ໃນຕອນບ່າຍຂອງວັນທີ 9 ກໍລະກົດ 2020, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມທາງໄກລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງ-ຍີ່ປຸ່ນ ຄັ້ງທີ 13, ເຊິ່ງໄດ້ຈັດຂຶ້ນໂດຍການເປັນປະທານຮ່ວມຂອງ ທ່ານ Motegi Toshimitsu, ລັດຖະມົນຕີກະຊວງການຕ່າງປະເທດຍີ່ປຸ່ນ ແລະ ທ່ານ Pham Binh Minh, ຮອງນາຍົກລັດຖະ ມົນຕີລັດຖະມົນຕີກະຊວງການຕ່າງປະເທດ ສສ. ຫວຽດນາມ ແລະ ມີບັນດາລັດຖະມົນຕີຕ່າງປະເທດຈາກປະເທດແມ່ນໍ້າຂອງຄື: ກຳປູເຈຍ, ສປປ ລາວ, ມຽນມາ, ແລະ ໄທ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ທົບທວນຄືນຜົນການຮ່ວມມືໃນໄລຍະຜ່ານມາ ກໍ່ຄືການຈັດຕັ້ງປະຕິບັດຍຸດທະສາດໂຕກຽວ 2018, ເຊິ່ງເຫັນວ່າຂອບການຮ່ວມມືແມ່ນໍ້າຂອງ-ຍີ່ປຸ່ນ ໄດ້ມີບາດກ້າວຂະຫຍາຍຕົວ ແລະ ມີໝາກຜົນ, ແຕ່ພ້ອມດຽວກັນນັ້ນ, ການແຜ່ລະບາດຂອງພະຍາດໂຄວິດ-19 ກໍ່ໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ໄປທົ່ວໂລກເວົ້າລວມ, ເວົ້າສະເພາະກໍ່ຄື ບັນດາປະເທດສະມາຊິກແມ່ນໍ້າຂອງ-ຍີ່ປຸ່ນ. ກອງປະຊຸມຍັງໄດ້ສະແດງຄວາມຊົມເຊີຍ ແລະ ຂອບໃຈຕໍ່ ຍີ່ປຸ່ນ ທີ່ໄດ້ໃຫ້ການຊ່ວຍເຫຼືຶອທາງດ້ານເຕັກນິກ, ອຸປະກອນ ແລະ ວິຊາການ ແກ່ບັນດາປະເທດສະມາຊິກແມ່ນໍ້າຂອງ ເພື່ອຕໍ່ສູ້ຕ້ານກັບພະຍາດໂຄວິດ-19.
ນອກຈາກນີ້, ກອງປະຊຸມກໍ່ໄດ້ປຶກສາຫາລື ແລະ ວາງທິດທາງການຮ່ວມມືໃນຕໍ່ໜ້າ ໂດຍໄດ້ເນັ້ນໃສ່ການຟື້ນຟູເສດຖະກິດພາຍຫຼັງທີ່ມີການແຜ່ລະບາດຂອງພະຍາດໂຄວິດ-19, ເຊິ່ງ ຍີ່ປຸ່ນ ໄດ້ປະກາດໃຫ້ທຶນຊ່ວຍເຫຼືອລ້າມູນຄ່າ 1 ຕື້ ເຢັນ ເພື່ອຊ່ວຍເຂົ້າໃນໂຄງການຄວາມປອດໄພດ້ານສຸຂະພາບຂັ້ນພຶ້ນຖານຂອງມະນຸດ.
ກອງປະຊຸມທາງໄກລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 13 ໄດ້ຮັບຮອງເອົາເອກະສານສຳຄັນ ຈຳນວນ 1 ສະບັບ ຄື: ຖະແຫຼງການປະທານຮ່ວມກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 13 ວ່າດ້ວຍ ການຮ່ວມມືແມ່ນໍ້າຂອງ-ຍີ່ປຸ່ນ ເພື່ອບັນລຸການປະກັນສຸຂະພາບທຸກຖ້ວນໜ້າ ແລະ ເສີມສ້າງຄວາມສໍາພັນ ດ້ານເສດຖະກິດ (Co-chairs’ Statement of 13th Mekong-Japan Foreign Ministers’ Meeting on Mekong-Japan Cooperation for achieving Universal Health Coverage (UHC) and integral strengthening of Economic relations).