່າຍກໍ່ໄດ້ປຶກສາຫາລືກ່ຽວກັບການສ້າງຕັ້ງສະມາຄົມມິດຕະພາບ ລາວ-ອັງກິດ ເຊິ່ງເປັນຂໍ້ລິເລີ້ມອັນດີໃນການສົ່ງເສີມການພົວພັນຮ່ວມມືລະຫວ່າງ ລາວ-ອັງກິດ ພາຍຫຼັງອັງກິດ ສຳເລັດການດຳເນີນງານການອອກຈາກ ອີຢູ ແລ້ວ.
ຄຽງຄູ່ກັນນັ້ນ, ທັງສອງຝ່າຍຍັງໄດ້ແລກປ່ຽນຄຳຄິດເຫັນເຊິ່ງກັນ ແລະ ກັນ ກ່ຽວກັບທິດທາງໃນການເສີມຂະຫຍາຍການພົວພັນຮ່ວມມືທີ່ມີມູນເຊື້ອອັນດີ ລະຫວ່າງ ສອງປະເທດໃຫ້ເຂັ້ມແຂງ ແລະ ແຕກດອກອອກຜົນຍິ່ງໆຂຶ້ນໃນຕໍ່ໜ້າ. ໃນຕອນທ້າຍນີ້, ທ່ານລັດຖະມົນຕີກະຊວງການຕ່າງປະເທດ ກໍ່ໄດ້ອວຍພອນໃຫ້ ທ່ານ David Hugh Evans, ຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສຳເລັດທຸກປະການໃນການປະຕິບັດໜ້າທີ່ວຽກງານໃໝ່ຂອງທ່ານ.