ໂດຍຕອບສະໜອງຕາມການເຊື້ອເຊີນຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ອູ ຈໍ ຕິນ, ລັດຖະມົນຕີກະຊວງຮ່ວມມືສາກົນ ແຫ່ງ ສາທາລະນະລັດ ສະຫະພາບ ມຽນມາ, ໄດ້ນຳພາຄະນະຜູ້ແທນມຽນມາເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເປັນປະທານຮ່ວມ ກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍ ລາວ-ມຽນມາ; ມຽນມາ-ລາວ ຄັ້ງທີ 12, ທີ່ ນະຄອນຫຼວງວຽງຈັນ, ໃນລະຫວ່າງວັນທີ 04-07 ມີນາ 2020.
ກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍ ລາວ-ມຽນມາ; ມຽນມາ-ລາວ ຄັ້ງທີ 12, ໄດ້ຈັດຂຶ້ນ ໃນວັນທີ 06 ມີນາ 2020, ທີ່ ກະຊວງການຕ່າງປະເທດ, ໂດຍພາຍໃຕ້ການເປັນປະທານຮ່ວມຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ອູ ຈໍ ຕິນ, ລັດຖະມົນຕີກະຊວງຮ່ວມມືສາກົນ ແຫ່ງ ສສ.ມຽນມາ. ໃນກອງປະຊຸມຄັ້ງນີ້, ໄດ້ດໍາເນີນໄປດ້ວຍບັນຍາກາດໄມຕີຈິດມິດຕະພາບ ແລະ ເຂົ້າອົກເຂົ້າໃຈ ຊຶ່ງກັນ ແລະ ກັນ, ຊຶ່ງທັງສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງສອງປະເທດ, ພ້ອມທັງສະແດງຄວາມຊົມເຊີຍ ໃນໂອກາດ ຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດຮ່ວມກັນ ລະຫວ່າງ ສປປ ລາວ ແລະ ສສ. ມຽນມາ (12/7/1955-12/07/2020) ໃນປີ 2020 ນີ້, ຊຶ່ງເຫັນວ່າ ຕະຫຼອດ 6 ທົດສະຫວັດເຄິ່ງຜ່ານມາ ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ໄດ້ຮັບການສົ່ງເສີມໃຫ້ຂະຫຍາຍຕົວຢ່າງບໍ່ຢຸດຢັ້ງ, ຊຶ່ງເຫັນໄດ້ຈາກການແລກປ່ຽນການຢ້ຽມຢາມຂອງການນຳຂັ້ນສູງ ລະຫວ່າງສອງປະເທດ ຢ່າງເປັນປົກກະຕິ. ພ້ອມກັນນີ້, ສອງຝ່າຍ ຍັງໄດ້ທົບທວນຄືນ ກ່ຽວກັບ ການພົວພັນຮ່ວມມືຂອງສອງປະເທດ ໃນໄລຍະຜ່ານມາ ໂດຍສະເພາະແມ່ນ ການຈັດຕັ້ງຜັນຂະຫຍາຍເນື້ອໃນບົດບັນທຶກກອງປະຊຸມຄະນະກຳມະການຮ່ວມ ວ່າດ້ວຍການຮ່ວມມືສອງຝ່າຍ ລາວ-ມຽນມາ; ມຽນມາ-ລາວ ຄັ້ງທີ 11, ທີ່ ນະຄອນຫຼວງເນປິດໍ, ສສ. ມຽນມາ, ແຕ່ວັນທີ 01-04 ມີນາ 2015, ຊຶ່ງມີຫຼາຍດ້ານທີ່ໄດ້ມີຄວາມຄືບໜ້າຢ່າງເປັນຮູບປະທຳ. ນອກຈາກນັ້ນ, ສອງຝ່າຍ ກໍໄດ້ຕີລາຄາສູງ ຕໍ່ຜົນສຳເລັດໃນການຮ່ວມມືຂອງຫຼາຍຂະແໜງການຕ່າງໆ ເຊັ່ນ: ຂະແໜງການຕ່າງປະເທດ, ການປ້ອງກັນຊາດ-ປ້ອງກັນຄວາມສະຫງົບ, ການຮ່ວມມືດ້ານເສດຖະກິດ-ການຄ້າ, ວຽກງານສຶກສາທິການ ແລະ ກິລາ, ວັດທະນະທຳ-ສັງຄົມ, ວຽກງານສາດສະໜາ ແລະ ອື່ນໆ.ນອກຈາກຂອບການຮ່ວມມືສອງຝ່າຍແລ້ວ ກໍຍັງໄດ້ສືບຕໍ່ໃຫ້ການສະໜັບສະໜູນ ຊຶ່ງກັນ ແລະ ກັນ ໃນຂອບການຮ່ວມມືພາກພື້ນ ແລະ ສາກົນ ເປັນຕົ້ນແມ່ນ: ອາຊຽນ (ASEAN), ອະນຸພາກພື້ນແມ່ນ້ຳຂອງ (GMS), ແມ່ນໍ້າອີຣະວະດີ-ແມ່ນໍ້າເຈົ້າພະຍາ-ແມ່ນໍ້າຂອງ (ACMECS), ກໍາປູເຈຍ-ລາວ-ມຽນມາ-ຫວຽດນາມ (CLMV), ຂອບການຮ່ວມມືແມ່ນໍ້າຂອງ (Mekong Cooperation), ອົງການສະຫະປະຊາຊາດ (The United Nations) ແລະ ອື່ນໆຢ່າງເປັນປົກກະຕິ.ໃນດ້ານວຽກງານຊາຍແດນ ສອງຝ່າຍ ໄດ້ສະແດງຄວາມຊົມເຊີຍ ທີ່ໄດ້ສຳເລັດການສ້າງຂົວມິດຕະພາບ ລະຫວ່າງສອງປະເທດ ແລະ ຊົມເຊີຍຕໍ່ຜົນສຳເລັດ ໃນການລົງກວດກາ ແລະ ສ້ອມແປງຫຼັກໝາຍຊາຍແດນຮ່ວມ ຄັ້ງທີ 5 ແລະ ຕີລາຄາສູງຕໍ່ໝາກຜົນຂອງ ກອງປະຊຸມຄະນະກຳມະການຊາຍແດນ ລາວ-ມຽນມາ ຂັ້ນສູນກາງ ຄັ້ງທີ 13ໃນປີ 2018; ແລະ ກອງປະຊຸມຄະນະກໍາມະການຊາຍແດນ ລາວ-ມຽນມາ ຂັ້ນແຂວງ/ເຂດ ຄັ້ງທີ 9 ໃນປີ 2019 ທີ່ຜ່ານມາ, ຊຶ່ງສອງຝ່າຍ ໄດ້ມີການແລກປ່ຽນຂໍ້ມູນຂ່າວສານຕ່າງໆ ຊຶ່ງກັນ ແລະ ກັນ, ພ້ອມທັງຊຸກຍູ້ໃຫ້ມີການຈັດຕັ້ງປະຕິບັດ ຕາມເນື້ອໃນບົດບັນທຶກຂອງກອງປະຊຸມ ທີ່ໄດ້ຕົກລົງກັນຢ່າງມີປະສິດທິຜົນ ທັງນີ້ ກໍເພື່ອປະກອບສ່ວນເຂົ້າໃນການສ້າງເຂດຊາຍແດນ ໃຫ້ການເປັນເຂດທີ່ມີສັນຕິພາບ, ມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ມຽນມາ. ແຕ່ເຖິງຢ່າງໃດກໍຕາມສອງຝ່າຍ ກໍສັງເກດເຫັນວ່າ: ຄວນມີການເອົາໃຈໃສ່ ແລະ ຊຸກຍູ້ໃຫ້ບາງຂະແໜງການກ່ຽວຂ້ອງເພີ່ມທະວີການຮ່ວມມືເພື່ອຍົກລະດັບການພົວພັນຮ່ວມມືວິຊາການໃຫ້ດີກວ່າເກົ່າ ເພື່ອຮ່ວມມືກັນຈັດຕັ້ງປະຕິບັດ ແລະ ຜັນຂະຫຍາຍໃຫ້ເປັນຮູບປະທຳ. ສ່ວນແຜນການແລະທິດທາງການຮ່ວມມືໃນອະນາຄົດນັ້ນ ສອງຝ່າຍຕົກລົງເຫັນດີທີ່ຈະສືບຕໍ່ໃຫ້ມີການແລກປ່ຽນຄະນະຜູ້ແທນນຳກັນທຸກຂັ້ນ, ທຸກລະດັບ ແລະ ທຸກຂະແໜງການແຕ່ສູນກາງເຖິງທ້ອງຖິ່ນ ຢ່າງເປັນປົກປະຕິ ແລະ ຕໍ່ເນື່ອງລຽນຕິດ, ເພື່ອສືບຕໍ່ປະຕິບັດຜັນຂະຫຍາຍບົດບັນທຶກແຜນການຮ່ວມມື ລະຫວ່າງຂະແໜງການກ່ຽວຂ້ອງ ທີ່ໄດ້ລົງນາມຮ່ວມກັນແລ້ວນັ້ນ ໃຫ້ເກີດດອກອອກຜົນ. ສອງຝ່າຍ ເຫັນດີສືບຕໍ່ຊອກຫາກາລະໂອກາດຮ່ວມກັນ ເພື່ອສົ່ງເສີມການທ່ອງທ່ຽວ ລະຫວ່າງສອງປະເທດ ກໍຄື ລະດັບອະນຸພາກພື້ນ ແລະ ພາກພື້ນ ເພື່ອເປັນການເຜີຍແຜ່ຄວາມສວຍງາມດ້ານທຳມະຊາດ ແລະ ຄວາມຮັ່ງມີທາງດ້ານມໍລະດົກວັດທະນະທຳ. ພ້ອມດຽວກັນ, ກໍໃຫ້ສົ່ງເສີມການທ່ອງທ່ຽວ ແລະ ການໄປມາຫາສູ່ກັນຂອງປະຊາຊົນສອງປະເທດ ເພື່ອສ້າງຄວາມໃກ້ຊິດ ແລະ ເຂົ້າອົກເຂົ້າໃຈກັນໃຫ້ຫຼາຍຂຶ້ນ. ພາຍຫຼັງສຳເລັດກອງປະຊຸມດັ່ງກ່າວ, ສອງຝ່າຍ ຍັງໄດ້ຮ່ວມກັນລົງນາມບົດບັນທຶກກອງປະຊຸມ ແລະ ຝ່າຍລາວ ກໍໄດ້ຖືໂອກາດດັ່ງກ່າວ ຕາງໜ້າໃຫ້ລັດຖະບານ ແລະ ປະຊາຊົນລາວ ມອບເງິນຊ່ວຍເຫຼືອຈຳນວນເງິນ ມູນຄ່າ 50,000 ໂດລາ ສະຫະລັດ, ເພື່ອຊ່ວຍເຫຼືອເພື່ອນມິດມຽນມາ ໃນການຟື້ນຟູຊ່ວຍເຫຼືອປະຊາຊົນ ທີ່ ລັດຣະຄ່າຍ ໃຫ້ມີຊີວິດການເປັນຢູ່ດີຂຶ້ນອີກດ້ວຍ.
ໃນໄລຍະການຢ້ຽມຢາມ ແລະ ເຂົ້າຮ່ວມກອງປະຊຸມຄັ້ງນີ້, ທ່ານລັດຖະມົນຕີ ອູ ຈໍ ຕິນ ພ້ອມດ້ວຍຄະນະ ຍັງໄດ້ເຂົ້າຢ້ຽມຂໍ່ານັບ ພະນະທ່ານ ຮອງປະທານປະເທດ ພັນຄຳ ວິພາວັນ, ທີ່ ທຳນຽບປະທານປະເທດ ແລະ ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ, ທີ່ ສຳນັກງານນາຍົກລັດຖະມົນຕີ. ໃນການພົບປະໂອ້ລົມ ທ່ານລັດຖະມົນຕີ ອູ ຈໍ ຕິນ ໄດ້ນຳເອົາຄວາມຢື້ຢາມຖາມຂ່າວ ຈາກບັນດາການນຳຂັ້ນສູງ ແຫ່ງ ສສ. ມຽນມາ ເຖິງ ບັນດາການນຳຂັ້ນສູງ ແຫ່ງ ສປປ ລາວ, ພ້ອມທັງສະແດງຄວາມຂອບໃຈມາຍັງລັດຖະບານ ກໍຄື ປະຊາຊົນລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໃນການເດີນທາງມາຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມືສອງຝ່າຍ ລາວ-ມຽນມາ; ມຽນມາ-ລາວຄັ້ງທີ 12 ໃນຄັ້ງນີ້ ຈົນໄດ້ຮັບຜົນສຳເລັດຢ່າງຈົບງາມ. ນອກຈາກນີ້, ໃນລະຫວ່າງການຢ້ຽມຢາມ ສປປ ລາວ ທ່ານລັດຖະມົນຕີ ອູ ຈໍ ຕິນ ຍັງໄດ້ທ່ຽວຊົມບັນດາສະຖານທີ່ທ່ອງທ່ຽວສຳຄັນຕ່າງໆ ເຊັ່ນ: ປະຕູໄຊ, ພະທາດຫຼວງວຽງຈັນ ແລະ ອື່ນໆ.