ໃນຕອນເຊົ້າຂອງວັນທີ 5 ກຸມພາ 2020, ຢູ່ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ Anar IMANOV (ເອນາ ອີມານົບ), ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ອາແຊັກໄບຊານ ປະຈໍາ ສປປ ລາວ, ເນື່ອງໃນໂອກາດທີ່ທ່ານໄດ້ສໍາເລັດການປະຕິບັດໜ້າທີ່ ເປັນເອກອັກຄະລັດຖະທູດ ອາແຊັກໄບຊານ ປະຈໍາ ສປປ ລາວ.
ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍຢ່າງຈິງໃຈ ຕໍ່ທ່ານເອກອັກຄະລັດຖະທູດ ທີ່ໄດ້ສໍາເລັດໜ້າທີ່ການທູດຂອງຕົນ ຢ່າງມີຜົນສໍາເລັດອັນຈົບງາມ ແລະ ຕີລາຄາສູງ ຕໍ່ການປະກອບສ່ວນອັນສໍາຄັນຢ່າງຕັ້ງໜ້າ ໃນການຊຸກຍູ້ ແລະ ເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສ. ອາແຊັກໄບຊານ ຕະຫຼອດໄລຍະທີ່ທ່ານໄດ້ມາປະຕິບັດໜ້າທີ່ປະຈໍາ ສປປ ລາວ.
ໃນໂອກາດດັ່ງກ່າວ, ສອງຝ່າຍ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອດີງາມມາແຕ່ດົນນານ ລະຫວ່າງສອງປະເທດ ໂດຍສະເພາະ ໃນປີ 2020 ນີ້ ແມ່ນຈະຄົບຮອບ 25 ປີ ວັນສ້າງຕັ້ງສາຍພົວພັນການທູດ ລະຫວ່າງ ລາວ ແລະ ອາແຊັກໄບຊານ ຊຶ່ງຈະໄດ້ຊຸກຍູ້ໃຫ້ມີການແລກປ່ຽນຄະນະຜູ້ແທນ ແລະ ຈັດກິດຈະກໍາຮ່ວມກັນ ເພື່ອສະເຫຼີມສະຫຼອງວັນສໍາຄັນດັ່ງກ່າວ. ໃນນີ້ ທ່ານທູດ ອາແຊັກໄບຊານ ກໍ່ໄດ້ຢືນຢັນເຖິງຄວາມມຸ້ງມາດປາຖະນາຂອງ ອາແຊັກໄບຊານ ທີ່ຈະສືບຕໍ່ການຮ່ວມມືກັບ ສປປ ລາວ ທັງໃນຂອບສອງຝ່າຍ ແລະ ຫຼາຍຝ່າຍ ໃຫ້ສືບຕໍ່ພັດທະນາ ແລະ ມີບາດກ້າວໃໝ່ໃນອະນາຄົດ.
ໃນຕອນທ້າຍ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ອວຍພອນໃຫ້ ທ່ານ ເອນາ ອີມານົບ ປະສົບຜົນສໍາເລັດໃນການປະຕິບັດໜ້າທີ່ອັນໃໝ່ຂອງເພິ່ນ ແລະ ເດີນທາງກັບຄືນປະເທດ ດ້ວຍຄວາມສະຫວັດດີພາບ.