ກະຊວງການຕ່າງປະເທດ ໄດ້ຈັດເຜີຍແຜ່ເຊື່ອມຊຶມມະຕິກອງປະຊຸມຄົບຄະນະ ຄັ້ງທີ 10 ຂອງຄະນະບໍລິຫານງານສູນກາງພັກ ສະໄໝທີ X ຂຶ້ນໃນຕອນເຊົ້າຂອງວັນທີ 17 ກໍລະກົດ 2020, ໃຫ້ກຽດຂຶ້ນເຜີຍແຜ່ໂດຍ ສະຫາຍ ສະເຫລີມໄຊ ກົມມະສິດ, ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງການຕ່າງປະເທດ, ເຊິ່ງມີຄະນະປະຈຳພັກກະຊວງ, ຮອງລັດຖະມົນຕີ, ພະນັກງານຫລັກແຫລ່ງ, ສະມາຊິກພັກ, ພະນັກງານ-ລັດຖະກອນທົ່ວກະຊວງ ເຂົ້າຮ່ວມຢ່າງພ້ອມພຽງ.
ໃນໂອກາດດັ່ງກ່າວ, ສະຫາຍ ສະເຫລີມໄຊ ກົມມະສິດ, ໄດ້ຍົກໃຫ້ເຫັນກ່ຽວກັບການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7, 8, 9 ສະໄໝທີ X, ເຊິ່ງຕິດພັນກັບຄວາມຄືບໜ້າການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ເງິນຕາປະຈໍາໄຕມາດ 1 ປີ 2020 ແລະ ທິດທາງໃນຕໍ່ໜ້າ; ການກະກຽມເນື້ອໃນກອງປະຊຸມໃຫຍ່ ຄັ້ງທີ XI ຂອງພັກ ແລະ ທິດປັບປຸງກົງຈັກລັດຖະບານ ເພື່ອໃຫ້ພະນັກງານຫລັກແຫລ່ງ, ສະມາຊິກພັກ, ພະນັກງານ-ລັດຖະກອນພາຍໃນກະຊວງ ໄດ້ຮັບຮູ້ກຳແໜ້ນ, ເຊື່ອມຊຶມ ແລະ ເປັນເອກະພາບສູງຕໍ່ບັນດາເນື້ອໃນທີ່ສຳຄັນຂອງມະຕິກອງປະຊຸມຄົບຄະນະຄັ້ງ ທີ 10 ຂອງຄະນະບໍລິຫານງານສູນກາງພັກ ສະໄໝທີ X ແລະ ພ້ອມກັນຕັ້ງໜ້າເອົາມະຕິດັ່ງກ່າວເປັນທິດທາງ ແລະ ແຜນຈັດຕັ້ງປະຕິບັດງານລະອຽດຮອບດ້ານ ເຂົ້າສູ່ລວງເລິກໃນຂະແໜງການຕົນຢ່າງແຂງແຮງ ແລະ ຕໍ່ເນື່ອງ.
ໃນໂອກາດດຽວກັນນີ້, ຍັງໄດ້ມີພີທີມອບ-ຮັບໃບຢັ້ງຢືນໜ່ວຍພັກປອດໃສ່, ເຂັ້ມແຂງ, ໜັກແໜ້ນ ຈຳນວນ 12 ໜ່ວຍພັກ ທີ່ຢູ່ພາຍໃນປະເທດ, ເຊິ່ງໃຫ້ກຽດຂຶ້ນມອບໂດຍ ສະຫາຍ ສະເຫລີມໄຊ ກົມມະສິດ ແລະ ໂອ້ລົມຕໍ່ບັນດາໜ່ວຍພັກ, ໂດຍໄດ້ສະເເດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານຂອງແຕ່ລະໜ່ວຍພັກທີ່ຍາດມາໄດ້, ເຊິ່ງສະແດງໃຫ້ເຫັນເຖິງຄວາມພະຍາຍາມ ແລະ ການເອົາໃຈໃສ່ຈັດຕັ້ງນຳພາຜັນຂະຫຍາຍບັນດາມະຕິ, ຄຳສັ່ງ, ຄຳແນະນຳຂອງຂັ້ນເທິງວາງອອກ ແລະ ເຂັ້ມງວດປະຕິບັດກົດລະບຽບພັກ, ກົດໝາຍ, ລະບຽບຄຳສັ່ງຫຼັກການຕ່າງໆ. ເວົ້າສະເພາະກໍແມ່ນຄວາມຮັບຮູ້ເຂົ້າໃຈ, ກຳແໜ້ນ ແລະ ສາມາດປະຕິບັດໄດ້ບັນດາມາດຖານ, ເງື່ອນໄຂ ແລະ ຂັ້ນຕອນຕ່າງໆໃນການສ້າງພັກໃຫ້ປອດໃສ, ເຂັ້ມແຂງ, ໜັກແໜັນ. ພ້ອມນີ້, ສະຫາຍ ຍັງໄດ້ເນັ້ນໃຫ້ບັນດາໜ່ວຍພັກ ຈົ່ງສືບຕໍ່ເອົາໃຈໃສ່ເພີ່ມທະວີເປັນເຈົ້າການນຳພາໝູ່ຄະນະຮັກສາມູນເຊື້ອນາມມະຍົດຂອງໜ່ວຍພັກໄວ້ຢ່າງໝັ້ນຄົງຕໍ່ເນື່ອງ.
ສຳລັບໜ່ວຍພັກທີ່ຍັງບໍ່ທັນໄດ້ຮັບ ກໍ່ໃຫ້ສືບຕໍ່ສູ້ຊົນ ແລະ ແລກປ່ຽນຖອດຖອນບົດຮຽນນຳໜ່ວຍພັກທີ່ໄດ້ຮັບນາມມະຍົດມາແລ້ວ ເພື່ອເຮັດໃຫ້ໜ່ວຍພັກຕົນໄດ້ຮັບເປັນໜ່ວຍພັກປອດໃສ່, ເຂັ້ມແຂງ, ໜັກແໜ້ນ ໃນສົກປີຕໍ່ໜ້າ.