ກອງປະຊຸມໃຫຍ່ ຄັ້ງທີ I ຂອງໜ່ວຍພັກສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສິງກະໂປ ໄດ້ໄຂຂຶ້ນຢ່າງເປັນທາງການ ໃນວັນທີ 7 ກຸມພາ 2020, ໂດຍການເປັນປະທານຂອງ ສະຫາຍ ຄອນເພັງ ທໍາມະວົງ, ເລຂາໜ່ວຍພັກສະຖານທູດ, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສິງກະໂປ ເຊິ່ງມີສະມາຊິກພັກສົມບູນຂອງໜ່ວຍພັກສະຖານທູດເຂົ້າຮ່ວມທັງໝົດ 6 ສະຫາຍ.

ກອງປະຊຸມດັ່ງກ່າວນີ້ ແມ່ນເພື່ອເປັນພາກສ່ວນໜຶ່ງຂອງຂະບວນການກະກຽມໃຫ້ແກ່ກອງປະຊຸມ 3 ຂັ້ນອົງຄະນະພັກກະຊວງການຕ່າງປະເທດ ແລະ ກະກຽມໃຫ້ແກ່ ກອງປະຊຸມໃຫຍ່ຂອງອົງຄະນະພັກກະຊວງການຕ່າງປະເທດ ຄັ້ງທີ IV ແລະ ກອງປະຊຸມໃຫຍ່ຂອງ ພັກປະຊາຊົນ ປະຕິວັດລາວ ຄັ້ງທີ XI ທີ່ຈະມາເຖິງໃນມໍ່ໆນີ້.

ກອງປະຊຸມຄັ້ງນີ້ ໄດ້ທົບທວນ ແລະ ຕີລາຄາຄືນບັນດາໝາກຜົນແຫ່ງການຊີ້ນໍານໍາພາຂອງໜ່ວຍພັກ ກໍ່ຄືການຈັດຕັ້ງປະຕິບັດບັນດາມະຕິຄຳສັ່ງຕ່າງໆ ທີ່ໜ່ວຍພັກໄດ້ວາງອອກໃນຊຸມປີຜ່ານມາ, ໄດ້ມີການຄົ້ນຄວ້າປະກອບຄໍາເຫັນໃສ່ບົດລາຍງານການເມືອງ ແລະ ທິດທາງແຜນການໃນຕໍ່ໜ້າ, ແລະ ຜ່ານບົດສໍາຫຼວດການນໍາພາຂອງຄະນະໜ່ວຍພັກຊຸດເກົ່າ, ໄດ້ເຫັນດີຮັບຮອງເອົາບົດລາຍງານການເມືອງ, ທິດທາງແຜນການໃນຕໍ່ໜ້າ, ຄາດໝາຍສູ້ຊົນ ແຕ່ນີ້ເຖິງປີ 2023 ແລະ ຮັບຮອງເອົາມະຕິຂອງກອງປະຊຸມ. ພ້ອມທັງມີການປ່ອນບັດຄັດເລືອກເອົາຄະນະພັກຊຸດໃໝ່ຂອງສະຖານທູດ 2 ສະຫາຍ ແລະ ຄັດເລືອກເອົາຜູ້ແທນ 1 ສະຫາຍ ເພື່ອໄປຮ່ວມ ກອງປະຊຸມໃຫຍ່ຂອງຄະນະພັກກະຊວງການຕ່າງປະເທດ ຄັ້ງທີ IV ເຊິ່ງຈະຈັດຂຶ້ນໃນຕໍ່ໜ້າ.