ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ
ຕ້ອນຮັບການເຂົ້າຢ້ຽມອໍາລາຂອງ ທ່ານ ອົກຕາວຽນ ບີໂວ, ຜູ້ຕາງໜ້າຂອງອົງການ UNICEF ປະຈຳ ສປປ ລາວ
ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ
ປະດັບຫຼຽນກາມິດຕະພາບໃຫ້ແກ່ ທ່ານ ອົກຕາວຽນ ບີໂວ, ຜູ້ຕາງໜ້າຂອງອົງການ UNICEF ປະຈຳ ສປປ ລາວ
ໃນຕອນເຊົ້າຂອງ ວັນທີ 17 ມີນາ 2020, ທີ່ ກະຊວງການຕ່າງປະເທດ ໄດ້ມີການຈັດພິທີປະດັບຫຼຽນກາມິດຕະພາບໃຫ້ແກ່ ທ່ານ ອົກຕາວຽນ ບີໂວ (Mr. Octavian BIVOL), ຜູ້ຕາງໜ້າຂອງອົງການ UNICEF ປະຈຳ ສປປ ລາວ ໃນໂອກາດທີ່ທ່ານສິ້ນສຸດການປະຕິບັດໜ້າທີ່ ຢູ່ ສປປ ລາວ. ຕາງໜ້າໃຫ້ລັດຖະບານ ສປປ ລາວ ເພື່ອປະດັບຫຼຽນດັ່ງກ່າວແມ່ນ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ. ທ່ານ ອົກຕາວຽນ ບີໂວ ໄດ້ຖືກແຕ່ງຕັ້ງ ໃຫ້ມາເປັນ ຜູ້ຕາງໜ້າອົງການ UNICEF ປະຈຳ ສປປ ລາວ ຕັ້ງແຕ່ທ້າຍປີ 2017, ເຊີ່ງຕະຫຼອດໄລຍະຂອງການປະຕິບັດໜ້າທີ່ ທ່ານໄດ້ປະກອບສ່ວນຢ່າງຕັ້ງໜ້າເຂົ້າໃນການເຄື່ອນໄຫວ ຊີ້ນໍາວຽກງານການຊ່ວຍເຫຼືອຂອງອົງການ UNICEF ຕໍ່ ສປປ ລາວ, ກໍ່ຄືການຊຸກຍູ້ ແລະ ສະໜັບສະໜູນລັດຖະບານ ສປປ ລາວ ໃນວຽກງານການພັດທະນາເດັກນ້ອຍ, ການເສີມຂະຫຍາຍ ແລະ ປັບປຸງການໃຫ້ບໍລິການ ເພື່ອປ້ອງກັນການແຜ່ລະບາດຂອງເຊື້ອພະຍາດຕິດແປດຕ່າງໆ, ການສົ່ງເສີມໂພຊະນາການເດັກ, ການປັບປຸງການສຶກສາໃນຂັ້ນອະນຸບານ ແລະ ນໍ້າສະອາດໃນເຂດຊຸມຊົນ ແລະ ສະຖານທີ່ການສຶກສາຕ່າງໆໃນເຂດຫ່າງໄກສອກຫຼີກ, ການຊ່ວຍເຫຼືອສຸກເສີນໃນເວລາເກີດ ແລະ ການຟື້ນຟູພາຍຫຼັງໄພພິບັດ ໂດຍສະເພາະແມ່ນການຊຸກຍູ້ວຽກງານການຈັດ ຕັ້ງປະຕິບັດເປົ້າໝາຍການພັດທະນາແບບຍືນຍົງ ທີ່ຕິດພັນກັບແມ່ຍິງ ແລະ ເດັກນ້ອຍ. ໃນໄລຍະດຳລົງຕໍາແໜ່ງດັ່ງກ່າວ, ທ່ານ ສາມາດລະດົມທຶນເຂົ້າໃນການຈັດຕັ້ງປະຕິບັດວຽກງານຂອງ ອົງການ UNICEF ປະຈຳ ສປປ ລາວ ມີມູນຄ່າເຖີງ 62,880,000 ໂດລາສະຫະລັດ. ເຂົ້າຮ່ວມເປັນສັກຂີພິຍານ ໃນການປະດັບຫຼຽນກາຄັ້ງນີ້ ມີຜູ້ຕາງໜ້າຈາກບັນດາກະຊວງ ແລະ ຂະແໜງການທີ່ເປັນຄູ່ຮ່ວມງານກັບອົງການ UNICEF.
ໃນວັນດຽວກັນນີ້, ທ່ານ ອົກຕາວຽນ ບີໂວ (Mr. Octavian BIVOL) ກໍ່ໄດ້ເຂົ້າຢ້ຽມຂໍ່ານັບອຳລາ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ. ໃນໂອກາດນີ້, ທ່ານ ລັດຖະມົນຕີ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງ ທ່ານ ອົກຕາວຽນ ບີໂວ ທີ່ມາປະຕິບັດໜ້າທີ່ຢູ່ ສປປ ລາວ ທີ່ໄດ້ຕັ້ງໜ້າປະກອບສ່ວນຊຸກຍູ້ເຮັດໃຫ້ການຮ່ວມມື ລະຫວ່າງ ສປປ ລາວ ແລະ ອົງການ UNICEF ນັບມື້ນັບຂະຫຍາຍຕົວຢ່າງຕໍ່ເນື່ອງ ແລະ ໄດ້ອວຍພອນໄຊໃຫ້ ທ່ານ ອົກຕາວຽນ ບີໂວ ຈົ່ງມີສຸຂະພາບແຂງແຮງ, ປະສົບຜົນສຳເລັດໃນໜ້າທີ່ຮັບຜິດຊອບອັນໃໝ່ຂອງທ່ານ. ທ່ານ ອົກຕາວຽນ ບີໂວ ກໍ່ໄດ້ສະແດງຄວາມຂອບໃຈມາຍັງລັດຖະບານລາວທີ່ໄດ້ໃຫ້ການຮ່ວມມືເປັນຢ່າງດີ ອັນໄດ້ເຮັດໃຫ້ການປະຕິບັດໜ້າທີ່ຂອງທ່ານປະສົບຜົນສຳເລັດຢ່າງຈົບງາມ.
ປັດຈຸບັນ, ອົງການ UNICEF ກຳລັງຈັດຕັ້ງປະຕິບັດແຜນງານການຮ່ວມມືການພັດທະນາຢູ່ ສປປ ລາວ ສຳລັບສົກປີ 2017-2021 ຊຶ່ງໄດ້ສຸມໃສ່ວຽກງານສຸຂະພາບແມ່ ແລະ ເດັກ ແລະ ໂພຊະນາການ, ວຽກງານສຶກສາແຜນງານນໍ້າ ແລະ ສຸຂະອະນາໄມ, ວຽກງານປົກປ້ອງເດັກ, ວຽກງານນະໂຍບາຍ, ວາງແຜນ, ຕິດຕາມ ແລະ ປະເມີນຜົນ, ວຽກງານໂຄສະນາ ແລະ ສື່ສານມວນຊົນ.