ໃນ​ວັນທີ 19 ກຸ​ມ​ພາ 2021 ຜ່ານ​ມາ ກົມ​ເສດ​ຖະ​ກິດ, ກະ​ຊວງ​ການ​ຕ່າງ​ປະ​ເທດ​ ໄດ້​ຈັດ​ກອງ​ປະ​ຊຸມ​ເຜີຍ​ແຜ່​ການ​ຮ່ວມ​ມື​ພາກ​ພື້ນ​ແລະ​ສາ​ກົນ ຂອງ ສ​ປ​ປ ລາວ ຂຶ້ນ ທີ່ ເມືອງ​ໂຂງ, ແຂວງ ຈຳ​ປາ​ສັກ ພາຍ​ໃຕ້​ການ​ເປັນ​ປະ​ທານ​ຮ່ວມ ລະ​ຫວ່າງ ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ ແລະ ທ່ານ ສົມ​ບູນ ເຮື​ອງ​ສາ,ຮອງ​ເຈົ້າ​ແຂວງ​ຈ​ຳ​ປາ​ສັກ ໂດຍ​ມີ​ຜູ້​ເຂົ້າ​ຮ່ວມ​ຈາກ​ສູນ​ກາງ ແລະ ຂະ​ແໜງ​ການທີ່​ກ່ຽ​ວ​ຂ້ອງ ຈາກ ແຂວງ ຈຳ​ປາ​ສັກ, ສະ​ຫວັນ​ນະ​ເຂດ, ສາ​ລະ​ວັນ, ເຊກອງ ແລະ ອັດ​ຕະ​ປື ເຂົ້າ​ຮ່ວມ​ລວມ​ທັງ​ໝົດ 70 ທ່ານ. ຈຸດ​ປະ​ສົງ ຂອງກອງ​ປະ​ຊຸມ​​ຄັ້ງ​ນີ້ ແມ່​ນ​ເພື່ອ​ຈັດ​ຕັ້ງ​ຜັນ​ຂະ​ຫຍາຍ​ໂຄງ​ການ​ຝຶກ​ອົບ​ຮົມ​ສຳ​ລັບ​ນັ​ກການ​ທູດ​ໜຸ່ມແມ່​ນ້ຳ​ຂອງ-ແມ່​ນ້ຳ​ລ້ານ​ຊ້າງ ຊຶ່ງ​ເປັນ​ໜຶ່ງ​ໃນ​ໂຄງ​ການ​ທີ່​ ສ​ປ​ປ ລາວ ໄດ້​ຮັບ​ອະ​ນຸ​ມັດ​ຈາກກອງ​ທຶນ​ພິ​ເສດ ແມ່​ນ້ຳ​ຂອງ-ແມ່​ນ້ຳ​ລ້ານ​ຊ້າງ​ ໃນ​ສົກ​ປີ 2019-2020 ຜ່ານ​ມາ. ໂດຍທີ່​ປະ​ຊຸມ​ໄດ້​ຮັບ​ຟັງ​ການ​ເຜີຍ​ແຜ່​ກ່ຽວ​ກັບ​ໝາກ​ຜົນ​ຂອງ​ການ​ຮ່ວມ​ມື​ພາກ​ພື້​ນ ແລະ ສາ​ກົນ ຂອງ ສ​ປ​ປ ລາວ ພາຍ​ໃຕ້ຂອບ​ການ​ຮ່ວມ​ມືອາ​ນຸ​ພາ​ກ​ພື້​ນ​ແມ່​ນ້ຳ​ຂອງ ກັບ​ຄູ່​ຮ່ວມ​ພັດ​ທະ​ນາ ໂດຍ​ໄດ້​ລົງ​ເລິກ​ຂອບ​ການ​ຮ່ວມ​ມື​ແມ່​ນ້ຳ​ຂອງ-ແມ່​ນ້ຳ​ລ້ານ​ຊ້າງ ຊຶ່ງ​ເຫັນ​ວ່າໄດ້​ປະ​ກອບ​ສ່ວ​ນ​ເຂົ້າ​ໃນ​ການ​ພັດ​ທະ​ນາ​ເສດ​ຖະ​ກິດ​-ສັງ​ຄົມ ຂອງ ສ​ປ​ປ ລາວ ຢ່າງ​ຕັ້ງໜ້າ ທັງ​ທາງ​ກົງ ແລະ ທາງ​ອ້ອມ. ພ້ອມດ​ຽວ​ກັນ​ນັ້ນ, ທີ່​ປະ​ຊຸມ​ຍັງ​ໄດ້​ຮັບ​ຟັງ​ການ​ເຜີຍ​ແຜ່​ເງື່ອນ​ໄຂ ແລະ ຂັ້ນ​ຕອນການ​ສະ​ເໜີ​ໂຄງ​ການ​ພາຍ​ໃຕ້​ກອງ​ທຶນ​ພິ​ເສດ​ແມ່​ນ້ຳ​ຂອງ-ແມ່​ນ້ຳ​ລ້ານ​ຊ້າງ ແລະ ໂຄງ​ການ​ຕົວ​ແບບ​ທີ່ ສ​ປ​ປ ລາວ ຈັດ​ຕັ້ງ​ປະ​ຕິ​ບັດ​ ພາຍ​ໃຕ້​ກອງ​ທຶນ​ດັ່ງ​ກ່າວ. ນອກ​ຈາກນັ້ນ, ກໍ​ໄດ້​ຮັບ​ຟັງ​ການ​ນຳ​ສະ​ເໜີ​ບົດ​ກ່ຽວ​ກັບ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມຂອງ​ຜູ້​ຕາງ​ໜ້​າ​ຈາກ​ບັນ​ດາ​ແຂວງ​ທີ່​ເຂົ້າ​ຮ່ວມ​ປະ​ຊຸມ ຊຶ່ງ​ໄດ້​ຍົກ​ໃຫ້​ເຫັນ​​ເຖິງກາ​ລະ​ໂອ​ກາດ ແລະ ສິ່ງ​ທ້າ​ທາຍ​ໃນ​ການ​ພັດ​ທະ​ນາ​ຢູ່​ແຂວງ​ຕ່າງໆ. ໃນ​ຕອນ​ທ້າຍ ກອງ​ປະ​ຊຸມໄດ້​ສຸມ​ໃສ່ແລກ​ປ່ຽນ​ຄຳ​ຄິດ​ຄຳ​ເຫັນ​ເພື່ອ​ຊອກ​ຫາ​ກາ​ລະ​ໂອ​ກາດ ໃນ​ການ​ໝູນ​ໃຊ້​ທ່າ​ແຮງ​ການ​ຮ່ວມ​ມື​ພາກ​ພື້ນ ແລະ ສາ​ກົນ ຂອງ ສ​ປ​ປ ລາວ ເຂົ້າ​ໃນ​ການ​ພັດ​ທະ​ນາ​ເສດ​ຖະ​ກິດ-​ສັງຄົມແຫ່ງ​ຊາດ ກໍ​ຄືຂອງ​ທ້ອງ​ຖິ່ນ​ໃຫ້​ມີ​ປະ​ສິດ​ທິ​ພາບ ແລະ ມີ​ປະ​ສິດ​ທິ​ຜົ​ນຍິ່ງໆ​ຂຶ້​ນ. ໃນ​ໂອ​ກາດນີ້, ທ່ານ ກິ່ງ​ໂພ​ແກ້ວ ພົມ​ມະ​ຫາ​ໄຊ, ຫົ​ວ​ໜ້າ​ກົມ​ເສດ​ຖະ​ກິດ ໃນ​ນາ​ມ​ຄະ​ນະ​ຈັດ​ຕັ້ງກອງ​ປະ​ຊຸມ​ໄດ້ມອບເຄື່ອງ​ອຸ​ປະ​ກອນ​ກິ​ລາ, ປຶ້ມ​ຂຽນ ແລະ ເຄື່ອງ​ຄອມ​ພິວ​ເຕີ (ຈຳ​ນວນ 1 ຊຸດ) ລວ​ມ​ມູນ​ຄ່​າເຈັດ​ລ້ານກວ່າ​ກີບ ໃຫ້​ແກ່ ​ໂຮງຮຽນມັດ​ຖະ​ຍົມຕົ້ນ​ໂສດ ແລະ ໂຮງ​ຮຽນ​ປະ​ຖົມສົມ​ບູນ​ບ້ານ​ໂສດ, ເມືອງ​ໂຂງ, ແຂວງ​ຈຳ​ປາ​ສັກ ເພື່ອ​ປະ​ກອບ​ສ່ວນ​ຊຸກ​ຍູ້​ໃຫ້​ແກ່​ໂຮງ​ຮຽນ​ທີ່​ຂາດ​ເຂີນ ແລະ ຢູ່ຫ່າງ​ໄກ​ສອກຫລີກ.

ນອກ​ຈາກນີ້, ຄະ​ນະ​ຈັດ​ຕັ້ງ​ກອງ​ປະ​ຊຸມ ຍັງ​ມີ​ແຜນ​ຈະ​ສືບ​ຕໍ່ຈັດ​ຕັ້ງ​ປະ​ຕິ​ບັດໂຄງ​ການຝຶກ​ອົບ​ຮົມສຳ​ລັບ​ນັກ​ການ​ທູດ​ໜຸ່ມແມ່​ນ້ຳ​ຂອງ-ແມ່​ນ້ຳ​ລ້ານ​ຊ້າງ ໂດຍ​ຈະ​ຈັດ​ກອງ​ປະ​ຊຸມ​ເຜີຍ​ແຜ່ໃຫ້​ແກ່​ບັນ​ດາ​ແຂ​ວງພາກ​ເໜືອ, ພາກກ​າງ, ບັນ​ດາ​ກະ​ຊວງຂະ​ແໜງ​ການ​ອ້​ອມ​ຂ້າງ​ສູນ​ກາງ ແລະ ຈັດ​ກ​ອງ​ປະ​ຊຸມ​ສຳ​ມະ​ນາຮ່ວມ​ກັບ​ບັນ​ດາ​ປະ​ເທດ​ສະ​ມາ​ຊິກ​ແມ່​ນ້ຳ​ຂອງ -ແມ່​ນ້ຳ​ລ້ານຊ້າງ ໃນ​ຕໍ່​ໜ້າ.