ກອງປະຊຸມສຸດຍອດ ແອັກແມັກ (ACMECS) ຄັ້ງທີ 9

ກອງປະຊຸມສຸດຍອດ CLMV ຄັ້ງທີ 10

​

ກອງປະຊຸມສຸດຍອດ ເຂດສາມຫລ່ຽມພັດທະນາ CLV ຄັ້ງທີ 11

ໃນຕອນເຊົ້າຂອງ ວັນທີ 9 ທັນວາ 2020, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດ ຂອບຍຸດທະສາດການຮ່ວມມືດ້ານເສດຖະກິດ ແມ່ນໍ້າອິຣະວະດີ-ແມ່ນໍ້າເຈົ້າພະຍາ-ແມ່ນໍ້າຂອງ (ACMECS) ຄັ້ງທີ 9 ພາຍໃຕ້ຄຳຂວັນ “ຄູ່ຮ່ວມມື ເພື່ອການເຊື່ອມຈອດ ແລະ ຄວາມແຂງແກ່ນ”ຜ່ານຮູບແບບວິດີໂອທາງໄກ ໂດຍການເປັນປະທານ ຂອງ ສົມເດັດ ເຕໂຊ ຮຸນ ເຊັນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ, ຊຶ່ງໄດ້ມີປະມຸກລັດ ແລະ ຫົວໜ້າລັດຖະບານ ພ້ອມດ້ວຍຄະນະຜູ້ແທນຈາກປະເທດສະມາຊິກ (ກໍາປູເຈຍ, ສປປ ລາວ, ມຽນມາ, ໄທ ແລະ ຫວຽດນາມ) ແລະ ທ່ານ ເລຂາທິການໃຫຍ່ອາຊຽນ ເຂົ້າຮ່ວມ ຢ່າງພ້ອມພຽງ.

ກອງປະຊຸມສຸດຍອດໄດ້ທົບທວນຄວາມ​ຄືບ​ຫນ້າ​ການ​ຈັດ​ຕັ້ງ​ຜັນ​ຂະ​ຫຍາຍໝາກຜົນ​ຂອງກອງປະຊຸມ   ສຸດຍອດ ACMECSຄັ້ງທີ 8​ຜ່ານ​ມາກໍ່​ຄືການຈັດຕັ້ງປະຕິບັດຖະແຫຼງການບາງກອກ ແລະ ແຜນແມ່ບົດ ACMECS (2019-2023)ໂດຍ​ສະ​ເພາະ​ການ​ກະ​ກຽມ​ສ້າງຕັ້ງ​ກອງ​ທຶນ​ພັດ​ທະ​ນາ​ແອັກ​ແມັກ, ການ​ກະ​ກຽມ​ສ້າງ​ຕັ້ງ​ຄະ​ນະ​ກຳ​ມະ​ການ​ປະ​ສານ​ງານ​ໃນ 3 ເສົາ​ຄ້ຳ​ພາຍ​ໃຕ້​ແຜນ​ແມ່​ບົດ​ແອັກ​ແມັກ ແລະ ການ​ລະ​ດົມ​ທຶນ​ຈາກ​ບັນ​ດາ​ຄູ່​ຮ່ວມ​ພັດ​ທະ​ນາ​ຊຸດ​ທີ່​ຫນຶ່ງ​ຊຶ່ງ​ລວມ​ມີຍີ່ປຸ່ນ, ສ. ເກົາຫຼີ, ສປ.ຈີນ, ອາເມລິກາ, ອິນເດຍ ແລະ ອົດສະຕາລີ ​ເຂົ້າ​ໃນ​ການ​ຮ່ວມ​ມື​ແອັກ​ແມັກ​ທີ່ກຳ​ລັງ​ສຸມ​ທຸກ​ກຳ​ລັງ​ແຮງ​ເພື່ອ​ການ​ພັດ​ທະ​ນາເສດຖະກິດ-ສັງ​ຄົມ, ການເຊື່ອມຈອດທາງດ້ານຄົມມະນາຄົມຂົນສົ່ງແລະການພັດທະນາສີ​ຂຽວ ແລະ ຍືນຍົງ. ກອງ​ປະ​ຊຸມ​ຍັງ​ໄດ້ປຶກ​ສາ​ຫາ​ລືກ່ຽວ​ກັບ​ການ​ຮ່ວມ​ມື​ເພື່ອຟື້ນຟູເສດຖະກິດ-ສັງຄົມ​ຂອງ​ພາກ​ພື້ນ​ໃນ​ໄລ​ຍະ​ແຜ່​ລະ​ບາດ ແລະ ພາຍຫຼັງການແຜ່ລະບາດຂອງພະຍາດໂຄວິດ-19 ໂດຍ​ສະ​ເພາະ​ໃນ​ຂະ​ແຫນ່ງ​ການ​ການ​ຄ້າ,ການ​ທ່ອງ​ທ່ຽວ ແລະ ການ​ໄປ​ມາ​ຫາ​ສູ່​ກັນ ແລະ ອື່ນໆ.    ພ້ອມດຽວກັນນີ້, ກອງປະຊຸມ ໄດ້ຮັບຮອງເອົາຖະແຫລງການພະນົມເປັນ ຂອງ ກອງປະຊຸມສຸດຍອດ ACMECS ຄັ້ງທີ 9, ພາລະບົດບາດຂອງກອງທຶນພັດທະນາ ACMECS, ກົນໄກການປະຕິບັດວຽກງານຂອງ ຄະນະກຳມະການປະສານງານ ACMECS ແລະ ບັນດາໂຄງການບູລິມະສິດ ເພື່ອເປັນເອກະສານພື້ນຖານ ໃນການຈັດຕັ້ງຜັນຂະຫຍາຍແຜນແມ່ບົດ ACMECS ໃຫ້ເປັນຮູບປະທໍາຂຶ້ນເທື່ອລະກ້າວ. ໃນຕອນທ້າຍຂອງກອງປະຊຸມ, ບັນດາຜູ້ນຳ ໄດ້ສະແດງຄວາມຊົມເຊີຍ ຕໍ່ຜົນສຳເລັດຢ່າງຈົບງາມໃນການປະຕິບັດໜ້າທີ່ການເປັນປະທານ ACMECS ຂອງ ຣາຊະອານາຈັກ ກໍາປູເຈຍ (2018-2020) ແລະ ໄດ້ມອບຕໍ່ໜ້າທີ່ດັ່ງກ່າວ ໃຫ້ແກ່ ສປປ ລາວໃນໄລຍະ 2 ປີ ຂ້າງໜ້າ, ຊຶ່ງ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ສະແດງຄວາມຂອບໃຈ ແລະ ໃຫ້ຄວາມໝາຍໝັ້ນ ທີ່ຈະສືບຕໍ່ຮ່ວມມືຢ່າງໃກ້ຊິດ ກັບບັນດາປະເທດສະມາຊິກ ແລະ ບັນດາຄູ່ຮ່ວມພັດທະນາ ເພື່ອຈັດຕັ້ງຜັນຂະຫຍາຍໝາກຜົນຂອງກອງປະຊຸມສຸດຍອດ ACMECS ຄັ້ງທີ 9 ນີ້ ໃຫ້ປະກົດຜົນເປັນຈິງ​.

ໃນວັນດຽວກັນ, ພາຍຫຼັງສໍາເລັດການເຂົ້າຮ່ວມກອງປະຊຸມສຸດຍອດ ACMECS ຄັ້ງທີ 9, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ເປັນປະທານກອງປະຊຸມສຸດຍອດ ຂອບການຮ່ວມມື    ກໍາປູເຈຍ-ມຽນມາ-ລາວ-ຫວຽດນາມ (CLMV) ຄັ້ງທີ 10 ພາຍໃຕ້ຄໍາຂວັນ “ຍົກສູງປະສິດທິພາບການ     ເຊື່ອມຈອດ ເພື່ອການເຊື່ອມໂຍງພາກພື້ນ”, ຊຶ່ງໄດ້ມີປະມຸກລັດ ແລະ ຫົວໜ້າລັດຖະບານ ພ້ອມດ້ວຍຄະນະ    ຜູ້ແທນຈາກປະເທດສະມາຊິກ (ກໍາປູເຈຍ, ສປປ ລາວ, ມຽນມາ ແລະ ຫວຽດນາມ) ແລະ ທ່ານ ເລຂາທິການໃຫຍ່ອາຊຽນ ເຂົ້າຮ່ວມ ຢ່າງພ້ອມພຽງ.

ກອງປະຊຸມຄັ້ງນີ້ ໄດ້ຕີ​ລາ​ຄາຄືນຫມາກ​ຜົນ​ການ​ຈັດ​ຕັ້ງ​ປະ​ຕິ​ບັດຖະແຫຼງການຮ່ວມ ຂອງກອງປະຊຸມ   ສຸດຍອດ CLMV ຄັ້ງທີ 9 ແລະ ແຜນປະຕິບັດງານ CLMV(2019-2020) ໂດຍ​ສະ​ເພາະ​ການ​ຈັດ​ຕັ້ງ​ປະ​ຕິ​ບັດ​ຄຳ​ຫມັ້ນ​ສັນ​ຍາ​ກ່ຽວ​ກັບ​ການ​ຍົກ​ສູ​ງວຽກ​ງານ​ການ​ເຊື່ອມ​ຈອດ​ພາກ​ພື້ນ, ການ​ປັບ​ປຸງ​ຍົກ​ລະ​ດັບ ແລະ ພັດ​ທະ​ນາ​ພື້ນ​ຖານ​ໂຄງ​ລ່າງ ກໍ່​ຄື​ການ​ພັດ​ທະ​ນາ​ແລວ​ເສດ​ຖະ​ກິດ​ຕາ​ເວັນ​ອອກ​-ຕາ​ເວັນ​ຕົກ, ແລວ​ເສດ​ຖະ​ກິດ​ໃຕ້ ແລະ ເສັ້ນ​ທາງ​ດ່ວນ​ອາ​ຊຽນ, ການ​ປັບ​ປຸງ​​ພື້ນ​ຖານໂຄງ​ບົນ ແລະ ການ​ສ້າງ​ຂີດ​ຄວາມ​ສາ​ມາດ​ຂອງ​ບຸກ​ຄະ​ລາ​ກອນ ເພື່ອ​ເຊື່ອມ​ໂຍງ​ທາງ​ດ້ານ​ເສດ​ຖະ​ກິດ​ທີ່​ມີ​ປະ​ສິດ​ທິ​ພາບ ແລະ ປະ​ສິດ​ທິ​ຜົນ. ພ້ອມດຽວກັນນີ້, ກອງປະຊຸມ ໄດ້ຮັບຮອງເອົາຖະແຫລງການຮ່ວມ ຂອງກອງປະຊຸມສຸດຍອດ CLMV ຄັ້ງທີ 10 ແລະ ໂຄງການບູລິມະສິດ ຂອງ CLMV     ເພື່ອເປັນເອກະສານພື້ນຖານໃນການກໍານົດທິດທາງການຮ່ວມມືໃນຕໍ່ໜ້າ ພ້ອມທັງໄດ້ຮັບຮອງເອົາ ຂອບວຽກເພື່ອການພັດທະນາປະເທດ CLMV ເພື່ອເປັນແຜນຍຸດທະສາດລວມ ໃນການຊຸກຍູ້ປະເທດ CLMV ໃຫ້ກາຍເປັນສູນກາງທາງດ້ານເສດຖະກິດທີ່ກ້າວໜ້າຂອງໂລກ ແລະ ສາມາດກາຍເປັນປະເທດທີ່ມີລາຍຮັບປານກາງສູງ ຮອດປີ 2030. ໃນໂອກາດນີ້,ບັນດາຜູ້ນຳ ໄດ້ສະແດງຄວາມຊົມເຊີຍຕໍ່ຜົນສຳເລັດຢ່າງຈົບງາມໃນການປະຕິບັດໜ້າທີ່ການເປັນປະທານ CLMV ຂອງ ສປປ ລາວ (2018-2020), ຊຶ່ງ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອ, ສະໜັບສະໜູນ ແລະ ການຮ່ວມມືທີ່ດີ ຈາກ ບັນດາປະເທດສະມາຊິກ ຕະຫຼອດໄລຍະ 2 ປີ ຜ່ານມາ ແລະ ໄດ້ມອບຕໍ່ໜ້າທີ່ການເປັນປະທານ CLMV ໃຫ້ແກ່ ມຽນມາ ເພື່ອສືບຕໍ່ປະຕິບັດໜ້າທີ່ອັນ​ມີ​ກຽດ ​ດັ່ງ​ກ່າວ ໃນໄລຍະ 2 ປີ ຂ້າງໜ້າ.

ຫຼັງຈາກສໍາເລັດກອງປະຊຸມສຸດຍອດ CLMV ຄັ້ງທີ 10, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ເປັນປະທານ ກອງປະຊຸມສຸດຍອດ ເຂດສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ (CLV) ຄັ້ງທີ 11, ຊຶ່ງໄດ້ມີ ທ່ານ ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ແລະ ສາທາລະນະລັັດ ສັງຄົມນິຍົມ ຫວຽດນາມ ພ້ອມດ້ວຍຄະນະຜູ້ແທນຈາກປະເທດສະມາຊິກ (ກໍາປູເຈຍ, ສປປ ລາວ ແລະ ຫວຽດນາມ) ເຂົ້າຮ່ວມ ຢ່າງພ້ອມພຽງ.

ກອງປະຊຸມ ໄດ້ທົບທວນຄືນໝາກຜົນການຮ່ວມມື ໃນໄລຍະຜ່ານມາ ໂດຍສະເພາະ ຖະແຫຼງການຮ່ວມຂອງກອງປະຊຸມສຸດຍອດ ຄັ້ງທີ 10, ແຜນພັດທະນາເສດຖະກິດ-ສັງຄົມ ສໍາລັບ ເຂດສາມຫຼ່ຽມພັດທະນາ CLV, ແຜນປະຕິບັດງານການເຊື່ອມຈອດເສດຖະກິດ CLV ຮອດປີ 2030 ແລະ ສັນຍາ ວ່າດ້ວຍ ການສົ່ງເສີມ ແລະ ອໍານວຍຄວາມສະດວກທາງດ້ານການຄ້າ ສໍາລັບ ເຂດສາມຫຼ່ຽມພັດທະນາ CLV, ຊຶ່ງກອງປະຊຸມ ໄດ້ຕີລາຄາວ່າ ການຮ່ວມມືເຂດສາມຫຼ່ຽມພັດທະນາ CLV ໄດ້ນັບມື້ນັບເຕີບໃຫຍ່ຂະຫຍາຍຕົວຂຶ້ນເທື່ອລະກ້າວ ບົນພື້ນຖານສາຍພົວພັນມິດຕະພາບ, ຄວາມສາມັກຄີ, ເພື່ອນບ້ານໃກ້ຄຽງທີ່ດີ, ມີຄວາມເຂົ້າອົກເຂົ້າໃຈກັນ, ມີຄວາມໄວ້ເນື້ອເຊື່ອໃຈກັນ ແລະ ມີການຮ່ວມມືຮອບດ້ານທີ່ມີມາຍາວນານ ອັນໄດ້ປະກອບສ່ວນສໍາຄັນເຂົ້າໃນການສົ່ງເສີມການພັດທະນາເສດຖະກິດ-ສັງຄົມ, ຫຼຸດຜ່ອນຄວາມທຸກຍາກຂອງປະຊາຊົນ ແລະ ສົ່ງເສີມການເຊື່ອມຈອດກັບພາກພື້ນ ລວມທັງໄດ້ສົ່ງເສີມການໄປມາຫາສູ່ກັນ ລະຫວ່າງ ພາກລັດຖະສະພາ, ພາກລັດຖະບານ, ພາກເອກະຊົນ, ປະຊາຊົນ ແລະ ຊາວໜຸ່ມ ທັງຂັ້ນສູນກາງ ແລະ ທ້ອງຖິ່ນຂອງ 3 ປະເທດ ໂດຍກວມເອົາການຮ່ວມມືຮອບດ້ານ ຄື: ຄົມມະນາຄົມຂົນສົ່ງ, ໂທລະຄົມມະນາຄົມ, ພະລັງງານ, ການຄ້າ, ການລົງທຶນ, ອຸດສາຫະກໍາ, ການເງິນ-ທະນາຄານ, ກະສິກໍາ, ທ່ອງທ່ຽວ, ສາທາລະນະສຸກ, ວັດທະນະທໍາ, ແຮງງານ, ສຶກສາທິການ, ສິ່ງແວດລ້ອມ ແລະ ວິທະຍາສາດ ແລະ ເຕັກໂນໂລຊີ. ພ້ອມດຽວກັນນີ້, ກອງປະຊຸມ ໄດ້ຮັບຮອງເອົາຖະແຫລງການຮ່ວມ ຂອງກອງປະຊຸມສຸດຍອດ CLV ຄັ້ງທີ 11 ເພື່ອເປັນເອກະສານພື້ນຖານໃຫ້ແກ່ການສ້າງແຜນພັດທະນາເສດຖະກິດ-ສັງຄົມ ສໍາລັບເຂດສາມຫຼ່ຽມພັດທະນາ CLV ຮອດປີ 2030, ແຜນພັດທະນາທ່ອງທ່ຽວ ສໍາລັບ ເຂດສາມຫລ່ຽມພັດທະນາ CLV ແລະ    ແຜນພັດທະນາອຸດສາຫະກໍາຢາງພາລາແບບຍືນຍົງ ຢູ່ເຂດສາມຫລ່ຽມພັດທະນາ CLV ເພື່ອສືບຕໍ່ຊຸກຍູ້ການພັດທະນາຂະແໜງການທ່ອງທ່ຽວ ແລະ ອຸດສາຫະກໍາຢາງພາລາ ໃນເຂດສາມຫຼ່ຽມພັດທະນາ ໃຫ້ມີຄວາມຍືນຍົງ ແລະ ປະກອບສ່ວນເຂົ້າໃນການຍົກລະດັບຊີວິດການເປັນຢູ່ຂອງປະຊາຊົນ ແລະ ນໍາຜົນປະໂຫຍດຕົວຈິງ ມາສູ່    ເຂດດັ່ງກ່າວ. ກອງປະຊຸມສຸດຍອດ ເຂດສາມຫຼ່ຽມພັດທະນາ CLV ຄັ້ງຕໍ່ໄປ ຈະຈັດຂຶ້ນ ໃນປີ 2022 ພາຍໃຕ້ການເປັນປະທານຂອງ ຣາຊະອານາຈັກ ກຳປູເຈຍ.