ໃນວັນທີ 21 ມັງກອນ 2020, ຄະນະສະຫະພັນແມ່ຍິງກະຊວງການຕ່າງປະເທດ ນຳໂດຍ ທ່ານ ນາງ ອາລູນີ ກົມມະສິດ, ພັນລະຍາລັດຖະມົນຕີ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ ໄດ້ນຳເອົາວັດຖຸ ແລະ ປັດໃຈ ເຊິ່ງໃນນັ້ນລວມມີ ເຄື່ອງບໍລິໂພກ ຈໍານວນໜຶ່ງ ແລະ ເງິນສົດ ລວມເປັນມູນຄ່າທັງໝົດ 6.150.000 ກີບ ມອບໃຫ້ແກ່ສະຫະພັນແມ່ຍິງກະຊວງປ້ອງກັນປະເທດ ເພື່ອປະກອບສ່ວນຊຸກຍູ້ ແລະ ເປັນກຳລັງໃຈ ນຳໄປມອບໃຫ້ອ້າຍນ້ອງ, ນາຍ ແລະ ພົນທະຫານ ກະຊວງປ້ອງກັນປະເທດ ທີ່ປະຕິບັດໜ້າທີ່ຢູ່ແນວໜ້າ ເຂດຊົນນະບົດ, ທຸລະກັນດານ ແລະ ຫ່າງໄກສອກຫລີກ ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ.

ໃນພິທີມອບ-ຮັບ, ທ່ານ ນາງ ວັນເພັງ ໄຊຊົມພູ, ຕາງໜ້າຄະນະບໍລິຫານງານສະຫະພັນແມ່ຍິງກະຊວງການຕ່າງປະເທດ ໄດ້ກ່າວມອບປັດໃຈດັ່ງກ່າວ ໂດຍການກ່າວຮັບຂອງ ທ່ານ ພັອ ນາງ ໄພວອນ ອິນທະບຸດ, ຫົວໜ້າຫ້ອງການສະຫະພັນແມ່ຍິງກະຊວງປ້ອງກັນປະເທດ ແລະ ເປັນກຽດມອບ-ຮັບ ໂດຍ ທ່ານ ນາງ ອາລູນີ ກົມມະສິດ ແລະ ທ່ານ ພັທ ນາງ ໄພວັນ ເລືອງບຸນມີ, ພັນລະຍາຮອງລັດຖະມົນຕີກະຊວງປ້ອງກັນປະເທດ ເຊິ່ງມີຄະນະສະຫະພັນແມ່ຍິງ ກະຊວງການຕ່າງປະເທດ ແລະ ກະຊວງປ້ອງກັນປະເທດ ເຂົ້າຮ່ວມເປັນສັກຂີພະຍານ.

ໃນໂອກາດນີ້, ຄະນະສະຫະພັນແມ່ຍິງກະຊວງການຕ່າງປະເທດ ໄດ້ສະແດງຄວາມຊົມເຊີຍເອື້ອຍນ້ອງແມ່ຍິງກະຊວງປ້ອງກັນປະເທດ ທີ່ໄດ້ເປັນກຳລັງແຮງ, ອົດທົນຜ່ານຜ່າ ແລະ ຍູ້ໜູນອ້າຍນ້ອງຊາຍ ຕະຫລອດໄລຍະທີ່ຜ່ານມາ. ສະແດງຄວາມຮູ້ບຸນຄຸນ ແລະ ຝາກຄວາມຊົມເຊີຍ ໄປຍັງຄະນະນຳກະຊວງປ້ອງກັນປະເທດ, ນາຍ ແລະ ພົນທະຫານ, ນັກຮົບ ແລະ ສະມາຊິກຄອບຄົວທຸກຖ້ວນໜ້າ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ມີຄວາມຈະເລີນຮຸ່ງເຮື່ອງຍິ່ງໆຂຶ້ນ.

ໃນໂອກາດດຽວກັນ, ຄະນະສະຫະພັນແມ່ຍິງກະຊວງປ້ອງກັນປະເທດ ກໍໄດ້ສະແດງຄວາມຂອບໃຈ ຕໍ່ການມອບເຄື່ອງຊ່ວຍເຫຼືອໃນຄັ້ງນີ້ ແລະ ໄດ້ກ່າວເນັ້ນເຖິງຄວາມໝາຍຄວາມສໍາຄັນຂອງວັນສ້າງຕັ້ງກອງທັບປະຊາຊົນລາວ ລວມເຖິງການປະກອບສ່ວນເຂົ້າໃນວຽກງານປ້ອງກັນປະເທດ, ປົກປັກຮັກສາ ແລະ ສ້າງສາພັດທະນາປະເທດ ຂອງອ້າຍນ້ອງ, ນາຍ ແລະ ພົນທະຫານ ເວົ້າລວມ, ເວົ້າສະເພາະ ເອື້ອຍນ້ອງຍິງ.