ໃນຕອນ​ເຊົ້າຂອງ​ວັນ​ທີ 21 ກໍລະກົດ 2020, ທີ່ ກະ​ຊວງ​ການ​ຕ່າງ​ປະ​ເທດ, ທ່ານ ​ສະ​ເຫຼີມ​ໄຊ ກົມ​ມະ​ສິດ, ​ລັດຖະ​ມົນຕີ​ກະຊວງ​ການ​ຕ່າງ​ປະ​ເທດ ໄດ້​ໃຫ້​ກຽດ​ຕ້ອນ​ຮັບ​ການ​ເຂົ້າ​ຢ້ຽມ​​ຂ່ຳ​ນັບອຳ​ລາຂອງ ທ່ານ ລີໂອ ຟາເບີ (Leo FABER), ເອກ​ອັກ​ຄະ​ລັດ​ຖະ​ທູດ​ວິ​ສາ​ມັນຜູ້​ມີ​ອຳ​ນາດ​ເຕັມ ແຫ່ງ ສະຫະພາບອີຣົບ (ອີຢູ) ປະ​ຈຳ ສປປ ລາວ ໃນໂອ​ກາດ​​​ສຳ​ເລັດ​ການ​ປະ​ຕິ​ບັດ​ໜ້າ​ທີ່​ການ​ທູດ​ ຢູ່ ສ​ປ​ປ ລາວ.

ໃນ​ໂອ​ກາດ​ດັ່ງ​ກ່າວ, ທ່ານ​ລັດ​ຖະ​ມົນ​ຕີໄດ້​ສະ​ແດງ​ຄວາມ​ຍິນ​ດີ​ຕ້ອນ​ຮັບ, ຊົມ​ເຊີຍແລະຕີ​ລາ​ຄາ​ສູງຕໍ່ການ​ພົວພັນ​ຮ່ວມ​ມືສອງຝ່າຍລະ​ຫວ່າງ ລາວ-ອີຢູ ຕະຫຼອດໄລ​ຍະ​​ຜ່ານ​ມາ ຈົນເຖິງປະ​ຈຸ​ບັນປີ 2020 ເຊິ່ງເປັນປີຄົບຮອບວັນສ້າງຕັ້ງສາຍພົວພັນ ລາວ-ອີຢູ ຄົບຮອບ 45 ປີ. ພ້ອມ​ກັນ​ນັ້ນ, ກໍ່​ສະ​ແດ​ງ​ຄວາມ​ຂອບ​ໃຈຢ່າງ​ຈິງ​ໃຈ ຕໍ່​ການ​ເອົາ​ໃຈ​ໃສ່​ປະກອບ​ສ່ວນ​ຢ່າງ​ຫ້າວ​ຫັນ ຂອງ ​ທ່ານ​ທູດ ໃນ​ການ​ປະກອບສ່ວນຊຸກຍູ້ ແລະ ສົ່ງເສີມ​ສາຍ​ພົວ​ພັນ​ມິດຕ​ະ​ພາບແລະການ​ຮ່ວມ​ມື​ ລາວ-ອີຢູ ຂະຫຍາຍຕົວແລະແຕກດອກ​ອອກ​ຜົນ​ຍິ່ງ​ຂຶ້ນ​​ຕະຫຼອດ​ໄລ​ຍະ​ເວ​ລາທີ່ ທ່ານ​ທູດອີຢູ ຜູ້ທຳອິດປະ​ຈຳ​ ສປປ ລາວ ທີ່ ນະຄອນຫຼວງວຽງຈັນ, ໂດຍສະເພາະແມ່ນ ​ໄດ້ປະ​ກອບ​ສ່ວນ​ຊຸກ​ຍູ້ໃຫ້ ອີຢູ ​​ສືບຕໍ່​ການຊ່ວຍເຫຼືອທາງການເພື່ອການພັດທະນາ (ODA) ແກ່ ສປປ ລາວ ພາຍໃຕ້ແຜນງານJoint Programming ສຳລັບສົກປີ 2016-2020 ຊຶ່ງມີມູນຄ່າ 500 ລ້ານເອີໂຣ. ໂຄງການຊ່ວຍເຫຼືອດັ່ງກ່າວ ແມ່ນເລັ່ງໃສ່ຂະແໜງການບູລິມະສິດເຊັ່ນ: ການສຶກສາຂັ້ນພື້ນຖານ, ໂພຊະນາການ, ການຄໍ້າປະກັນດ້ານສະບຽງອາຫານ, ການປົກຄອງທີ່ດີ, ສິດທິມະນຸດ ແລະ ສ້າງລັດທີ່​ປົກ​ຄອງ​ດ້ວຍກົດໝາຍ,​ວຽກງານເກັບກູ້ລະເບີດບໍ່ທັນແຕກ (UXO), ການພັດທະນາ ພາກເອກະຊົນ ແລະ ວຽກຂອງ​ອົງ​ການ CSO. ຄຽງຄູ່ກັນນັ້​ນ, ​ກໍ່​ສະ​ແດງຄວາມ​ຂອບ​ໃຈ ອີ​ຢູ ທີ່​ໃຫ້ການຊ່ວຍເຫຼືອໃນຂອບຫຼາຍຝ່າຍ ໂດຍຜ່ານ​ອົງ​ການ​ຈັດ​ຕັ້ງ​ສາ​ກົນຕ່າງໆ, ຊຶ່ງປະ​ຈຸ​ບັນນີ້ ອີ​ຢູ ກຳ​ລັງ​ພິ​ຈາ​ລະ​ນາຈະ​ໃຫ້ການຊ່ວຍເຫຼືອແກ່ ສ​ປ​ປ ລາວ ໃນການແກ້​ໄຂ​ສະພາບເສດ​ຖະ​ກິດ​-ສັງ​ຄົມ ພາຍ​ຫຼັງ​ທີ່​ໄດ້​ຮັບ​ຜົນ​ກະ​ທົບ​ຈາກ​ການແຜ່​ລະ​ບາດຂອງພະຍາດ COVID-19.

ໃນ​ຕອນ​ທ່ຽງ​ຂອງວັນ​ດຽວກັນ​, ທ່ານ​​ລັດ​ຖະ​ມົນ​ຕີກໍ່ໄດ້​ໃຫ້​ກຽດ​ເປັນ​ເຈົ້າ​ພາບ​ຈັດ​ງານ​ລ້ຽງ​ອຳລາເພື່ອ​ເປັນ​ກຽດ​ໃຫ້​ແກ່​ທ່ານ​ທູດ ກ່ອນຈະເດີນ​ທາງ​ກັບ​ຄືນ​ປະ​ເທດ​ຢ່າງຖາວອນ.

      ໃນ​ໂອ​ກາດ​ດຽວ​ກັນ​ນີ້, ທ່ານລີໂອ ຟາເບີກໍ່​ໄດ້​ສະ​ແດງ​ຄວາມ​ຂອບ​ໃຈ​ຕໍ່ທ່ານ​ລັດ​ຖະ​ມົນ​ຕີທີ່ໄດ້​ສະຫຼະເວ​ລາ​ໃຫ້​ການ​ຕ້ອນ​ຮັບຢ່າງ​ອົບ​ອຸ່ນ​, ທັງເປັນ​ເຈົ້າ​ພາບ​ຈັດ​ງານ​ລ້ຽງ​ອຳ​ລາໃນຄັ້ງນີ້, ພ້ອມທັງ​ໄດ້​​ສະ​ແດງ​ຄວາມ​ຂອບ​ໃຈ​ຢ່າງ​ສູງ       ຕໍ່ລັດ​ຖະ​ບານ ສ​ປ​ປ ​ລາວ ທີ່​ໄດ້​ໃຫ້​ການ​ຮ່ວມ​ມື ແລະ ສະ​ໜັບ​ສະ​ໜູນ​ຊ່ວຍເຫຼືອກໍ່ຄືອ​ຳ​ນວຍ​ຄວາມ​ສະ​ດວກທຸກປະການ ເຮັດໃຫ້ການປະ​ຕິ​ບັດ​ໜ້າ​ທີ່​ການ​ທູດຂອງຕົນຢູ່ສ​ປ​ປລາວປະ​ສົບ​ຜົນ​ສຳ​ເລັດເປັນ​ຢ່າງ​ດີ ແລະ​ ຈະ​ສືບ​ຕໍ່ປະ​ກອບ​ສ່ວນຊ່ວຍ​ຊຸກ​ຍູ້​ສາຍ​ພົວ​ພັນ​ ແລະ ການຮ່ວມ​ມື ລາວ-ອີ ຢູໃຫ້​ເຂັ້ມແຂງ ແລະ ຂະ​ຫຍາຍ​ຕົວ​ຍິ່ງ​ໆຂຶ້ນໃນ​ຕໍ່​ໜ້າ.