ກອງປະຊຸມລັດຖະມົນຕີຕ່າງປະເທດ ອາ​ຊຽນ-ສະຫະລັດ

ກອງປະຊຸມລັດຖະມົນຕີຕ່າງປະເທດ ອາຊຽນ-ການາດາ

       ໃນຕອນເຊົ້າຂອງ ວັນທີ 10 ກັນຍາ 2020, ທ່ານ ສະ​ເຫຼີ​ມ​ໄຊ ກົມ​ມະ​ສິດ, ລັດ​ຖະ​ມົນ​ຕີຕ່າງ​ປະ​ເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນ ເຂົ້າ​ຮ່ວມກອງ​ປະ​ຊຸມລະດັບລັດ​ຖະ​ມົນ​ຕີ​​ຕ່າງ​ປະ​ເທດອາຊຽນ ກັບຄູ່ເຈລະຈາອາຊຽນ ເປັນຕົ້ນ: ເປັນປະທານຮ່ວມ ກອງປະຊຸມລັດຖະມົນຕີຕ່າງປະເທດ ອາ​ຊຽນ-ສະຫະລັດ ແລະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ອາ​ຊຽນ-ການາດາ.

ກອງປະຊຸມຕີລາຄາສູງ ຕໍ່ຜົນການຈັດຕັ້ງປະຕິບັດການຮ່ວມມື ອາ​ຊຽນ-ສະຫະລັດ ໃນໄລຍະ 1 ປີ ທີ່ຜ່ານມາ ໂດຍສະເພາະ ການຜັນຂະຫຍາຍຜົນຂອງກອງປະຊຸມສຸດຍອດ ອາຊຽນ-ສະຫະລັດ ໃນເດືອນພະຈິກ 2019 ຜ່ານມາ ຢູ່ ໄທ ແລະ ກອງປະຊຸມລັດຖະມົນຕີຕ່າງປະເທດ ອາຊຽນ-ສະຫະລັດ ກ່ຽວກັບ ການແຜ່ລະບາດຂອງພະຍາດໂຄວິດ-19 ໃນເດືອນເມສາ 2020 ຜ່ານມາ; ແລະ ການຈັດຕັ້ງປະຕິບັດ ແຜນປະຕິບັດງານ ການຮ່ວມມື ອາຊຽນ-ສະຫະລັດ ໄລຍະ 2016-2020, ເຊິ່ງກວມເອົາ 3 ເສົາຄໍ້າການສ້າງປະຊາຄົມອາຊຽນ (ການເມືຶອງ-ຄວາມໝັ້ນຄົງ, ເສດຖະກິດ ແລະ ວັດທະນະທໍາ-ສັງຄົມ). ສໍາລັບທິດທາງໃນຕໍ່ໜ້າ, ສອງຝ່າຍ ອາຊຽນ ແລະ ສະຫະລັດ ຈະສືບຕໍ່ຮ່ວມມືກັນ ໃນບາງຂະແໜງການບູລິມະສິດ ເປັນຕົ້ນ: ຂະແໜງສາທາລະນະສຸກ ໂດຍສະເພາະ ການແລກປ່ຽນຂໍ້ມູນຂ່າວສານ ແລະ ບົດຮຽນທີ່ດີ ໃນການປ້ອງກັນ, ຮັບມື ແລະ ແກ້ໄຂ ການແຜ່ລະບາດພະຍາດໂຄວິດ-19 ລວມທັງ ການຮ່ວມມືກັນໃນການຄົ້ນຄວ້າ-ພັດທະນາ ແລະ ຜຼິດຢາປົວພະຍາດ ກໍ່ຄື ຢາວັກແຊັງຕ້ານໂຄວິດ-19 ແລະ ການຮັບປະກັນ ໃນການເຂົ້າເຖິງ ແລະ ສາມາດໄດ້ຮັບຢາປົວພະຍາດ ແລະ ຢາວັກແຊັງດັ່ງກ່າວ ໃນເວລາທີ່ມີຢາດັັ່ງກ່າວແລ້ວ; ການຟື້ນຟູເສດຖະກິດ ຫຼັງໂຄວິດ-19; ການຫັນໄປສູ່ເສດຖະກິດດິຈີຕອນ; ການເຊື່ອມຈອດອາຊຽນ; ການຮັດແຄບຄວາມແຕກໂຕນ ດ້ານການພັດທະນາພາຍໃນອາຊຽນ ດ້ວຍການຈັດຕັ້ງປະຕິບັດ ແຜນປະຕິບັດງານໄອເອໄອ ສະບັບທີ 3 (2016-2020) ແລະ ສະບັບທີ 4 (2021-2025); ການພັດທະນາແບບຍືນຍົງ ລວມທັງ ແຜນງານໂຄງການ ພາຍໃຕ້ເຄືອຂ່າຍຕົວເມືອງອັດສະລິຍະອາຊຽນ. ນອກນີ້, ກອງປະຊຸມ ຍັງໄດ້ແລກປ່ຽນຄໍາຄິດຄໍາເຫັນນໍາກັນຕໍ່ບາງບັນຫາເດັ່ນ ຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເຊັ່ນ: ບັນຫາແຫຼມເກົາຫຼີ, ທະເລຈີນໃຕ້, ບັນຫາຄວາມຫຍຸ້ງຍາກ ຢູ່ ລັດຣະຄາຍ (ມຽນມາ), ການຈັດຕັ້ງປະຕິບັດເອກະສານແນວຄວາມຄິດອິນໂດ-ປາຊີຟິກ ຂອງອາຊຽນ ແລະ ອື່ນໆ. ນອກນີ້, ລັດຖະມົນຕີຕ່າງປະເທດອາ​ຊຽນ-ສະຫະລັດ ຍັງໄດ້ກະກຽມ ດ້ານເນື້ອໃນ ແລະ ພະລາທິການ ໃຫ້ແກ່ກອງປະຊຸມສຸດຍອດຜູ້ນໍາອາ​ຊຽນ-ສະຫະລັດ ທີ່ຈະມາເຖິງ ໃນເດືອນພະຈິກ 2020. ພິເສດ, ກອງປະຊຸມໄດ້ຮັບຮອງເອົາແຜນປະຕິບັດງານ ອາຊຽນ-ສະຫະລັດ ສະບັບໃໝ່ ສຳລັບປີ 2021-2025 ແລະ ສະແດງຄວາມຊົມເຊີຍ ການລົງນາມສັນຍາຮ່ວມມື ລະຫວ່າງ ອາຊຽນ ແລະ ອົງການຊ່ວຍເຫຼືອສາກົນອາເມລິກາ (USAID).

ໃນຕອນເຊົ້າຂອງວັນດຽວກັນ,ທ່ານລັດຖະມົນຕີສະເຫຼີມໄຊກົມມະສິດໄດ້ສືບຕໍ່ນໍາພາຄະນະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ອາຊຽນ-ການາດາ, ເຊິ່ງກອງປະຊຸມ ໄດ້ສະແດງຄວາມພໍໃຈຕໍ່ຄວາມຄືບໜ້າ ໃນການຈັດຕັ້ງປະຕິບັດ ການຮ່ວມມື ອາຊຽນ-ການາດາ ໃນໄລຍະ 1 ປີຜ່ານມາ ໂດຍກວມເອົາ 3 ເສົາຄໍ້າ ຂອງການສ້າງປະຊາຄົມອາຊຽນ (ການເມືຶອງ-ຄວາມໝັ້ນຄົງ, ເສດຖະກິດ ແລະ ວັດທະນະທໍາ-ສັງຄົມ) ລວມທັງ ການປ້ອງກັນ, ຮັບມື ແລະ ແກ້ໄຂ ການລະບາດຂອງພະຍາດໂຄວິດ-19 ແລະ ການຟື້ນຟູເສດຖະກິດ ຫຼັງໂຄວິດ-19. ສໍາລັບທິດທາງໃນຕໍ່ໜ້າ, ກອງປະຊຸມເຫັນດີສືບຕໍ່ຮ່ວມມືກັນ ໃນບາງຂົງເຂດບູລິມະສິດ ເຊັ່ນ: ການຕ້ານການກໍ່ການຮ້າຍ ແລະ ອາຊະຍາກໍາຂ້າມຊາດ, ການພັດທະນາແບບຍືນຍົງ, ການສຶກສາ ແລະ ການໄປມາຫາສູ່ລະຫວ່າງປະຊາຊົນ ກັບ ປະຊາຊົນ ລວມທັງ ການທ່ອງທ່ຽວ, ການຄ້າ ແລະ ການລົງທຶນ. ກອງປະຊຸມຄັ້ງນີ້, ຍັງໄດ້ຮັບຮອງເອົາ ແຜນປະຕິບັດງານ ການຮ່ວມມື ອາຊຽນ-ການາດາ ສະບັບໃໝ່ ໄລຍະ 2021-2025. ກອງປະຊຸມລັດຖະມົນຕີຕ່າງ ປະເທດອາ​ຊຽນ-ການາດາ ຄັ້ງຕໍ່ໄປ ຈະຈັດຂຶ້ນຢູ່ ບຣູໄນ (ປະທານອາຊຽນຜູ້ຕໍ່ໄປ) ໃນປີ 2021.

ໃນຕອນບ່າຍຂອງວັນດຽວກັນ, ທ່ານ ລັດຖະມົນຕີ ໄດ້ສືບຕໍ່ນຳພາຄະນະເຂົ້າຮ່ວມ ກອງປະຊຸມລັດຖະມົນຕີຕ່າງປະເທດ ອາຊຽນ-ອົດສະຕຣາລີ ແລະ ອາຊຽນ-ນິວຊີແລນ, ເຊິ່ງ ກອງປະຊຸມ ໄດ້ສະແດງຄວາມພໍໃຈຕໍ່ຜົນສໍາເລັດການຈັດຕັ້ງປະຕິບັດ ການຮ່ວມມື ອາຊຽນ-ອົດສະຕຣາລີ ແລະ ອາຊຽນ-ນິວຊີແລນ ໃນໄລຍະຜ່ານມາ ໂດຍສະເພາະການຜັນຂະຫຍາຍ ແຜນປະຕິບັດງານ ອາຊຽນ-ອົດສະຕຣາລີ ແລະ ອາຊຽນ-ນິວຊີແລນ ໃນໄລຍະ 1 ປີ ຜ່ານມາ.      ສໍາລັບທິດທາງໃນຕໍ່ໜ້າ, ການຮ່ວມມື ອາຊຽນ-ອົດສະຕຣາລີ ແລະ ອາຊຽນ-ນິວຊີແລນ ຈະສຸມໃສ່ບາງຂົງເຂດບູລິມະສິດ ເຊັ່ນ: ສາທາລະນະສຸກ ລວມທັງ ການປ້ອງກັນ, ຮັບມື ແລະ ແກ້ໄຂ ໂຄວິດ-19; ການສຶກສາ ໂດຍສະເພາະ ການສະໜອງທຶນສຶກສາ ໄລຍະສັ້ນ, ໄລຍະຍາວ ແລະ ການຝຶກອົບຮົມພາສາອັງກິດ; ການພັດທະນາແບບຍືນຍົງ; ການຫັນເປັນເສດຖະກິດດິຈີຕອນ; ການເຊື່ອມຈອດອາຊຽນ ໂດຍສະເພາະ ການຈັດຕັ້ງປະຕິບັດ ແຜນແມ່ບົດການເຊື່ອຈອດອາຊຽນ ຮອດປີ 2025 (MPAC 2025);ການຈັດຕັ້ງປະຕິບັດ ແຜນໄອເອໄອ ສະບັບທີ 3 (2016-2020) ແລະ ສະບັບທີ 4 (2021-2025); ການພັດທະນາແບບຍືນຍົງ ແລະ ການພັດທະນາເຄືອຂ່າຍຕົວເມືອງອັດສະລິຍະອາຊຽນ. ພ້ອມດຽວກັນນີ້, ກອງປະຊຸມຍັງໄດ້ ປຶກສາຫາລື ແລະ ແລກປ່ຽນຄໍາຄິດຄໍາເຫັນຮ່ວມກັນຕໍ່ບາງບັນຫາເດັ່ນ ຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເຊັ່ນ: ບັນຫາແຫຼມເກົາຫຼີ, ທະເລຈີນໃຕ້, ການຈັດຕັ້ງປະຕິບັດເອກະສານແນວຄວາມຄິດອິນໂດ-ປາຊີຟິກ ຂອງອາຊຽນ ແລະ ອື່ນໆ. ສຸດທ້າຍ, ກອງປະຊຸມໄດ້ພ້ອມກັນກະກຽມ ດ້ານເນື້ອໃນ ແລະ ພະລາທິການ ໃຫ້ແກ່ກອງປະຊຸມສຸດຍອດຜູ້ນໍາ ອາຊຽນ-ອົດສະຕຣາລີ ແລະ ອາຊຽນ-ນິວຊີແລນ ທີ່ຈະມີຂຶ້ນໃນ ເດືອນພະຈິກ 2020. ກອງປະຊຸມລັດຖະມົນຕີຕ່າງປະເທດ ອາຊຽນ-ອົດສະຕຣາລີ ແລະ ອາຊຽນ-ນິວຊີແລນ ຄັ້ງຕໍ່ໄປ ຈະຈັດຂຶ້ນຢູ່ ບຣູໄນ ໃນປີ 2021 (ປະທານອາຊຽນຜູ້ຕໍ່ໄປ).

ໃນຕອນຄໍ່າຂອງວັນດຽວກັນ, ທ່ານລັດຖະມົນຕີ ສະເຫຼີມໄຊ ໄດ້ສືບຕໍ່ນຳພາຄະນະເຂົ້າຮ່ວມກອງປະຊຸມພົບປະກັບຄະນະກຳມາທິການລະຫວ່າງລັດຖະບານອາຊຽນວ່າດ້ວຍສິດທິມະນຸດ ຫຼື ໄອຈາ (AICHR) ແບບທາງໄກ, ເຊິ່ງໄດ້ສະແດງຄວາມຊົມເຊີຍ ຕໍ່ການຈັດຕັ້ງປະຕິບັດວຽກງານໄອຈາ ໃນ 1 ປີ ຜ່ານມາ ແລະ ເຫັນດີຮັບຮອງເອົາບົດລາຍງານການເຄື່ອນໄຫວວຽກງານ ສົກປີ 2020. ສໍາລັບທິດທາງແຜນການໃນຕໍ່ໜ້າ, ໄດ້ຮັບຮອງເອົາ 2 ເອກະສານ ຄື: ແຜນປະຕິບັດງານໄອຈາ ສະບັບໃໝ່ ໄລຍະ 5 ປີ (2021-2025) ແລະແຜນວຽກ ສົກປີ 2021. ຫຼັງຈາກນັ້ນ, ກໍໄດ້ສືບຕໍ່ເຂົ້າຮ່ວມກອງປະຊຸມປຶກສາຫາລືລະດັບລັດຖະມົນຕີອາຊຽນ ວ່າດ້ວຍ ການເສີມຂະຫຍາຍບົດບາດຂອງແມ່ຍິງ ເພື່ອສັນຕິພາບ ແລະ ຄວາມໝັ້ນຄົງ ແບບທາງໄກ, ເຊິ່ງກອງປະຊຸມໄດ້ຮັບຊາບ ແລະ ຍິນດີຈະສືບຕໍ່ສົ່ງເສີມບົດບາດຂອງແມ່ຍິງ ເຂົ້າໃນວຽກພັດທະນາເສດຖະກິດ-ສັງຄົມ ຂອງແຕ່ລະປະເທດ ລວມທັງ ການປະກອບສ່ວນອັນສຳຄັນເຂົ້າໃນວຽກສັນຕິພາບ ແລະ ຄວາມໝັ້ນຄົງ.